Bu yaxınlarda Rusiyada təşkil edilən “Moskva kino həftə­si”ndə Azərbaycan da təmsil olunub. Bu ölkənin Yaradıcı Sənayelər Agentliyinin təşkilat­çılığı ilə reallaşan “Kino həftə­si”nə ABŞ, Türkiyə, Hindistan, Çin, Cənubi Koreya, Qazaxıs­tan, Özbəkistan, Birləşmiş Ərəb Əmirliyi və digər ölkələr də qoşulublar.

Beynəlxalq tədbirdə iştirak edən Mə­dəniyyət Nazirliyinin yaradıcı sənayelər və rəqəmsal inkişaf şöbəsinin müdiri Rəşad Əzizov XQ-yə təəssüratlarını belə ifadə etdi:

– Bu layihə beynəlxalq peşəkar kino ictimaiyyəti ilə Rusiya kino sənayesinin liderləri arasında qarşılıqlı əlaqələrin ya­radılması üçün əlverişli platforma rolunu oynayır. İlk dəfə gerçəkləşən “Moskva kino həftəsi” çərçivəsində iştirakçılar yara­dıcı sənaye sahəsi üzrə müxtəlif ölkələrin aparıcı layihələri ilə tanış olmaq imkanı da əldə ediblər. Burada 25 ölkədən bey­nəlxalq kino komissiyalarının nümayən­dələri, kino sənayesinin rəhbər şəxsləri və ekspertləri iştirak edirdi. Həftə ərzində bir çox panel müzakirələr təşkil olundu. “Ya­radıcı iqtisadiyyat” mövzusunda keçirilən panel müzakirələrə biz də qatıldıq. Müza­kirələrdə Azərbaycanda Mədəni və Yara­dıcı Sənayelərin (MYS) qrantlar və təhsil proqramları vasitəsilə strateji inkişafına xüsusi diqqət ayrılması barədə danışdıq. Bundan başqa, müxtəlif ölkələrin yaradı­cı sənaye nümayəndələri ilə görüşlərimiz oldu. Görüşlərdə qrant və təhsil proqram­ları, gənc startapçılara dəstək göstərən Ya­radıcı Mərkəzin fəaliyyəti, ölkənin MYS sektorunu gücləndirmək və qlobal səviy­yədə əməkdaşlıqlar müzakirə edildi. 

Nazirlik rəsmisi Rusiya kino mütəxəs­silərinin ölkəmizdə film və serial çəkiliş­ləri sahəsinə marağından danışaraq söy­lədi ki, bu ölkənin şirkətləri Azərbaycana film və serial çəkmək üçün gəlirlər:

– Hər zamankı kimi əməkdaşlığa hazı­rıq. Ölkəmizdə yaşayan rusdilli əhali ara­sında çox populyar olan köhnə filmlərin üzərində yenidən işlənilə bilər. Rusiyanın animasiya filmləri azərbaycanlı tamaşaçı­lar arasında populyardır. 

Müsahibimiz əlavə etdi ki, zəngin proqramı olan “Kino həftəsi” 6 gün ər­zində iştirakçı ölkələrin müvafiq möv­zuda təcrübə mübadiləsi aparması baxı­mından böyük əhəmiyyət kəsb edib: 

– Bu gün yaradıcı mədəniyyət sahəsi dünyada dinamik inkişaf edir. Kino, teatr, musiqi, incəsənət, ədəbiyyat və digər bu kimi sahələrdən ibarət yaradıcı sahələrin həm də biznes imkanları var. Ölkəmizdə də bu yöndə əsas məsələlər diqqətdə sax­lanılır və lazım olan bütün addımlar atılır. “Kino həftəsi” və digər bu kimi beynəlxalq platformalar iştirakçı ölkələrin aparıcı la­yihələrindən məlumatlı olmaq imkanı ve­rir. 

Ceyhun BALABƏY
XQ