İnsanların hər zaman estetik zövq aldığı teatrlar bu mövsümdə də rəngarəng repertuarları ilə yadda qaldılar. Mövzu seçimi baxımından çağdaş tələblərə cavab verən tamaşaların hazırlanması ənənəsi özünü sənət ocaqlarının təqdimatında hər zamankından daha fərqli göstərdi. Bakı teatrlarının bir-birindən fərqli ovqatyaradıcı səhnə əsərləri salonlarında əks-səda verdi, tamaşaçı rəğbəti qazandı.
Yola salınan mövsüm Azərbaycan Dövlət Akdamik Musiqili Teatrı üçün tamaşaçı rəğbəti və bir-birindən maraqlı premyeralarla yadda qalıb. Bu barədə danışan sənət ocağının mətbuat xidmətinin rəhbəri Fəridə Rüstəmova dedi ki, Musiqili Teatrın hazırladığı tamaşalara bu mövsümdə izləyici sevgisi daha da artıb.
– Teatrımız həmişəki kimi, yeniliklərə üstünlük verdi, peşəkarlıq və tamaşaçı məmnuniyyətini düşündü. Buna görə də, teatrın rəhbərliyi və yaradıcı heyət çox mükəmməl səhnə əsərləri ortaya qoya bildilər. Düşünürəm ki, yola salmağa hazırlaşdığımız 114-cü mövsüm həm bizim üçün, həm də tamaşaçılar üçün maraqlı oldu. Teatr iyulun 19-da Üzeyir Hacıbəylinin “O olmasın, bu olsun” musiqili komediyası ilə mövsümə yekun vuracaq.
Azərbaycan Milli Dram Teatrının mətbuat xidmətinin rəhbəri Cavid Zeynallı bu mövsümün təmsil etdiyi sənət ocağı üçün unudulmaz olduğunu qeyd etdi. O bildirdi ki, mövsümdə Milli Dram Teatrının repertuarına əlavə olunan yeni tamaşalar maraqla qarşılandı, baxımlı oldu.
– Tamaşaçı sevgisi qazanan və günün tələbləri ilə səsləşən səhnə əsərlərinin repertuara salınması rəhbərlik və yaradıcı heyətimiz üçün başlıca məqsəddir. İnamla deyə bilərəm ki, bu ənənəmizi yenə də qoruyub saxlamışıq. Artıq biz mövsümə Cəlil Məmmədquluzadənin pyesi əsasında hazırlanmış “Ölülər” tamaşası ilə yekun vurmuşuq. Qarşıdakı mövsümdə daha maraqlı səhnə əsərləri ilə teatrsevərlərin görüşünə gələcəyik.
Azərbaycan Dövlət Akademik Opera və Balet Teatrının əməkdaşı İrada Karaceyava mövsüm ərzində hazırlanan səhnə əsərləri barədə danışdı. Teatrda təmir işləri getdiyi üçün balet və operaların fərqli məkanlarda təqdim edildiyini bildirdi. Opera və Balet Teatrının da mövsümə yekun vurduğunu deyən müsahibimiz, yeni mövsümdə də yüksək səviyyəli səhnə əsərləri ilə tamaşaçıların zövqünü oxşayacaqlarına ümidvar olduğunu söylədi.
Azərbaycan Dövlət Kukla Teatrının da bu mövsümdə təqdim etdiyi səhnə əsərlərində fərqli texniki həll üsullarına, təbii təsir bağışlayan bədii tərtibata üstünlük verilib. Balacaların sevimli məkanının mətbuat xidmətinin rəhbəri Həmidə Rüstəmova bildirdi:
– Bu il fərqli kukla estetikasında səhnəyə qoyulan tamaşalar azyaşlı seyrçilər üçün daha əyləncəli və yaddaqalan oldu. Hər tamaşadan sonra uşaqların üzündə təbəssüm görmək bizdə xoş ovqat yaradır. Qeyd edim ki, mövsümün sonuncu səhnə əsəri iyulun 14-də oynanılacaq “Dovşanın ad günü” nağıl-poemasının tamaşası olacaq. Görkəmli yazıçı Xanımana Əlibəylinin bu əsərinə Saida Haqverdiyeva maraqlı quruluş verib. Tamaşanın rəssamı Rəna Abasova, bəstəkarı Əməkdar artist Vüqar Camalzadə, mahnıların mətn müəllifi Sevinc Nuruqızıdır.
Fərqli və dərin məna yozumlu tamaşaların nümayişinə üstünlük verən Azərbaycan Dövlət Pantomim Teatrı da “yay tətili”nə hazırlaşır. Bədii ideyanın, mətləbin sözsüz, mimika və musiqilərin köməyi ilə təqdim edildiyi sənət ocağı mövsümün son akkordunu iyulun 14-də Uilyam Şeksprin məşhur “Romeo və Cülyetta”əsərinin tamaşası ilə vuracaq. Bu tamaşanın premyerası martın 30-da olub. Səhnə əsərinin quruluşçu rejissoru və musiqi tərtibatçısı Ceyhun Dadaşov, rəqslərin quruluşçusu Əməkdar artist Nargilə Qəribova, rəssamı Xəyyam Səmədovdur.
Bu il 35 illik yubileyi olan Azərbaycan Dövlət “Yuğ” Teatrında isə “Asılqan” tamaşası ilə mövsümə yekun vurulacaq. Xalq yazıçısı Anarın “Asılqanda işləyən qadının hekayəti” əsəri əsasında rejissoru Əbdülqəni Əliyevin quruluş verdiyi tamaşa həyatlarının hər bir dönəmində sınaqlarla üzləşən iki gəncin sevgi hekayəsindən bəhs edir.
Qeyd edək ki, paytaxtın digər teatrları və bölgələrdəki sənət ocaqları da mövsümə yaddaqalan tədbirlərlə yekun vurmaq əzmindədirlər.
Ceyhun ALIŞLI
