İnsanlar həyata bəzən göz nuru olmadan da gəlirlər. Onların öz dünyaları, duyum qabiliyyətləri olur. Paytaxtımızda bu insanları birləşdirən bir ocaq var. Respublika gözdən əlillər kitabxanası 40 ildən çoxdur ki, bu missiyanı yerinə yetirir. Kitabxanada çalışan insanlar tez-tez müxtəlif layihələr icra edirlər.
Bu məkana çatdıqda bir tədbir başlamaq üzrə idi. Hamı kitabxananın “Özümüzü tanıdaq” layihəsi çərçivəsində şair-tərcüməçi Giya Paçxataşvilinin audio-kitablarının təqdimatına yığışmışdı. “Giyanın Qarabağnaməsi”, “Son əvvələ gedən yol”, “Hə dedim” adlanan kitablarda şairin müxtəlif mövzularda yazdığı şeirləri toplanıb. Şeirləri Xalq artisti Eldost Bayram səsləndirib. Həmin şeirlərlə tanışlıq və Giya Paçxataşvili ilə ünsiyyət kontekstində göz nurundan məhrum insanların yaradıcı keyfiyyətləri üzə çıxır. Mərasimdə, həmçinin şairin qələmə aldığı “Zülmətdən gələn nur” marşı dinlənildi. Marşın musiqisi bəstəkar İqbal Ağayevə məxsusdur. Bu marş görmə əngəlli insanların birliyini və bəşəriyyətə çağırışını ifadə edir.
Daha sonra biz kitabxananın işçiləri ilə həmsöhbət olduq. Təşkilatçı Ayxan Hüseynov fikirlərini bizimlə bölüşdü:
– Görmə əngəlli insanlar Brayl əlifbasından istifadə edib oxuyurlar. Bu əlifba 6 nöqtəli sistemdir. Bütün hərflər bu nöqtələrdə cəmləşir. Kitabları hazırlmaq üçün xüsusi kağızlardan istifadə edilir. Çap maşınlarının inkişafı bu əlifbanı daha da təkmilləşdirib. Kitabxanamızın fondunda Brayl əlifbasında 30 minədək bədii və tədris ədəbiyyatı mövcuddur. Bu da gözdən əngəllərin təhsili üçün əhəmiyyətli rol oynayır.
Kitabxana görmə əngəlli insanların sosiallaşmasında mühüm rol oynamağa başlayıb. Burada göz nurundan məhrum qələm adamlarının yaradıcılıq gecələri keçirilir. Onların yaradıcılıq nümunələrinin tanıdılması üçün başqa addımların atılması da düşünülür. Yaxın gələcəkdə bu kateqoriyalı insanların səsli kitablarının sayının çoxaldılması hədəflənir. Onların əsərləri respublika üzrə keçirilən kitab sərgilərinə də çıxarılır.
Kitabxananın digər əməkdaşı Zəkəriyyə Qurbanovla da söhbət etdik.
– Məqsədimiz kitabxanamızı sosial media üzərindən tanıtmaqdır, – dedi. – Buna görə də müxtəlif tədbirləri təşkil edərkən onlayn platformada yayırıq. Bu yolla insanların tədbirlərimiz barədə sosial mediadan xəbər tutaraq bizə qoşulması təmin olunur.
“Gözüm ol mənim” adlı layihəni də icra edirik. Həmin layihənin ideyasını bizə Orxan Yusifov adlı həmvətənimiz verib. O, ABŞ-da bu səpkili işlərin çoxdan görüldüyünü bildirib. Biz layihəyə 2017-ci ildən başladıq və bunu Kitab klubu səviyyəsinə qaldırdıq. Orxan Yusifov indi də müxtəlif kitablar oxuyur. Hazırda o, Fyodor Dostoyevskinin “İdiot” romanını ana dilmizdə səsləndirir. Bu da görmə məhdudiyyətli insanlar üçün növbəti hədiyyədir. Hazırda bu platforma sosial şəbəkə səhifələri üzərində də yayımlanmaqdadır.
Ölkəmizdə bu cür kitabxananın fəaliyyət göstərməsi bizləri sevindirir. Görmə əngəlli vətəndaşlarımızın fəal sosial həyat uğrunda mübarizəsi insanda ruh yüksəkliyi yaradır. Onlara hər vasitə ilə yardımçı olan kitabxananın kollektivinə uğurlar diləyi ilə:
Ceyhun MİRZƏLİ
