“Gülüstan” Sarayında Ümummilli liderin 100 illik yubileyi çərçivəsində Mədəni irs forumu işə başlayıb. 

İştirakçılar əvvəlcə sarayın foyesində milli tətbiqi-dekorativ sənət nümunələri –sərgisi ilə ta­nış olublar. Forumun açılışında çıxış edən mədəniyyət nazirinin müavini Səadət Yusifova bildirib ki, Prezident İlham Əliyev, Birin­ci vitse-prezident, Heydər Əliyev Fondunun rəhbəri Mehriban xa­nım Əliyeva tərəfindən mədəni irsimizin qorunması, bərpası və təbliği diqqət mərkəzində saxla­nılır. 

Qarabağ və Şərqi Zəngəzu­run irs nümunələri haqqında söz açan nazir müavini burada 705 tarix və mədəniyyət abidəsinin dövlət qeydiyyatına alındığını diqqətə çatdırıb: “Aparılan təhlil­lər nəticəsində müəyyən olunub ki, həmin ərazilərdə çoxsaylı döv­lət qeydiyyatına alınmayan tarixi, arxeoloji və memarlıq əhəmiyyətli daşınmaz mədəni irs obyektləri də mövcuddur. İşğal dövründə onlar ermənilər tərəfindən van­dalizmə məruz qalıb, 47 abidə yer üzündən silinib. 2020-2022-ci illərdə Mədəniyyət Nazirliyi ya­nında Mədəni İrsin Qorunması, Bərpası və İnkişafı üzrə Dövlət Xidməti tərəfindən 433 tarix-mə­dəniyyət abidəsinə baxış keçirilib, eləcə də dövlət qeydiyyatında ol­mayan 182 obyektin monitorinqi aparılıb”. 

Sonra Səadət Yusifova mə­dəni irsimizin beynəlxalq aləmdə təbliği barədə danışıb. Azərbay­canın 23 qeyri-maddi mədəni irs elementinin UNESCO-nun Bəşə­riyyətin Qeyri-Maddi Mədəni İrs üzrə Reprezentativ Siyahısına daxil edildiyini bildirilib. O, deyib ki, son 3 il ərzində ərazi bütövlü­yünü və suverenliyini bərpa edən Azərbaycanın gələcəkdə qarşı­laşacağı təhdidlər sırasında mə­dəni irs də var. Ona görə də bu istiqamətdə görüləcək işlərə daha həssas, sistemli və kompleks ya­naşılmalı, kadr hazırlığına xüsusi diqqət yetirilməli, elmi araşdırma­ların sayı və keyfiyyəti artırılmalı­dır. İki gün ərzində forumda mü­zakirələrə çıxarılacaq məsələlər və təkliflər diqqətə alınacaq və 2040-cı ilə hədəflənmiş yeni Mə­dəniyyət Konsepsiyasında öz ək­sini tapacaq”.

Azərbaycan Memarlar İttifaqı İdarə heyətinin sədri Elbay Qa­sımzadə forumun əhəmiyyətini yüksək qiymətləndirərək deyib ki, zəngin mədəni irsimiz dünya xalqları sırasında özünəməxsus­luğumuzun göstəricisidir.

Forum İştirakçılarının fikirləri­ni təqdim edirik. 

Fərhad Xəlilov, Azərbaycan Rəssamlar İttifaqının sədri, Xalq rəssamı:

– Hesab edirəm ki, aparılan müzakirələr ümumi işə öz töhfəsi­ni mütləq verməlidir. Forum iki gün davam edəcək, mən onun faydalı olacağına inanıram və iştirakçıları­na uğurlar arzulayıram. 

Səbinə Hacıyeva, Mədəniy­yət Nazirliyi yanında Mədəni İr­sin Qorunması, İnkişafı və Bər­pası Dövlət Xidmətinin rəisi: 

– Çoxdan bu foruma hazırlıq işləri gedirdi, çünki mədəni irs hamını düşündürən məsələdir. Problemlərindən, gələcək işlər­dən danışıldı, maraqlı müza­kirələr oldu. Forumda daşınar, daşınmaz mədəni irsin problem­lərini açmağa çalışdıq. Böyük gözləntilərimiz var. Mədəni irsə aid olan hər kəs burdadır. Bir ara­ya gəlməyin özü də böyük əhə­miyyət kəsb edir. 

Nurəddin Mehdixanlı, Xalq artisti: 

– Çox böyük məsələlər müza­kirə olundu. Azərbaycanda təsviri sənətin, dekorativ tətbiqi sənətin vəziyyəti, memarlığın inkişaf is­tiqamətləri, ümumilikdə mədəni irs barədə maraqlı fikirlər səslən­dirildi, müzakirələr keçirildi. Düşü­nürəm ki, bu forum mənəvi-əxlaqi dəyərlərimizin qorunub inkişaf et­dirilməsi istiqamətində böyük ad­dım olacaq. Mədəniyyətinə sahib çıxan millət tarixinə və taleyinə sahib olar. 

Forum işini bu gün də davam etdirəcək.

Ramilə QURBANLI
XQ