Ölkənin musiqi ocaqları isə yeni mövsümə zəngin repertuarla gəlib

Prezident Heydər Əliyevin 18 sentyabr 1995-ci il tarixli fərmanı ilə Azərbaycan professional musiqi sənətinin banisi Üzeyir Hacıbəylinin dünyaya gəldiyi 18 sentyabr ölkəmizdə Üzeyir Musiqi Günü kimi qeyd olunur. 

Ötən illərdə həmin gün ərəfəsində ənənəvi beynəlxalq musiqi festivalı, klassik musiqi kon­sertləri, müxtəlif tədbirlər keçirilib. Bu il də Üzeyir Musiqi Gününün repertuarı zəngindir.

Sentyabrın 18-i saat 15-də Bey­nəlxalq Muğam Mərkəzində konsert proqramı təşkil ediləcək. Həmin gün bu mərkəzdə “Açıq qapı” elan edilib və kon­sertə giriş sərbəst olacaq. Konsert proq­ramında mərkəzin solistləri – əməkdar ar­tistlər Səbuhi İbayev, Ehtiram Hüseynov, xanəndələr Hüseyn Məlikov, Ayşən Meh­diyeva, Vəfa Vəzirova və Günay İmam­verdiyeva muğam və xalq mahnılarından ibarət rəngarəng proqramla tamaşaçıla­rın görüşünə gələcəklər. Xanəndələri tar­zən Rövşən Qurbanovun rəhbərlik etdiyi ansambl müşayiət edəcək.

Həmin gün Üzeyir Hacıbəyli XV Bey­nəlxalq Musiqi Festivalına da start ve­riləcək. İlk gündə Üzeyir Hacıbəyli adına Dövlət Simfonik Orkestri və Azərbaycan Dövlət Rəqs Ansamblı Heydər Əliyev Sarayının səhnəsində çıxış edəcək, bu­rada Arif Məlikovun “Məhəbbət əfsanəsi” baleti tamaşaçılara təqdim olunacaq. 

Festival çərçivəsində Azərbaycan Bəstəkarlar İttifaqında sentyabrın 19-dan 22-nə qədər hər gün silsilə elmi kon­franslar və konsert proqramları olacaq. 

Bu gün isə Üzeyir Musiqi Günü ilə bağlı tədbirlərə start verilir. Azərbay­can Milli Xalça Muzeyində “Xalçalarda musiqi” adlı sərgi açılacaq və uşaqlar üçün konsert proqramı təşkil olunacaq. Sərgidə muzeyin kolleksiyasından mu­siqi sənəti ilə əlaqəli 11 ədəd zəngin kompozisiyalı portret və süjetli xalçalar, qobelenlər nümayiş etdiriləcək. Xalq rəssamları Tahir Salahov və Eldar Mika­yılzadənin görkəmli bəstəkarlar Üzeyir Hacıbəyli, Qara Qarayev və Dmitri Şos­takoviçə həsr etdikləri portret xalçaları, xalçaçı-rəssamlar Gülmurad Bəbirov, Bəsti Şərif, rəssamlar Pavel Kuzmenko, Rimma Eminova və Faiq İbrahimovun əsərləri ekspozisiyada aparıcı yer tutur.

***

Ölkənin musiqi ocaqları da yeni möv­sümə başlayacaq. Sentyabrın 19-da Müslüm Maqomayev adına Azərbaycan Dövlət Akademik Filarmoniyasının yay zalında milli kinematoqrafiyamızın 125 illi­yinə həsr olunmuş konsert təşkil ediləcək.

Bu il filarmoniyanın səhnəsində tanınmış bəstəkarların ənənəvi yara­dıcılıq gecələri təşkil ediləcək. Xalq ar­tisti, bəstəkar Vasif Allahverdiyevin 60 illiyi, xalq artistləri Tofiq Bakıxanov, Eldar Mansurov və Nəriman Məmmədovun yaradıcılıq gecələri, görkəmli rus bəstə­karı Sergey Raxmaninovun 150 illiyinə həsr olunmuş fortepiano axşamı, violon­çelçi Sabir Əliyevin 95 illiyi ilə bağlı təd­bir, İlyas Mirzəyevin 60 və Fərəc Qara­yevin 80 illiyinə həsr olunmuş yaradıcılıq axşamları musiqi gündəmində aparıcı yer tutacaq. Xarici ifaçıların və tanınmış musiqi kollektivlərinin iştirakı ilə konsert­lər nəzərdə tutulub. Fransada yaşayan soydaşımız, Əməkdar artist, Fransanın Ali Beynəlxalq Musiqi Akademiyasının direktoru Adilə Əliyeva öz çıxışı ilə klas­sik musiqi həvəskarlarını sevindirəcək.

Gənc istedadlara və bəstəkarlara öz yaradıcılıqlarını böyük səhnədə nüma­yiş etdirmək imkanı verən filarmoniyada “Gənclərə dəstək” layihəsi çərçivəsində konsertlər ölkənin müxtəlif salonlarında da davam etdiriləcək.

Uzun fasilədən sonra 2022-ci ilin noyabrından filarmoniyanın Mədəniyyət Nazirliyinin dəstəyi ilə təşkil etdiyi abo­nement konsertləri yenidən başlanır. Konsertlər hər şənbə günü saat 15-də kamera və orqan musiqisi zalında ke­çiriləcək. Bu konsertlərdə müxtəlif kol­lektivlər rəngarəng proqramlarla çıxış edəcək.

Azərbaycan Dövlət Akademik Opera və Balet Teatrı özünün115-ci mövsümü­nün açılışına hazırlaşır. Teatrın direkto­ru, Xalq artisti Yusif Eyvazov yeni möv­sümün açılışı ilə əlaqədar kollektivdə müzakirə keçirib. Qarşıda duran prioritet məsələlər, maraqlı layihələr, təqdimat­larla bağlı geniş yaradıcılıq diskussiyası aparılıb. Əsas məsələlərdən biri də te­atrın qastrol səfərlərinin təşkilidir. Qeyd olunub ki, milli və klassik operaların bər­pası teatrın qarşısında duran məsələlər­dən biridir.

Azərbaycan Dövlət Akademik Mu­siqili Teatrında isə Xalq artisti, bəstəkar Polad Bülbüloğlunun musiqiləri əsasın­da hazırlanan və yeni səhnə əsərlərin­dən olan “Nəğməmə inan” tamaşası nü­mayiş olunacaq. Teatrın rus bölməsində hazırlanan bu musiqili komediya növbəti dəfə sentyabrın 24-də teatrsevərlərə təqdim olunacaq. Librettosu və mahnıla­rının mətni Mixail Şerbaçenkoya məxsus olan bu səhnə əsərinə quruluşu teatrın baş rejissoru Cavid İmamverdiyev, di­rijor, Əməkdar incəsənət xadimi Fəxrəd­din Atayev veriblər. Quruluşçu rəssamı Vüsal Rəhim, quruluşçu baletmeysteri Əməkdar artist Nigar Şahmuradova, xormeysteri Əməkdar artist Vaqif Məs­tanovdur. Rolları əməkdar artistlər Boris Qrafkin, Fərid Əliyev, Nərgiz Kərimova, aktyorlar Emil Heydərov, Mehriban Zali­yeva, Rauf Babayev və Leonid Klyotc ifa edəcəklər.

Onu da deyək ki, Rusiyanın bir neçə teatrında oynanılan bu əsərin radio-ta­maşasında baş rolu Polad Bülbüloğlu özü səsləndirib. 

Şuşa Dövlət Musiqili Dram Teatrı 150 -ci teatr mövsümünü sentyabrın 16-da gənc yazar Jalə Novruzun “Molla Nəs­rəddini tapın” tamaşasının premyerası ilə açacaq. Tamaşanın quruluşu teatrın baş rejissoru, Əməkdar artist Loğman Kərimova məxsusdur. Quruluşçu rəs­sam Valeh Məmmədov, musiqi tərtibat­çısı Ağasəlim Feyzullayevdir. Molla Nəs­rəddin rolunu Əməkdar artist Teymur Məmmədov, Mollanın arvadını isə Xalq artisti Şükufə Musayeva ifa edəcəklər. Digər rolları isə teatrın aktyorları Rasəf Mehdiyev, Hamlet Qənbərov, Dürdanə Dünyamalıyeva, Təranə Əliyeva, Nihad Heybətov, Mobil Qurbanov, Vüsal Məm­mədov, Sevinc Ağayeva, Bahar Həm­zəyeva, Gündüz Qasımov və Orxan Abışov canlandıracaqlar.

Bir sözlə, musiqi ocaqları yeni möv­sümə tam hazırdır və sənətsevərləri bir-birindən maraqlı tamaşalar, konsert­lər, digər mədəni-kütləvi tədbirlər gözləyir.

Q.RAMİLƏ