Artıq, dörd gündür ki, şəhərimizin müxtəlif yerlərində “Muğam aləmi” VI Beynəlxalq Musiqi Festivalı adı altında tədbirlər keçirilir. Heydər Əliyev Fondunun, Mədəniyyət Nazirliyinin təşkilatçılığı, Elm və Təhsil Nazirliyinin, Azərbaycan Milli Konservatoriyasının dəstəyi ilə təşkil olunan festival qədim və zəngin muğam sənəti, peşəkar muğam ənənələrini özündə yaşadır. Festival bəşər tarixində əsrarəngiz gözəlliyə malik incəsənət növü olan muğamı Azərbaycan xalqının qiymətli sərvətlərindən biri kimi dünya ictimaiyyətinə təqdim edir. Festivalın təşkilində əsas məqsəd musiqi irsimizi yaşatmaqdan, xalqımızın ənənəvi musiqi sənətininin dünya musiqi xəzinəsində əvəzolunmaz yeri olduğunu bir daha sübuta yetirməkdən ibarətdir.
Festivalın açılış mərasiminə Heydər Əliyev Sarayında “Alim Qasımov və onun qonaqları” adlı konsertlə start verildi. Dövlət və hökumət rəsmilərinin, tanınmış elm və mədəniyyət xadimlərinin, eləcə də muğamsevərlərin iştirak etdiyi tədbirdə Xalq artisti Alim Qasımov, Əməkdar artist Fərqanə Qasımova, Əfqan rübabı və Hind sarodunun dünya şöhrətli ifaçısı Daud Xan Sadozai, xoreoqraf, muğamla rəqs hərəkətlərini sistemləşdirən Saşar Zərif və Türkiyənin xalq musiqi sənətçisi Senem Akdemir muğamı müasir musiqi janrları ilə sintez edərək möhtəşəm ifa sərgilədilər. Festivalın birinci günü Milli Konservatoriyada Xalq artisti Ənvər Sadıqov və Əməkdar artist Emil Əfrasiyabın da konsertləri keçirildi.
Festivalın ikinci günündə isə Beynəlxalq Muğam Mərkəzi, Milli Konservatoriya və Daş Salnamə Muzeyində Azərbaycandan Əməkdar artist Elçin Şirinov və bir sıra muğam ifaçılarının, Əfqanıstandan Daud Xan Sadozai və İrandan Mahan Mirarabın konsertləri təşkil olundu. İyunun 19-da, həmçinin festival çərçivəsində Beynəlxalq Muğam Müsabiqəsi start götürdü.
Müsabiqənin ilkin mərhələsində ölkəmizi instrumental ifaçılıq kateqoriyası üzrə 5, xanəndəlik kateqoriyası üzrə isə 4 ifaçı təmsil etdi. Xanəndəlik kateqoriyasında Mirəli Sarızadə, Xəyal Hüseynov, Zümrüd Məmmədova, Daşqın Kürçaylı, instrumental ifaçılıq kateqoriyasında isə Vaqif Təhməzov, Cahandar Mikayılov, Bayraməli Əliyev və Soltan Nadirov musiqi nömrələri ilə çıxış etdilər.
Müsabiqədə Azərbaycanla yanaşı, İran, İsrail, Özbəkistan və Türkiyədən ümumilikdə 22 ifaçı iştirak etdi. Birinci yer uğrunda instrumental ifaçılıq kateqoriyası üzrə 12, xanəndəlik kateqoriyası üzrə isə 10 ifaçı mübarizə aparırdı.
İnstrumental ifaçılıq kateqoriyasında qalib olan 6 iştirakçı – Bayraməli Əliyev, Sultan Nadirov, Vaqif Təhməzov (Azərbaycan), Zilola Ruziyeva, Jahongir Otamurodov, Shoxijohan Yoriev (Özbəkistan), xanəndəlik kateqoriyasında isə 5 iştirakçı – Daşqın Kürçaylı, Zümrüd Məmmədova (Azərbaycan), Mohiçehra Şahmurotova, Ramziddin Ergashev, Dostmurod Negmurodov (Özbəkistan) öz ifalarını təqdim etdilər.
İyunun 19-da keçirilən müsabiqənin birinci turunun növbəti mərhələsində isə instrumental ifaçılıq kateqoriyası üzrə daha 6 iştirakçının, xanəndəlik üzrə isə 5 ifaçının dinləmələri təşkil edildi. Qeyd edək ki, dinləmələrdən sonra iyunun 21-də ikinci tura keçən ifaçılar arasından qaliblər seçiləcək.
İyunun 20-də Bakıda VI “Muğam aləmi” Beynəlxalq Musiqi Festivalı çərçivəsində keçirilmiş Elmi simpoziumun açılışı oldu. Tədbirdə Azərbaycan mütəxəssisləri ilə yanaşı, ABŞ, Böyük Britaniya, Fransa, Hindistan, İsrail, Kanada, Qazaxıstan, Özbəkistan, Tacikistan, Türkiyə və Yaponiyadan alimlər iştirak edirdilər.
Simpoziumun rəsmi açılış mərasimində vurğulandı ki, muğam qədim ayinlərdən qaynaqlanaraq, əsrlər boyu davam edən tədrici inkişaf və təkamül prosesindən keçərək, yetkinləşib, formalaşıb və kamilləşib. Klassik ədəbiyyat nümunələri ilə üzvi surətdə vəhdət təşkil edərək sintetik sənət növü kimi meydana çıxan muğamların Azərbaycan musiqisinin inkişafında rolu böyükdür.
Çıxışlarda həmçinin, diqqətə çatdırıldı ki, Heydər Əliyev Fondunun prezidenti Mehriban Əliyevanın fəaliyyətinin nəticəsi olaraq keçirilən muğam müsabiqələri sayəsində artıq ölkəmizdə muğam ustadları ilə yanaşı, gənc muğam ifaçıları nəsli də yetişir. Muğamın UNESCO-nun Qeyri-Maddi Mədəni İrs Siyahısına daxil edilməsində Mehriban Əliyevanın əvəzsiz xidmətlərindən danışıldı, həmçinin Beynəlxalq Muğam Mərkəzinin istifadəyə verilməsinin muğam sənətinin inkişafında böyük rolunun olduğu bildirildi.
“Muğam aləmi” VI Beynəlxalq Musiqi Festivalı çərçivəsində keçirilən Elmi simpozium “Çağdaş muğam ifaçılığı: ənənə ilə müasirlik arasında”, “Azərbaycan muğamının tədqiqi problemləri” və “Yeni tədqiqatlar və tədqiqat metodları” sessiyaları ilə davam etdi.
Onu da bildirək ki, simpozium iyunun 22-dək davam edəcək.
Fidan HÜQUQQIZI,
“Xalq qəzeti”