Prezident İlham Əliyevin peşəkar milli teatrımızın 150 illiyinin qeyd olunması ilə bağlı imzaladığı sərəncama əsasən, Sumqayıt Dövlət Dram Teatrında da silsilə tədbirlər keçirilir. Onu da qeyd edək ki, burada yubiley tədbirləri eyni zamanda teatrın 55 illiyinə həsr olunur. 

Öz pərdəsini ilk dəfə Azərbaycan dramaturgiyasının banisi Mirzə Fətə­li Axundzadənin “Müsyo Jordan və Dərviş Məstəli şah” (rejissoru Cən­nət Səlimova) məzhəkəsi ilə açmış Sumqayıt teatrında ötən dövr ərzində repertuara klassik və müasir Azər­baycan, rus və xarici ölkə dramaturq­larının pyesləri daxil edilib və uğurla oynanılıb. Bir çox ünlü teatr xadimi məhz bu teatrın səhnəsindən pərvaz­lanıb.

Yubileylər çərçivəsində teatrda yeni layihələr gerçəkləşməkdədir. “Açıq qapı” günləri, bayram təntənələ­ri yaddaqalan olur. Elə bu günlər­də Əməkdar mədəniyyət işçisi Vasif Məmmədovun quruluşunda Astrid Linqrenin “Balaca və Karlsonun ma­cəraları” tamaşasının nümayişi ilə bərabər, gənclərin teatra ekskursiyası təşkil edilib. Onlar qrim, əlbəsə otaq­larına, musiqi sexinə, işıq rəssamının işinə, butafor otağına, dərzi emalatxa­nasına, rəssam guşəsinə baxıb, te­atral proseslə yaxından tanış olublar. Daha sonra inzibati heyət tamaşaçıları maraqlandıran məsələlərə aydınlıq gətirib. Həmin tamaşa isə martın 11-i və 12-də də göstəriləcək.

Teatrın direktor əvəzi, Əməkdar ar­tist Vidadi Məmmədov “Xalq qəzeti”nə müsahibəsində bildirdi ki, yubiley ilinin əvvəlindən M.F.Axundzadənin “Hacı Qara” komediyası (quruluşçu rejisso­ru teatrın baş rejissoru, respublikanın Xalq artisti Firudin Məhərrəmovdur), Əbdürrəhim Bəy Haqverdiyevin “Kim­dir müqəssir” vodevili (quruluşçu re­jissor Fuad Kazımov), Turqut Ozak­manın “Ocaq” (quruluşçu rejissor Xalq artisti Firudin Məhərrəmov), Ha­fiz Ataxanlının ”Xəzinə” və “Missiya” əsərləri tamaşaçılara təqdim edilib. Peşəkar milli teatrın təşəkkül tapdığı gün – martın 10-da Üzeyir Hacıbəy­linin “O olmasın, bu olsun” iki hissəli operettasının (rejissor Əməkdar artist Namis Şirməmmədov) nümayişi ilə qeyd ediləcək. Səhnə əsərindən əvvəl yubileylə bağlı çıxışlar olacaq, yaradı­cılıq hesabatı veriləcək, kollektivə və teatrsevərlərə təbriklər ünvanlanacaq.

Yaradıcı kollektivin builki planların­da həmçinin ulu öndər Heydər Əliyevin 100, dahi mütəfəkkir Hüseyn Cavidin 140, Əhməd Cavadın 130 illik yubi­leyləri üçün tamaşa və ya ədəbi-bədii gecələrin hazırlanması da önəmli yer tutur.

Əli NƏCƏFXANLI,
“Xalq qəzeti”