Dünən Türkiyənin ilk aviadaşıyıcısı “TCG Anadolu” suya buraxılıb. Rəsmi mərasimdə ölkə başçısı Rəcəb Tayyib Ərdoğan, milli müdafiə naziri Hulusi Akar və digər rəsmi şəxslər iştirak ediblər.
Ölkə mediasının verdiyi xəbərə görə, gəminin Türk Silahlı Qüvvələrinin güclənməsində müstəsna rolu olacaq. Bildirilir ki, “TCG Anadolu” TSQ-nin dünya sürətlə ikinci soyuq müharibəyə doğru irəlilədiyi bir vaxtda transformasiyasını təmsil edir. Aviadaşıyıcı Afrikadan Qafqaza qədər təsir dairəsinə malikdir. “TCG Anadolu”nun gövdəsinə silahlı pilotsuz uçuş aparatları da enə biləcək. 30 min tonluq “TCG Anadolu” kimi strateji döyüş gəmiləri əməliyyat planına uyğun olaraq öz tapşırıq qrupları ilə birlikdə hərəkət edir.
Ümumiyyətlə, Türkiyə müdafiə sənayesinin texnoloji inkişafı və ixracat potensialı getdikcə artmaqdadır. Hərbi Dəniz Qüvvələrinin məqsədi artıq mərhələli şəkildə açıq dəniz donanması qurmaq və onu robotlaşdırılmış döyüş imkanları ilə təchiz etməkdir. Ölkənin ilk təyyarə gəmisi “TCG Anadolu” isə məhz bu məqsədə nail olmaq yolunda atılan uğurlu addımdır.
“Xalq qəzeti”
