AMEA Mərkəzi Elmi Kitabxanasında (MEK) Macar ədəbiyyatı həftəsi başlanıb. Həftənin açılışında Macarıstanın Azərbaycan Respublikasındakı fövqəladə və səlahiyyətli səfiri Tamaş Torma, səfirin birinci katibi, Mədəniyyət və Təhsil məsələləri üzrə diplomat Monika Felföldi iştirak etdilər. Qonaqlar sərgi salonunda MEK-in fondlarındakı kitablarla tanış oldular. MEK-in baş direktoru, professor Məmməd Əliyev qonaqları macar şairlərin, yazıçı və alimlərin nəşrləri, həmçinin Azərbaycan yazarlarının macar dilində olan kitablarla tanış etdilər. 

Sərgidə dünya miqyasında tanınmış türko­loq-alim, Macarıstan Elmlər Akademiyasının həqiqi üzvü Georq Hazainin MEK-də saxlanı­lan şəxsi kolleksiyasına daxil olan tarix, ədə­biyyat, incəsənət, siyasət, din və sair mövzu­lardakı kitabları, həmçinin ulu öndərin ömür yolundan bəhs edən “Heydər Əliyev. Şəxsiy­yət və zaman” üçcildliyinin macar dilində nəşri, Xalq yazıçısı, Azərbaycan Yazıçılar Birliyinin sədri Anarın “Seçilmiş əsərləri”, “Венгерская пресса об Азербайджане” (Macarıstan mət­buatı Azərbaycan haqqında) nəşri təqdim olunur. MEK-ə səfəri zamanı görkəmli alimin qızı Sesiliya Hazai tərəfindən hədiyyə olunan və G.Hazainin həyatına, yaradıcılığına həsr edilən yeni nəşrləri də burada görmək müm­kündür.

Daha sonra qonaqlar MEK-lə yaxından tanış olublar. Baş direktor, professor Məm­məd Əliyev qəzetimizə açıqlamasında bildirdi ki, Vətən müharibəsində Azərbaycanın haqlı mövqeyini dəstəkləyən dost ölkələrdən biri də Macarıstandır. Artıq MEK-lə Macarısta­nın kitabxanaları, o cümlədən ölkənin ən bö­yük rəqəmsal platforması olan “Arcanum” ilə məhsuldar əməkdaşlıq edilir. Kitab mübadilə­si həyata keçirilir, dəyərli alimlərimizin MEK-in fondlarındakı nəşrləri həmin platformada mütəmadi olaraq yerləşdirilir. 

Sərgidə Macarıstanın Azərbaycan Res­publikasındakı fövqəladə və səlahiyyətli səfiri Tamaş Torma “Macar ədəbiyyatı həftəsi”nin təşkilinə görə MEK rəhbərliyinə dərin təşək­kürünü bildirdi. Səfir qeyd etdi ki, ötən il Azər­baycan – Macarıstan diplomatik əlaqələrinin qurulmasının 30 illiyi qeyd olunub. Bu dövrdə iki ölkənin əlaqələri daha da inkişaf edərək müxtəlif sahələrdə öz uğurlu nəticələrini ve­rib. Onlardan biri də mədəniyyət, təhsil, elm sahələridir. Kitabxanada macar dilində olan ədəbiyyatlardan danışan səfir onu da vurğu­ladı ki, belə nəşrlərin sayının artması üçün müvafiq addımlar atılacaq. Eyni zamanda, tanınmış macar yazıçı və şairlərin əsərlərinin də Azərbaycan dilinə tərcüməsinin planlaş­dırıldığını diqqətə çatdırdı. Sonda qonaqlara MEK adından Azərbaycanın tarixi memarlıq abidələrindən bəhs edən dəyərli nəşrlər təq­dim edildi. 

Anar ƏLİ, “Xalq qəzeti”