Xarici və yerli istehsalçıların, eləcə də investorların muxtar respublikaya səfəri çərçivəsində keçirilən tədbirdə çıxış edən Naxçıvan Muxtar Respublikası İqtisadiyyat nazirinin müavini, nazir vəzifələrini müvəqqəti icra edən Abbas İsmayılov qədim diyarın ötən ilin yekunlarına dair iqtisadi inkişaf göstəricilərini açıqlayıb. Vurğulanıb ki, 2023-cü ildə muxtar respublikada 1 milyard 552 milyon manat dəyərində ümumi daxili məhsul (ÜDM) istehsal olunub. Ötən il bölgədə 594 milyon manatlıq sənaye, 358 milyon manatlıq kənd təsərrüfatı məhsulları istehsal edilib, əhaliyə 34 milyon manatlıq informasiya və rabitə, 178 milyon manatlıq ödənişli xidmətlər göstərilib.
Qəzetimizin muxtar respublika üzrə bölgə müxbiri Səbuhi Həsənovun bildirdiyinə görə, tədbirdə qeyd edilib ki, Naxçıvan iqtisadiyyatında şəffaflaşmanın artması, “kölgə iqtisadiyyatı”nın miqyasının azaldılması, biznes fəaliyyətinin leqallaşdırılması vergi daxilolmalarının dinamik artımı ilə nəticələnib. Belə ki, 2023-cü ildə büdcə gəlirlərində qeyri-dövlət sektorunun payı 55,7 faiz, vergi daxilolmalarında isə 62,4 faiz təşkil edib.
Sahibkarlığın sürətli inkişafında ən önəmli amillərdən biri maliyyə əlçatanlığıdır. 2023-cü ildə Naxçıvan Muxtar Respublikası Sahibkarlığın İnkişafı Fondu tərəfindən 40 investisiya layihəsinin maliyyələşdirilməsinə 6,2 milyon manat güzəştli şərtlərlə dövlət maliyyə dəstəyi göstərilib ki, bunun 84,8 faizi sənaye məhsullarının istehsalına, 11,7 faizi kənd təsərrüfatına və 3,5 faizi isə xidmət sahələrinə yönəldilib.
Naxçıvan Muxtar Respublikası Kənd təsərrüfatı nazirinin müavini, nazir vəzifələrini müvəqqəti icra edən Xəyalə Dadaşova, Naxçıvan Muxtar Respublikası Rəqəmsal İnkişaf və Nəqliyyat nazirinin müavini, nazir vəzifələrini müvəqqəti icra edən Rahid Ələkbərli, “Azərbaycan Françayzinq Assosiasiyası”nın idarə heyətinin sədri Camid Mövsümov, “İhlas Holdinq”in direktor müavini Cemil Ceyhan Aral və “Özgün İnşaat”ın direktor müavini Mehmet Can Seyman çıxışlarında “Naxçıvan Muxtar Respublikasının sosial-iqtisadi inkişafına dair 2023-2027-ci illər üçün Dövlət Proqramı” barədə məlumat verərək, bu sənədin əsas qayələrindən birinin sahibkarlar üçün əlverişli investisiya mühiti formalaşdırmaq, azad iqtisadi zona yaratmaqla qədim diyarı əsas sərmayə mərkəzinə çevirmək olduğunu vurğulayıblar.
Tədbirdə şirkətlərin gördükləri işlərə aid videoçarxlar nümayiş etdirilib, investisiyalarla bağlı məlumatlandırma olub.
XQ