Son 1 əsrdə ölkədə çəltik əkini 30 dəfə azalıb
Son vaxtlar dünya mediasında ən çox diqqətçəkən məsələlərdən biri düyü ixracının məhdudlaşdırılması ilə bağlı olub. Əvvəlcə Hindistan, daha sonra isə Birləşmiş Ərəb Əmirlikləri və Rusiya bu məhsulun ixracını dayandırmağı qərara alıb.
Bu vəziyyəti ekspertlərin fikrincə, düyü istehsalçısı olan Tayland və digər ölkələrdə havaların quraq keçməsi, daşqınlar, musson yağışları şərtləndirib. Tayland Düyü İxracatçıları Assosiasiyasının məlumatına görə, bu ölkənin ağ düyüsünün qiyməti 5 faiz artaraq 1 ton üçün 648 dollara çatıb. Bu da 2008-ci ilin oktyabrından indiyədək ən yüksək göstərici kimi qeydə alınıb. Beləliklə, son bir ildə bu məhsul üzrə qiymət artımı, təqribən, 50 faiz yüksəlib.
Təbii ki, əsas ərzaq mallarından biri və buğdanın əvəzedicisi sayılan düyü qıtlığının qarşısının alınması üçün yeganə yol bu məhsulun istehsalının genişləndirilməsidir. Bununla bağlı bəhs etməzdən əvvəl ölkəmizin düyü idxalındakı vəziyyətinə qısa nəzər salaq. Azərbaycanın Dövlət Gömrük Komitəsinin məlumatına görə, cari ilin ilk yarısında respublikamıza 32 milyon 506 min dollar dəyərində 36 min 430 ton düyü gətirilib. Bu dövrdə 1 ton düyünün orta idxal qiyməti isə 892 dollar təşkil edib. Keçən ilin uyğun dövründə isə 1 ton düyünün orta idxal qiyməti 842 dollar olub. Beləliklə, cari ilin əvvəlindən düyünün orta idxal qiyməti 50 dollar yüksəlib.
Ölkəmizdə düyü istehsalının artırılmasına gəldikdə isə deyə bilərik ki, son illər bu məsələyə xüsusi diqqət yetirilir, çəltikçilik ölkənin ərzaq təhlükəsizliyi zəncirində prioritet istiqamətlərdən biri kimi dəyərləndirilir. Azərbaycanda çəltikçiliyə ənənəvi sahə kimi daim mühüm önəm verilib. Respublikamızda çəltik bitkisi qədimdən becərilib. Ölkəmizin ərazisində keyfiyyəti ilə müxtəlif müsabiqələrdə dəfələrlə fərqlənən “Ağ ənbərbu”, “Vilgəri”, “Yetim”, “Lənkəran sədrisi”, “Ağ qılçıqlı” və digər yerli sortlar becərilib. İqtisadi şəraitlə əlaqədar çəltiyin əkin sahəsi illər üzrə müxtəlif olub. Çəltik sahəsi 1913-cü ildə 47 min hektar, 1927-ci ildə 54 min hektar, 1937-ci ildə 25,3 min hektar,1964-cü ildə 12,3 min hektar təşkil edib, sonradan tərəvəzçiliyin inkişafı ilə əlaqədar 1,8 min hektara qədər azalıb. Yalnız 1995-ci ildən başlayaraq çəltik əkinləri genişləndirilib, 1996-cı ildə 2,4 min hektar sahədə çəltik əkilib, hər hektarın orta məhsuldarlığı 38,7 sentner olub.
Lakin hazırda çəltikçiliyin inkişafı diqqət mərkəzindədir. Aqrar Subsidiya Şurasının qərarına əsasən, bu gün çəltik becərilən sahənin hər hektarına görə, fermerlərə 360 manat əkin subsidiyası verilməsi də bunun bariz ifadəsidir. “Azərbaycan Respublikasında çəltikçiliyin inkişafına dair 2018–2025-ci illər üçün Dövlət Proqramı”nın qəbul edilməsi, bu sənədə əsaslanaraq çəltikçilik ənənələrinin yaşadılaraq yeni inkişaf mərhələsinə yüksəldilməsi, düyü ilə özünütəminetmə səviyyəsinin əhəmiyyətli dərəcədə yaxşılaşdırılması, düyünün idxal asılılığın azaldılması kimi məsələlər də son məqsəddən– istehsalın artırılmasından xəbər verir. Dövlət proqramının icrası nəticəsində 2025-ci ildə çəltiyin əkin sahəsinin (10 min hektara qədər) və məhsuldarlığın (hər hektardan 2,5 dəfədən çox – 40 sentnerə qədər) əhəmiyyətli dərəcədə artırılacağı nəzərdə tutulur.
Çəltikçiliyə dair dövlət proqramı və Azərbaycan Respublikası regionlarının sosial-iqtisadi inkişafı üzrə dövlət proqramları çərçivəsində ölkəmizin müxtəlif regionlarında dənli və dənli-paxlalı bitkilərin, o cümlədən çəltikçiliyin inkişaf etdirilməsi ilə bağlı tədbirlər nəzərdə tutulub, bu istiqamətdə müvafiq işlər həyata keçirilib. “Kənd təsərrüfatı məhsulları istehsalçılarına dövlət dəstəyi haqqında” Azərbaycan Prezidentinin 2007-ci il 23 yanvar tarixli sərəncamına əsasən, buğda və çəltik əkini sahəsinin becərilməsində istifadə edilən yanacaq və motor yağlarına görə dövlət büdcəsinin vəsaiti hesabına hər hektar üçün 90 manat yardım verilməsi, həmçinin son illər kənd təsərrüfatının inkişafı istiqamətində həyata keçirilən digər tədbirlər istehsalçılarda bu sahəyə marağı gücləndirib.
Respublikamızda çəltikçiliyin inkişafı məqsədilə hazırlanan proqramların icrası ilə yanaşı, Kənd Təsərrüfatı Nazirliyinin Əkinçilik Elmi-Tədqiqat İnstitutu tərəfindən də çəltiyin yüksək məhsuldar, xəstəlik və zərərvericilərə davamlı sortlarının yaradılması, introduksiyası, yerli şəraitə adaptasiyası və toxumçuluğunun təşkili istiqamətində tədqiqat işlərinə də başlanılıb. Eyni zamanda, çəltiyin seleksiyası və toxumçuluğuna dair tədqiqat işlərinin aparılması üçün Lənkəran rayonu ərazisində lazımi infrastruktur qurulub. Bütün bunlarla bərabər, çəltikçiliyin geniş yayıldığı ölkələrdən Azərbaycana yüksək məhsuldar toxum sortlarının gətirilməsi də diqqətdə saxlanılıb. Məsələn, Kənd Təsərrüfatı Nazirliyinin tabeliyində fəaliyyət göstərən Dövlət Toxum Fondu tərəfindən Pakistan İslam Respublikasından respublikamıza yeni çəltik sortları gətirilib.
Hazırda Əkinçilik Elmi-Tədqiqat İnstitutunda 2023–2024-cü illər üçün çəltiyin seleksiyasına dair təsdiq olunan mövzu planına əsasən Lənkəran bölgəsində seleksiya tədqiqatları həyata keçirilir. Bu rayonda hər il 1–1,5 hektar sahədə toxumluq məqsədilə “Avanqard” sortunun superelit reproduksiyalı əkini aparılır və 2,5-3 ton elit toxumu istehsal edilərək bölgə fermerlərinə verilir.
Onu da vurğulayaq ki, mövcud sahədə görülən işləri ifadə edən müəyyən rəqəmlərin müqayisəsi də bu sahədə tədrici inkişafa nail olunduğunu göstərir. Məsələn, respublikada ötən ilə qədər çəltik əkini sahəsi 3 min hektar olub, 12 min tona yaxın düyü istehsal olunub. 2022-ci il isə respublikanın 9 rayonunda çəltik əkini aparılıb. Çəltik əkinlərinin ümumi sahəsi 3 min 194 hektar təşkil edib. Həmin vaxt ən çox Lənkəran (802,3 hektar), Ağdaş (681 hektar) və Ucar (678 hektar) rayonlarında çəltik əkilib. Orta məhsuldarlıq hektar üzrə 36,2 sentner təşkil edib. Bu, 2021-ci ilin orta məhsuldarlıq göstəricisindən hektar üzrə 1,4 sentner çox olub. Eyni zamanda, həmin dövrdə respublikada 2021-ci ilə nisbətən 858 ton daha çox məhsul istehsal olunub. Məlumat üçün qeyd edək ki, cari il respublikada 3 min 171 hektarda çəltik əkilib. Ötən il isə həmin göstərici 3 min 129 hektar təşkil edib.
Mirağa ƏHMƏDOV,
iqtisadçı-ekspert
“Azərbaycan Respublikasında çəltikçiliyin inkişafına dair 2018–2025-ci illər üçün Dövlət Proqramı”nın məqsədi ölkə əhalisinin düyüyə olan tələbatının daha dolğun ödənilməsi, idxalın əvəzlənməsi, çəltik emalı sənayesinin inkişaf etdirilməsi və kənd əhalisinin məşğulluq səviyyəsinin yüksəldilməsi üçün ölkədə çəltikçilik sahəsinin inkişafını stimullaşdırmaqdan ibarətdir.
Həmin məqsədə nail olunması üçün çəltik əkini sahələrinin genişləndirilməsi və çəltiyin məhsuldarlığının artırılması, çəltikçilik sahəsində normativ hüquqi bazanın təkmilləşdirilməsi, çəltiyin yüksək məhsuldar, xəstəlik və zərərvericilərə davamlı, yerli və rayonlaşdırılmış sortlarının toxumçuluq təsərrüfatlarının yaradılmasının dəstəklənməsi qarşıya mühüm vəzifə kimi qoyulur.
Bütün bunlarla bərabər, çəltikçiliyin infrastruktur təminatının yaxşılaşdırılması, çəltik istehsalı və emalı sahəsində innovativ texnologiyaların tətbiqinin dəstəklənməsi, çəltik emalı müəssisələrinin yaradılmasının, düyü məhsulunun rəqabət qabiliyyətliliyinin artırılması və ixracının təşviqi, həmçinin çəltikçilik sahəsində elmi təminatın və kadr potensialının gücləndirilməsi məhsul istehsalının artırılması üçün əsas istiqamətlərdir.
“Azərbaycan Respublikasında çəltikçiliyin inkişafına dair 2018-2025-ci illər üçün Dövlət Proqramı”nda yerli düyü istehsalının daxili bazarın tələbatının 90 faiz ödənilməsi qarşıya mühüm vəzifə kimi qoyulub. Artıq bu istiqamətdə müsbət nəticələr müşahidə olunur. Belə ki, ölkədə bu məhsulun istehsalının artması sayəsində düyü idxalı 2021-ci ildə 18 faiz azalıb.
Düyü əkin sahələrinin artırılması məsələsinə gəlincə, Azərbaycanda bu məqsədlər üçün kifayət qədər ərazi var. Lakin çəltik rütubəti sevən bitkidir və hazırda ölkədə su ehtiyatları ilə bağlı çətin vəziyyət müşahidə olunur. Amma başqa ölkələrin, məsələn, İsrailin təcrübəsini mənimsəyərək yeni suvarma texnologiyaları tətbiq edilsə, çəltik istehsalında daha yüksək göstəricilərın əldə olunması mümkündür.
Vaqif BAYRAMOV
XQ