Beynəlxalq Bərpa Olunan Enerji Agentliyinin (IRENA) baş direktoru Françesko La Kamera tərəfindən beynəlxalq mediada yayılan məlumata əsasən, qlobal miqyasda bərpaolunan enerji mənbələrin 40 faizinin reallaşdırılmasına nail olunub. Lakin buna baxmayaraq hazırda qlobal istiləşmənin 1,5 selsi səviyyəsindən aşağı saxlanılması üçün transmissiyanın həcminin 3 giqavatdan (GW) 2030-cu ildə 10 GW-dək artırılması zərurəti ilə üzləşilib.
Baş direktorun sözlərinə görə, qarşıda duran vəzifəni gerçəkləşdirmək üçün genişhəcmli investisiya tələb edilir. Bunun üçün isə sərmayələrin daha ədalətli şəkildə ölkələrə yönəldilməsi dövlət sektorunun müdaxiləsindən asılıdır.
Françesko La Kameran, eyni zamanda, bərpaolunan enerji mənbələrinin reallaşdırılması məqsədilə inkişaf etməkdə olan ölkələrə daha çox vəsait yönəltmək üçün kollektiv səylər tələb etdiyini vurğulayıb. Onun fikrincə, həmin ölkələrə dəstəyin əsaslı şəkildə yaxşılığa doğru dəyişməsi isə təmiz enerjiyə çıxışa və iqlimə uyğunlaşmaya daha çox fayda verə bilər. Bu prosesdə isə maliyyə institutları tərəfindən daha yaxşı şərtlərlə daha çox vəsait enerji keçidi layihələrinə yönəldilməli və yeni enerji sisteminin inkişafını reallaşdırmaq üçün lazımi fiziki infrastruktur qurulmalıdır.
İndi isə bir sıra ölkələrin bu sahədəki fəaliyyətinə qısa nəzər salmaq istərdik. Məsələn, Almaniya hazırda dünyada bərpaolunan enerji mənbələrinin inkişafında və tətbiqində haqlı olaraq lider sayılır. Bu dövlət hərtərəfli düşünülmüş enerji siyasəti və sözügedən sektorun inkişafının onilliklər boyu dəstəklənməsi sayəsində bərpaolunan enerjinin təbliğində, nəzəri texnologiyaların iqtisadiyyatda tətbiqində mühüm rol oynayır.
Almaniyada 2030-cu ilə qədər elektrik enerjisi tədarükünün yarıdan çoxunun və bütün enerjinin təqribən üçdəbir hissəsinin məhz bərpaolunan enerji mənbələri hesabına təmin edilməsi planlaşdırılır. Ekspertlər tərəfindən bu sahədə aparılan təhlillər göstərir ki, qarşıya qoyulan məqsədə çatmaq üçün ölkədə böyük potensial var.
Xatırladaq ki, COVID-19 pandemiyası ilə yadda qalan 2020-ci ildə Almaniya kömürdən istifadənin azaldılmasını, külək, günəş və bioqaz enerjisinin rolunun artırılmasını elan edib. Məhz həmin dövrdə bu ölkədə istehsal edilən elektrik enerjisinin yarıdan çoxu, daha dəqiq desək, 51,2 faizi sözügedən mənbə hesabına yaranıb və bu, böyük göstərici kimi qeydə alınıb. Şübhəsiz ki, burada COVID – 19-un iqtisadiyyata təsiri də özünü aydın göstərib, lakin pandemiyanın təsirinin getdikcə zəifləməsinə baxmayaraq bərpaolunan enerjiyə meyil dəyişməyib.
Onu da deyək ki, Almaniyada elektrik stansiyalarının bir qismi hələ də kömürlə işləyir. Bu ölkədə daş kömür çıxarılması 2018-ci ilin sonunda dayandırılıb. Həmin vaxtdan daş kömür yalnız idxal edilib. Almaniya bazarına daş kömürün əsas tədarükçüsü Rusiya olub, bütün idxalın təqribən yarısı onun payına düşüb. Lakin Ukraynada müharibə və Moskvanın Rusiya qazına görə ödənişin yalnız rubl ilə aparılması barədə tələbləri ilə bağlı münaqişə “yaşıl enerji”yə keçidin sürətləndirilməsi məsələsini daha da aktuallaşdırıb.
Almaniyanın elektrik energetikasında kömürlə işləyən elektrik stansiyaların payının azaldılması ilə əlaqədar çox ehtimal ki, daş kömür alınması daha da azalacaq. Bu, həm də qonur kömürə tələbatın azalmasına gətirib çıxaracaq.
Beləliklə, nəticə etibarilə Almaniya elektrik energetikasında ən çirkli enerji daşıyıcısı kimi kömürdən istifadə edilməsindən 2038-ci ildən tez imtina edə bilər.
Burada maraqlı bir məqamı da xatırladaq. Belə ki, ötən ilin əvvəlində qəbul edilən yeni qanuna əsasən, Almaniyada dizel yanacağı, benzin, mazut və təbii qazın yandırılması zamanı əmələ gələn karbon qazının hər tonuna görə 25 avro ödənilməlidir. Bu isə avtomobil yanacağının və mənzillərin qızdırılmasının bahalaşmasına gətirib çıxarır.
Beləliklə, atmosferə karbon qazı tullantılarına görə, ödəniş tədricən artırılacaq və 2025-ci ilədək karbon qazının hər tonuna ödənişin məbləği 55 avroya çatdırılacaq. Bu da, öz növbəsində, elektrik avtomobillərindən istifadəyə keçid prosesini sürətləndirəcək.
ABŞ-da da “Yaşıl enerji” layihəsi çərçivəsində mühüm uğurlar əldə edilib. Bu ölkənin energetika informasiya idarəsinin ilkin məlumatına əsasən, 2020-ci ildə ABŞ-da ümumi enerji istehlakının təqribən 12,6 faizi və ölkə daxilində istehsal edilən elektrik enerjisinin təqribən 19,8 faizi bərpaolunan enerji mənbələrinin payına düşüb.
2019-cu ildən bəri külək energetikası ölkədə bərpaolunan elektrik enerjisinin ən iri istehsalçısıdır. 2020-ci ildə külək enerjisi sayəsində 337,9 teravat-saat elektrik enerjisi istehsal olunub. Bu, ölkədə elektrik enerjisi istehsalının ümumi həcminin 8,4 faizi və bərpaolunan mənbələrdən elektrik enerjisi istehsalının ümumi həcminin 43,2 faizi deməkdir. 2021-ci ilin oktyabr ayı üçün olan məlumata görə, ABŞ-da külək energetikasının sənədlərdə göstərilən gücü 130 meqavata yaxın olub.
ABŞ-da bərpaolunan elektrik enerjisinin ikinci ən böyük istehsalçısı hidroenergetikadır. Belə ki, 2020-ci ildə elektrik enerjisinin ümumi həcminin təqribən 7,3 faizi və bərpaolunan elektrik enerjisi istehsalının ümumi həcminin 36,4 faizi bu mənbə hesabına yaranıb. Birləşmiş Ştatlar dünyada hidroelektrik enerjisinin ən iri istehsalçıları arasında Çin, Kanada və Braziliyadan sonra dördüncü yeri tutur.
Birləşmiş Ştatlarda elektrik enerjisinin günəş energetikası hesabına təmin edilən hissəsi artmaqdadır: 2017-ci ildə quraşdırılmış istehsal güclərinin 50 giqavatdan çox hissəsi ölkənin elektriklə təchizatının ümumi həcminin təqribən 1,3 faizini istehsal edib. Müqayisə üçün qeyd edək ki, əvvəlki ildə bu göstərici 0,9 faiz olub. 2016-cı il üçün olan məlumata görə, günəş enerjisi sənayesində işləyənlərin sayı 260 min nəfəri ötüb. 43 ştatda isə energetika şirkətləri tərəfindən günəş batareyaları hesabına yaranan əlavə enerjini almaq üçün xüsusi sayğaclar quraşdırılıb.
Dünyada əhali sayına görə birinci, iqtisadiyyatın həcminə görə ikinci dövlət olan Çin Xalq Respublikası da bərpaolunan enerji sahəsində qısa müddətdə ciddi nailiyyətlər əldə edib.
Ekspertlərin fikrincə, bərpaolunan enerji sektoru qazıntı və nüvə enerjisi potensialına nisbətən daha sürətlə inkişaf edir və yaxın vaxtlarda dünya üzrə bərpaolunan enerji potensialının təxminən 43 faizini məhz Çin təmin edəcək.
Ötən il ölkənin bərpaolunan mənbələrdən elektrik enerjisi istehsalı 1000 giqavata çatıb ki, bu da Çinin ümumi generasiya gücü potensialının 43,5 faizi deməkdir. Mövcud dinamikaya nəzər yetirəndə Çin hökumətinin 2030-cu ilədək günəş və külək mənbələrindən 1200 giqavat enerji əldə etmək, habelə 2060-cı ilədək bütün enerjinin 80 faizini alternativ mənbələrdən təmin etmək hədəfinə çatacağı real görünür. Çin Dövlət Şurasının hələ 2013-cü ildə qəbul etdiyi fəaliyyət planında ölkənin enerji balansında bərpaolunan enerji mənbələrinin payını artırmaq niyyəti əksini tapıb.
V.BAYRAMOV, “Xalq qəzeti”