Bakıda “Ulduz kimi parla” şüarı ilə keçirilən 39-cu Avropa çempionatında gimnastların mübarizəsi böyük ruh yüksəkliyi ilə davam edir. Avropanın ən güclü gimnastları gözəl, zərif və eyni zamanda fantastik çevik hərəkətləri ilə azarkeşlərin qəlbini ovsunlamaqda davam edirlər. Milli Gimnastika Arenasındakı ab-hava yarış iştirakçılarından olan italiyalı gimnast Milena Baldassarrinin təbirincə desək, Venesiyadakı kino festivalını xatırladır.
İtaliya təmsilçisi açıqlamasında yarışın keçirildiyi arenanın tərtibatının da çox gözəl olduğunu, qırmızı rəngin idmançılara xüsusi enerji ötürdüyünü vurğulayır. Bakını çox sevdiyini deyən idmançı dəfələrlə Milli Gimnastika Arenasında yüksək səviyyədə təşkil olunan turnirlərdə iştirak etdiyini bildirir.
Dünya çempionu sonuncu dünya kuboku yarışlarında zədə aldığına görə məşqçisi ilə məsləhətləşərək Avropa çempionatında yalnız bir alət - lentlə çıxış etməyə qərar verib.
Almaniyadan ölkəmizə gələn tanınmış gimnast Darya Varfolomeyevin anası Tatyana Varfolomeyeva tamaşaçı kimi oyunları izləməkdən zövq aldığını deyir. Gimnastika arenasının zalının çox gözəl olduğunu, xalçanın yaxşı işıqlandırıldığını qeyd etməklə yanaşı, tamaşaçı tribunalarından çıxışlara baxmağın rahat olduğunu da vurğulayır. Bakıya ilk dəfə gəldiyini deyən T.Varfolomeyeva bələdçinin müşayiəti ilə İçərişəhərə ekskursiya etdiklərini, çoxlu tarixi yerlərlə tanışlığın onda xoş təəssürat oyatdığını söyləyir. Əlavə edir ki, yenidən Bakıya səfər etmək imkanı olsa, bunu məmnuniyyətlə edəcək.
Portuqaliyanın bədii gimnastika üzrə yığmasının baş məşqçisi Darina Vasilyeva Azərbaycanda olmaqdan böyük məmnuniyyət duyduqlarını, paytaxtımızda yarışların həmişə yüksək səviyyədə təşkil edildiyini deyib.
“Heç də bütün ölkələrdə gimnastlar üçün Azərbaycanda olduğu kimi şərait yaradılmır”, - deyə Darina Vasilyeva əlavə edib. Portuqaliya yığmasının baş məşqçisi azərbaycanlı gimnastların hazırlıq səviyyəsini yüksək qiymətləndirib.
Qitə çempionatının dördüncü günündə gimnastlarımız çoxnövçülük üzrə finallarda mübarizə aparıblar.
Qrup hərəkətlərində 65.400 xal (iki hərəkətlər üzrə nəticələrin cəmi - beş halqa, həmçinin üç lent və iki top) toplayan Azərbaycanın böyüklərdən ibarət yığma komandası çoxnövçülükdə bürünc medal qazanıb.
Bolqarıstanın böyüklərdən ibarət komandası qızıl medala layiq görülüb, iki proqramın icrasına görə hakimlər ona 68,050 xal veriblər.
İki hərəkət proqramı üzrə 67.300 xalı olan İsrailin böyüklərdən ibarət komandası gümüş medal qazanıb.
Xatırladaq ki, Azərbaycan yığmasının heyətində Güllü Ağalarzadə, Ləman Əlimuradova, Kamilla Əliyeva, Zeynəb Hümmətova, Elizaveta Luzan və Daria Sorokina yer alıb.
Azərbaycan gimnastı Zöhrə Ağamirova 122,400 xalla çoxnövçülük yarışlarında yeddinci olub.
Bolqarıstan təmsilçisi Boryana Kaleyn dörd alət üzrə hərəkətlərin cəmində 131 xal toplayaraq qızıl medal qazanıb. İtaliya gimnastı Sofia Raffaeli 129,550 xalla yarışı ikinci, digər Bolqarıstan idmançısı Stiliana Nikolova isə 129,500 xalla üçüncü pillədə başa vurublar.
Yarışda “Shooting Star” mükafatı təqdim olunub. “SmartScoring” şirkəti tərəfindən xüsusi hazırlanan mükafat macarıstanlı gimnast Fanni Piqniçkiyə verilib.
Azərbaycanın Gövhər İbrahimova, Səkinəxanım İsmayılzadə, Mədinə Aslanova, İlahə Bahadırova, Ayan Sadıqova və Zəhra Cəfərovadan ibarət gənclər komandası isə qrup hərəkətlərində çoxnövçülük və beş topla proqramda iki bürünc medal qazanıb.
Qitə çempionatında 38 ölkədən 315 gimnast (böyüklər – 191, gənclər 124) mübarizə aparır.
Leyla QURBANOVA, “Xalq qəzeti”