Avropa Yenidənqurma və İnkişaf Bankının (AYİB) “Regional iqtisadi perspektivlər” hesabatında son iki il ərzində respublikamızda güclü iqtisadi artıma nail olunduğu bildirilir və 2022-ci ildə istehsalın həcminin 4,6 faiz artdığı, qeyri-neft-qaz sektorunda isə artımın 9 faizə çatdığı vurğulanır. Hesabatda, həmçinin ÜDM-in 2023-cü ildə 2,5 faiz, 2024-cü ildə isə 2,7 faiz artacağı proqnozlaşdırılır.
Xatırladaq ki, bütün bu proqnoz göstəriciləri ölkə iqtisadiyyatının inkişaf dinamikasını ifadə edir. Keçən il ərzində ÜDM-in 2021-ci ilə nisbətən 4,6 faiz artaraq 133 milyard 825,8 milyon manat, qeyri-neft-qaz sektorunda isə 9,1 faiz artaraq 69 milyard 826 milyon manat təşkil etməsi də bunun bariz ifadəsidir.
Yeri gəlmişkən, Dünya Bankının cari il üçün “Qlobal iqtisadi perspektivlər” adlı hesabatında ölkəmiz üzrə verilən proqnozlarda real ÜDM-in artım tempi müsbət olaraq saxlanılır. Cari il ərzində isə Azərbaycan iqtisadiyyatında artımın dünya ölkələri ilə müqayisədə 1,1 faiz, ECA regionu ilə müqayisədə isə 2,7 faiz daha yüksək olacağı proqnozlaşdırılır. Bu inkişaf tempi artıq Azərbaycanın orta yüksəkgəlirli statuslu ölkələr sırasında olacağını və milli iqtisadi strategiyasını öz gücü və imkanları hesabına reallaşdırılacağını deməyə əsas verir.
Dövlət Statistika Komitəsinin məlumatlarına əsasən, ölkənin ÜDM-i 2023-cü ilin yanvar-aprel aylarında 2022-ci ilin analoji dövrü ilə müqayisədə 0,1 faiz artaraq 39,986 milyard manata çatıb. Komitənin məlumatına görə, bu ilin hesabat dövründə 2022-ci ilin analoji dövrü ilə müqayisədə qeyri-neft sektorunda əlavə dəyər 3,1 faiz, neft-qaz sektorunda isə 2,9 faiz artıb.
Yeri gəlmişkən, Prezident İlham Əliyev ümummilli lider Heydər Əliyevin 100 illik yubileyi münasibətilə xalqımıza müraciətində ötən 20 ildə ölkənin sürətli tərəqqisindən danışarkən bu müddətdə Azərbaycan qədər sürətlə inkişaf edən ikinci dövlətin olmadığını, iqtisadiyyatın 3 dəfədən çox artdığını xüsusi vurğulayıb. Ölkə rəhbəri daha sonra valyuta ehtiyatlarının 65 milyard dollara çatdığını, bu rəqəmin isə 2003-cü illə müqayisədə 41 dəfə çox olduğunu və nəhayət, həmin göstəricinin xarici borcu təxminən 10 dəfə üstələdiyini söyləyib.
Bu məqamda qeyd edək ki, hazırda respublikamızın xarici dövlət borcu dünyada ən aşağı səviyyədədir. Bu göstəriciyə görə Azərbaycan dünyada 9-cu yerdədir. Neft ixrac edən dövlətlər arasında ən az xarici dövlət borcu olan Azərbaycandır.
Beləliklə:
– son 20 il ərzində ölkə üzrə ÜDM-in nominal həcmi 22 dəfə artaraq 133,8 milyard manata çatıb;
– həmin dövrdə əhalinin gəlirləri 13,7 dəfə artıb. Bu müddətdə respublika iqtisadiyyatına 260 milyard dollardan çox sərmayə yatırılıb;
– Azərbaycan “Dayanıqlı İnkişaf Hədəfləri İndeksi”nə görə 166 ölkə arasında 54-cü pillədə qərarlaşıb, yoxsulluq 49 faizdən 5 faizə enib;
– ölkə iqtisadiyyatı hazırda alıcılıq qabiliyyətinə görə Cənubi Qafqaz regionunun ümumi iqtisadiyyatının 70 faizini təşkil edir;
– iqtisadiyyata qoyulan investisiyalar dörd dəfə artıb;
– başlanğıcda 270 milyon dollara malik olan Dövlət Neft Fondunun hesabı indi 50 milyarda dollara yüksəlib. Azərbaycan gəlirlərin ədalətli bölgüsünün səviyyəsinə görə dünya üzrə ən yüksək pillələrdə qərarlaşıb.
Azərbaycan iqtisadiyyatını şərtləndirən amillər sırasında neft-qaz sektorunda əldə edilən uğurlar mühüm önəm daşıyır. Qeyd edək ki, hazırda respublikamız TANAP və TAP vasitəsilə Avropaya qaz ixrac edir, Bakı–Tbilisi–Ceyhan neft, Bakı–Tbilisi–Ərzurum qaz kəmərləri, Cənub Qaz Dəhlizi, Bakı–Tbilisi–Qars dəmir yolu kimi beynəlxalq iqtisadi layihələrin müəllifidir və bu gerçəkləşən təşəbbüslər sayəsində büdcəmizə valyuta axınını təmin edir.
Gələcəkdə Zəngəzur dəhlizinin işə salınması isə Naxçıvan ilə Azərbaycanın digər regionlarının, eləcə də Türkiyə ilə Orta Asiya respublikalarının nəqliyyat baxımından birləşməsini təmin etməklə yanaşı, ölkəmizə həm iqtisadi, həm də siyasi dividend cəhətdən böyük uğur qazandıracaq. Milyardlarla dollar həcmində ticarət dövriyyəsi məhz bu dəhlizlə reallaşacaq ki, bu da ölkəmizə əlavə valyuta axınını gerçəkləşdirəcək.
Sonda onu da qeyd edək ki, bu gün Qarabağ və Şərqi Zəngəzurda genişmiqyaslı bərpa-quruculuq layihələri həyata keçirilir. Düşməndən təmizlənən bu ərazilərdə heç bir beynəlxalq kredit təşkilatının yardımı olmadan erməni faşizmi tərəfindən vandalizmə məruz qalan yaşayış məntəqələri öz gücümüzlə bərpa edilir, alternativ enerji istehsalı üçün stansiyalar yaradılır, yollar salınır, infrastruktur layihələri həyata keçirilir. Ümumilikdə, Azərbaycan bugünədək Qarabağın bərpasına 9 milyard manata yaxın vəsait sərf edib.
Mirağa ƏHMƏDOV,
iqtisadçı-ekspert
Son 20 il ərzində ölkəmiz sürətli inkişaf yolu keçib, sosial-iqtisadi sahələrdə müsbət göstəricilər əldə edilib. Lakin bununla kifayətlənilməməli, yüksəkgəlirli dövlətlər qrupuna daxil olmaq üçün uzunmüddətli dövrdə iqtisadiyyat sürətli və davamlı artmalıdır. Dünyada 13 ölkənin iqtisadiyyatı 25 il ərzində hər il orta hesabla 7 faizi üstələyən artım nümayiş etdirib. Bu dövlətlərdə iqtisadiyyatlar sürətli, dayanıqlı və inklüziv şəkildə artaraq yüksəkgəlirli ölkələrlə məsafənin azalmasına nail olunub. Hazırda milli iqtisadiyyatımız yüksəkgəlirli ölkələr sırasına daxil olmağı hədəfləyir. Bunun üçün dayanıqlıq və inklüzivlik keyfiyyətlərini özündə cəmləyən yeni iqtisadi artım olmalıdır. Bu isə hər bir vətəndaşımızın gəlirlərinin davamlı artması üçün zəmin yarada bilər.
Azərbaycanda hazırda iqtisadi artımın dayanıqlı olması üçün kənd və şəhərlər arasında inkişaf balansı gözlənilir. Kəndlərdə də şəhərlərdəki kimi, müasir sosial-iqtisadi infrastrukturun vacib elementləri olan təhsil ocaqları, tibb müəssisələri, mədəniyyət evləri, mühüm kommunal və inkişaf xidmətləri rəqəmsal texnologiyalar əsasında yaradılır. Bütün bunlar şəhər və kənd yerləri arasında həyat standartlarında fərqi əhəmiyyətli dərəcədə azaldır. Kəndlərin planlanması və əhalinin məskunlaşması zamanı regionun iqtisadi dəyər zəncirində mövcud və potensial rolu nəzərə alınır.
Qloballaşma proseslərinin sürətlənməsi və maliyyə böhranlarının başvermə tezliyinin artması makroiqtisadi və maliyyə sabitliyinin təmin olunmasına diqqəti artırır. Makroiqtisadi sabitlik və dayanıqlıq uzunmüddətli dövrdə davamlı iqtisadi artımın başlıca şərtləridir. Aşağı və sabit inflyasiya, dayanıqlı məzənnə, habelə maliyyə sektorunun bütün seqmentlərinin sabitliyi daxili və xarici investisiya fəallığını şərtləndirir.
Qlobal birbaşa investisiyaların cəlbi üzrə rəqabət kəskinləşir. Bu investisiyalar sağlam və şəffaf biznes mühitinin mövcudluğunu, makroiqtisadi və maliyyə sabitliyi tələb edir. Qeyd olunan şərtlər mövcud olmadığı halda, ölkəyə yüksək texnologiya və bilik gətirən birbaşa xarici investisiyaların axınına maneə yarana bilər. Təcrübə göstərir ki, sürətli inkişafın əsas drayveri olan birbaşa xarici investisiyalar ölkədə dayanıqlı yeni iş yerləri yaratmaqla yanaşı, yüksəkkeyfiyyətli insan kapitalı formalaşdıra bilər.
Vaqif BAYRAMOV, “Xalq qəzeti”