“Araz Vadisi İqtisadi Zonası”nın dövlət başçısının 2021-ci ilin 4 oktyabr tarixli fərmanı ilə 200 hektarlıq ərazidə qurulmasına başlanılıb. Artıq bu sənaye parkında xeyli iş görülüb.

İqtisadi Zonaların İnkişafı Agentliyi (İZİA) İdarə Heyətinin sədr müavini Elki­yar Ziyadovun sözlərinə görə, qurumun tabe müəssisələrində indiyədək çalışa­caq işçilər üçün şəhərcikdə 60 nəfər­lik yataqxana, 36 nəfərlik yeməkxana, ofis, tibb məntəqəsi, 630 kv-luq trans­formator quraşdırılıb, əraziyə asfalt yol çəkilib, abadlıq işləri görülüb. Bundan başqa, inzibati binanın tikintisi və parkın ərazisində dəmir yolunun layihələndiril­məsi işlərinə başlanılıb. 

“Araz Vadisi İqtisadi Zonası” səna­ye parkının logistik imkanlar baxımın­dan əlverişli ərazidə təşkil olunması investorların diqqətini cəlb edən əsas məqamlardan biridir. Belə ki, sənaye parkı yeni salınan magistral avtomobil və dəmir yollarının üzərində yerləşir ki, bu da ərazidən həmin yollara birbaşa giriş-çıxışı reallaşdırmaqla parkın əhə­miyyətini artırır. 

Sənaye parkına 32,7 milyon manat investisiya yatırılacağı, 420-dən çox da­imi iş yeri yaradılacağı nəzərdə tutulub. Artıq 5 sahibkarlıq subyekti parkın rezi­denti statusunu əldə edib, 1 sahibkarlıq subyekti isə qeyri-rezident kimi qeydiy­yata alınıb. Ümumi investisiya həcmi 10,2 milyon manat olan müəssisənin inşasına 5,6 milyon manatdan çox in­vestisiya yatırılıb. 

İqtisadiyyat naziri Mikayıl Cabbarov “Tviter” səhifəsində parkda investisiya dəyəri 7,3 milyon manatdan çox ola­caq minatəmizləyən, xüsusi təyinatlı texnika və metal məmulatların istehsa­lı müəssisəsinin də tezliklə fəaliyyətə başlayacağını, burada 124 nəfərin işlə təmin ediləcəyini vurğulayıb. O, belə bir zavodun yaradılması ilə işğaldan azad edilən ərazilərin minalardan təmizlən­məsi prosesinə əhəmiyyətli töhfə verilə­cəyini və bununla da insanların doğma yurd-yuvalarına qayıdışının sürətlənə­cəyini bildirib. 

Yeri gəlmişkən, xatırladaq ki, bu il mayın 4-də Prezidenti İlham Əliyev Cəbrayıl rayonunda “Araz Vadisi İqti­sadi Zonası” Sənaye Parkında “Avto Lizinq Azərbaycan” MMC-nin tikintisi ilə tanış olub, “Holcim Azərbaycan” ASC-nin, “Az-Tex-Import” MMC-nin, “Impro­tex Qarabağ Sənaye Kompleksi” MMC-nin müəssisələrinin təməllərini qoyub.

Mərasimdə dövlətimizin başçısına verilən məlumatda Rusiya və Azərbay­can birgə müəssisəsi olan “Avto Lizinq Azərbaycan” MMC tərəfindən sənaye parkının 3 hektar ərazisində yük avto­mobilləri və kənd təsərrüfatı texnikala­rına texniki servis xidmətlərinin göstəril­məsi mərkəzinin yaradılacağı və onun 2023-cü ildə fəaliyyətə başlayacağının nəzərdə tutulduğu qeyd edilib. 

Bundan savayı, sənaye parkının 5 hektar ərazisində “Holcim Azərbaycan” ASC tərəfindən müasir texnologiyalar əsasında əmtəə beton və quru yapış­dırıcı istehsalı üzrə zavod da inşa olu­nacaq. Bununla bərabər, sement satışı üçün terminal da qurulacaq. Ümumi in­vestisiya dəyəri 3,74 milyon manat olan müəssisədə Avropanın qabaqcıl texno­logiyalarından istifadə ediləcək. Layihə­nin həyata keçirilməsi ilə 25 nəfər daimi işlə təmin olunacaq. 

Prezident İlham Əliyev təməlqoy­ma mərasimində deyib: “Mən həmişə deyirəm, çalışmaq lazımdır ki, burada daha çox yerli insanlar işə cəlb edilsin­lər. Mənim nümayəndəmlə, nazirliklə də sıx təmasda olmaq lazımdır. Birinci mərhələdə təbii ki, sizin təcrübə topla­mış işçilər çalışacaq, amma bir neçə ildən sonra onları yetişdirilmiş sırf yerli kadrlar əvəz etməlidir.

“Holcim”in buraya gəlməsinin ta­rixçəsini mən yaxşı bilirəm. Yadımda­dır, Davosda “Holcim”in ovaxtkı rəhbəri mənə yaxınlaşaraq belə bir təklif irəli sürdü. Mən də dərhal razılıq verdim və qısa müddət ərzində o zavod inşa edil­di. Ondan sonra Azərbaycanda sement istehsalına maraq artdı. O vaxta qədər biz sementi idxal edirdik. İndi rəqabət də var, o da çox yaxşıdır. Amma “Hol­cim” hər halda öz keyfiyyət markasını saxlayır”.

Sonda qeyd edək ki, Vətən müha­ribəsində ölkəmizin əldə etdiyi parlaq qələbə işğaldan azad edilən torpaq­ların ölkə iqtisadiyyatına reinteqrasiya­sı, regionda mövcud yeni reallıqlar və əməkdaşlıq imkanları, beynəlxalq və regional nəqliyyat-logistika dəhlizlərinin kəsişməsində yerləşən Azərbaycanın sürətli inkişafı üçün əlavə stimul yaradır. İqtisadi resurslar, təbii ehtiyatlar, enerji mənbələr, yeraltı metal filizi yataqla­rı, termal sular, tikinti materialları üçün xammal bazası, nəqliyyat-tranzit, turizm imkanları və s. düşməndən təmizlənən torpaqların cəlbediciliyini artırır. “Araz Vadisi İqtisadi Zonası”nın təşkil olunma­sına investorların böyük maraq göstər­mələri də bunun bariz ifadəsidir. 

Nihat QORQUD ƏLİYEV,
iqtisadçı-ekspert

Şərqi Zəngəzur iqtisadi rayo­nunun Arazboyu ərazisinin əsasən düzənlik relyefə və bölgənin cənub istiqamətində giriş qapısı mövqeyinə malik olması “Araz Vadisi İqtisadi Zo­nası” Sənaye Parkının fəaliyyəti üçün əlverişli şəraiti təmin edir. Logistik im­kanlar baxımından əlverişli ərazidə təşkil olunması investorların diqqətini cəlb edən əsas məqamlardan biridir. Belə ki, sənaye parkı yeni salınan magistral avtomobil yolu və dəmir yol­larının üzərində yerləşir ki, bu da əra­zidən həmin magistral yollara birbaşa giriş-çıxışı təmin edir. Bu avtomobil və dəmir yolları Zəngəzur dəhlizi vasitə­silə Azərbaycandan Türkiyəyə və qar­daş ölkədən respublikamıza, eləcə də Azərbaycan ərazisindən Rusiyaya yüklərin daşınması üçün yeni əlverişli imkanlar yaradır. 

Bu gün “Araz Vadisi İqtisadi Zo­nası”na sahibkarlar tərəfindən böyük maraq göstərilir. Sənaye parkı 200 hektar ərazini əhatə edir. Zonanın prioritet istiqamətləri kimi, logistika və ticarət mərkəzi, anbar kompleksləri, topdan və pərakəndə satış obyekt­ləri, TIR parkı, gömrük, yanacaqdol­durma, avtomobil və digər texnikala­rın təmiri məntəqələrinin və s. təşkili nəzərdə tutulur. 

“Araz Vadisi İqtisadi Zonası”nda sahibkarlar üçün əlverişli investisi­ya mühiti formalaşdırılır, hər bir iş adamı dövlət vəsaiti hesabına hazır infrastrukturla (qaz, işıq, su, kanaliza­siya, daxili avtomobil və dəmir yolları, fiber-optik və s.) təmin olunur. Cari il yanvarın 1-dən etibarən Vergi Mə­cəlləsinə edilən dəyişikliyə əsasən, işğaldan azad olunmuş ərazilərdə fəaliyyət göstərəcək sahibkarlar üçün əlavə güzəştlər tətbiq edilir. Buraya sosial sığorta haqlarının subsidiya­laşdırılması, işğaldan azad edilmiş ərazilərdə məskunlaşaraq işləyən mütəxəssislərə güzəştlər də daxildir.

Vaqif BAYRAMOV, “Xalq qəzeti”