Fransa prezidenti Emmanuel Makronun təxribatları Şimali Atlantika Blokuna daxil olan ölkələr arasında əməlli-başlı parçalanmaya səbəb olub. Belə ki, bu ilin fevralında Makron Rusiya–Ukrayna silahlı münaqişəsində Qərbin bütün strategiyasının yenidən nəzərdən keçirilməsinə gətirib çıxaracaq Paris sammitinə yol açmaq üçün ABŞ prezidenti Co Bayden və Almaniya kansleri Olaf Şoltsla konfidensial danışıqlar aparıb. Makron həmsöhbətlərinə bildirib ki, Qərb müttəfiqləri Rusiya ilə bağlı “strateji qeyri-müəyyənlik” mövqeyini tutmalıdırlar, heç bir variantı, o cümlədən hərbi variantları istisna etməməlidirlər.
Bu, münaqişənin başlanğıcından bəri Bayden administrasiyasının tutduğu mövqedən radikal dönüş demək idi. Vaşinqtonun balanslaşdırılmış və sınanılmış yanaşması var. O, Moskvanı təxribata çəkə biləcək və hərbi əməliyyatların genişlənməsinə səbəb ola biləcək hərəkətlərdən qaçır. Makron isə əksinə, Qərbin qarşısında qoyulan “qırmızı xətlər” adlanan sərhədləri ilə bağlı konkretlikdən imtina etmək və Kremli fərziyyələr və ehtimallar qurmağa məcbur etmək istəyirdi.
Bayden münaqişənin genişlənməsindən ehtiyat edərək, strategiyanın dəyişdirilməsinin zəruriliyini şübhə altına aldı. Şolts da həmçinin Makronun ideyasına qarşı çıxdı və bildirdi ki, bu müttəfiqlərin parçalanmasına səbəb olacaq və NATO-nu münaqişə tərəfinə çevirəcək.
Fevral sammiti keçiriləndə, Fransa lideri Şolts və Ağ evin görüşə göndərdiyi dövlət katibinin Avropa və Avrasiya məsələləri üzrə köməkçisi Ceyms O'Brayen kimi digər rəsmilərdən yeni yanaşmaya etirazlar eşitdi. Lakin tədbirin sonunda keçirilən mətbuat konfransında Makron hərbi variantların, hətta NATO ölkələrindən qoşun göndərilməsinin də istisna edilməməsi lazım olduğunu söyləməklə müttəfiqlərini heyrətə saldı.
“The Wall Street Journal” nəşrinin müxbiri Fransa prezidentinin bu addımını özünəməxsus şəkildə belə şərh edir: “Makron özünün nümayişkaranə itaətsizliyi ilə münaqişənin başlanğıcında olduğu göyərçindən, aparıcı qırğıya çevrilməsini tamamladı. Bundan əvvəl Fransa prezidenti Rusiya lideri Vladimir Putinlə dialoqun tərəfdarı kimi çıxış edir və xəbərdarlıq edirdi ki, müttəfiqlər “Rusiyanı alçaltmasınlar”.
Politoloqlar qeyd edirlər ki, Makronun fikrincə, Ukraynadakı silahlı münaqişə Amerikanın təhlükəsizlik zəmanətlərinin etibarlılığının şübhə doğurduğu bir dünyada Avropanın necə yaşaya biləcəyini göstərən lakmus kağızıdır. Fransa liderini artıq uzun müddətdir narahat edən əsas məsələ, guya Avropa ölkələri hərbi potensiallarını gücləndirməkdən imtina edəcəkləri təqdirdə, ABŞ və Çin kimi fövqəlgüclərin itaətkar vassalı olmaq riskini artırırlar. Müttəfiqlər tez-tez Makronun bu mövqe ilə özünü İkinci Dünya müharibəsindən sonra Fransaya rəhbərlik edən və əfsanəvi müstəqil ruha malik olan Şarl de Qolla bənzətmək cəhdini ələ salırlar.
Amma məsələ heç də Fransanın Ukraynaya və özünün Avropa tərəfdaşlarına ürək yandırmasında, onların taleyi üçün narahat olmasında deyil. Əsas məsələ Rusiyanın Fransanı Afrikadakı koloniyalarından məhrum etməsində əsas rol oynamasında və bununla da Makronun prezidenti olduğu dövlətin iqtisadi-siyasi elitasının illərlə soyub-taladığı ölkələrin əldən çıxmasındadır. Fransa indi əksər Avropa ölkələri ilə müqayisədə daha çətin iqtisadi durumdadır. “Daily Telegraph” nəşri yazır ki, Fransanın zəifləyən iqtisadiyyatı bütün avrozonanı çökdürmək təhlükəsi yaradır.
Ölkənin büdcə kəsirinə diqqət yetirmək kifayətdir ki, prezident Makronun ölkə iqtisadiyyatının transformasiyası ilə bağlı irimiqyaslı layihəsinin iflasa uğradığı bəlli olsun. Üstəlik, Paris borcunu artırmağa davam edir və bununla da Avropada maliyyə böhranı ehtimalını artırır. Makronun iqtisadiyyat sahəsindəki ambisiyalı layihələri kağız üzərində heyrətamiz görünsə də, gerçəkdə tam iflasa uğradı.
Fransanın 2023-cü ildə büdcə kəsiri ÜDM-in 5,5 faizini təşkil edib. Pandemiyadan sonrakı bərpaya, pensiya islahatlarının həyata keçirilməsinə və enerji sahəsinə subsidiyaların azaldılmasına baxmayaraq, ölkə balanslaşdırılmış nəticəyə hələ də yaxınlaşmayıb. BVF-nin proqnozlarına görə, Fransa iqtisadiyyatı bu il cəmi 0,9 faiz artacaq. Eyni zamanda, dövlət xərclərinin səviyyəsi davamlı şəkildə yüksək olaraq qalır. Üstəlik, Makronun müdafiəyə daha çox pul xərcləmək və doğum nisbətini artırmaq planlarını nəzərə alsaq, xərclərin daha da böyüməsi ehtimal olunur.
Paris nəinki vergiləri qaldırır, öz vətəndaşlarının sıxıb suyunu çıxarır, həm də dünyanın qalan hissəsindən aktiv şəkildə borc alır. Artan borclar isə gec-tez qlobal investorları Fransa hökumətinin fiskal strategiyasının dayanıqlı olmadığına inandıra bilər.
Bütün bunların bir kökü də məhz Fransanın Afrikada böyük gəlirlər gətirən koloniyalarından sürətlə məhrum olmasındadır. “Redakted” “YouTube” kanalının aparıcısı, tanınmış amerikalı jurnalist Kleyton Moris bunu öz şərhlərində obyektiv şəkildə belə qiymətləndirir: “Yoxsullaşan Fransa planeti Üçüncü Dünya müharibəsinə sürükləyir”.
Moris yazır: “Fransanın rifahı Afrika resurslarının “talanmasından” asılıdır və indi keçmiş müstəmləkələr Parisin əlaltılarına qarşı üsyan ediblər. Makron Afrikada Rusiyanın müqaviməti ilə qarşılaşıb və bu səbəbdən o, Moskvaya israrla Ukraynaya qoşun göndərməklə hədə-qorxu gəlir.
“Biz müharibə vəziyyətindəyik və təbii ki, bu, ən bariz şəkildə Qırmızı dənizdə - Rusiya ilə Fransa arasında özünü göstərir. Rusiya Fransanı hədələyir: “Əgər siz planlaşdırdığınız kimi Ukraynaya qoşun göndərsəniz, bu, Fransaya ölüm və dağıntı gətirəcək”. Bu onların sözləridir, mənim deyil”, – deyə jurnalist Makronun hiyləgər maskasını yırtır və onun siyasi demarşının əsl məramlarını üzə çıxarır.
Həqiqət isə ondan ibarətdir ki, bu həftə Rusiya ilk dəfə olaraq Qırmızı dənizə bir neçə iri hərbi gəmi göndərib. Bu, Fransaya və onun prezidenti Makrona birbaşa cavabdır.
Gəlin Qərbin siyasi hakimiyyətinin təzyiqi altında olan medianın işqılandırmadığı Afrikaya və onun tarixinə baxaq. Afrika bir çox nəsillər boyu Fransanın mülkiyyəti olub. Rəsmi Paris uzun onillər Afrika ölkələrinin zəngin təbii sərvətlərini istismar edirdi. Fransanın müasir fövqəldövlət kimi mövcudluğu o zaman mümkündür ki, Afrikada uran, litium, qızıl, gümüş, qalay və qitənin digər qiymətli mineral ehtiyatlarını talaya bilsin. Əgər o, bu sərvətləri talaya bilmirsə, başını itirir, siyasi şizofreniya baş qaldırır.
Reallıq ondan ibarətdir ki, Fransa urandan dünyanın hər hansı digər ölkəsindən daha çox asılıdır, çünki bu, atom elektrik stansiyalarının yaganə yanacağıdır. Fransanın elektrik enerjisinin demək olar ki, 70 faizi atom elektrik stansiyaları tərəfindən istehsal olunur və bu AES-lərin bütün uranı Afrikanın Niger əyalətindən oğurlanıb. Artıq bir neçə il əvvəl kolonial rejimin ilk çatları üzə çıxmağa başladı: keçmiş Fransa koloniyalarında çevrilişlər oldu. Bu yaxınlarda Niger, Konqo və başqaları qəti şəkildə dedilər: “Biz Fransadan, ölkəmizi zorlamaq və Fransaya ucuz qiymətə minerallar göndərmək üçün qurduğunuz oyuncaq hökumətlərdən bezmişik. Ölkələrimizdən çıxın, mineral ehtiyatlarımızı bizə verin”.
Keçən il kolonial rejimdən bezən Afrika ölkələri demişdilər: “Fransanın uranımızı talamasını dayandırmaq üçün bizə hərbi yardım lazımdır”. Onlar əvvəllər Rusiya sahibkarı Priqojinin komandanlığı altında olan, “ÇVK Vaqner” kimi tanınan (Xüsusi Hərbi Kompaniya) Rusiyanın özəl hərbi şirkətini ödənişlə bu işə cəlb etdilər. Priqojin, əlbəttə ki, artıq ölüb. Amma “Vaqner”in minlərlə döyüşçüsü indi də Afrikada – Saheldəki Fransız qoşunlarına birbaşa əks mövqedədirlər və onun kaloniyalarının yeni hökümətlərini təxribat və terrorlardan, hərbi çevrilişlərdən müdafiə edirlər.
Doğrudur, Fransa bəyan edir ki, onlar “sərvətləri talamaq üçün deyil, sadəcə olaraq terrorçuları dayandırmaq üçün buradadırlar!” Niger isə deyir: “Xeyr, bu, doğru deyil, siz bizim resurslarımızı talamaq və oyuncaq hökumət qurmaq üçün buradasınız. Terrorçu dediyiniz adamlar isə ölkəmizi qanunsuz işğal etməyin əleyhinədirlər”.
Bu günlərdə "Fransanın keçmiş müstəmləkə hakimiyyətindən ayrılacağını" vəd edən namizəd Bassiru Diomau Fay Seneqalın yeni prezidenti seçildi. Seçkilər zamanı Fay ölkənin valyuta məzənnəsinin avroya bağlanması məsələsini öyrənəcəyini, Avropa firmaları ilə balıq istehsalı müqavilələrini, həmçinin Seneqalın ərazi sularında qaz hasilatı üzrə Aİ ilə müqavilələrə yenidən baxacağını vəd edib.
Fransız və afrikalı şərhçilər Fayın seçilməsinin “frankofoniyaya növbəti ölüm zərbəsi” olduğunu gizlətmirlər. Üstəlik, bu dəfə anti-Fransa əhvali-ruhiyyəsi hərbi iğtişaşçılar tərəfindən deyil, demokratik yolla seçilmiş prezident tərəfindən nümayiş etdirilir. Bassiru Diomau Fay vurğulayır ki, o, Aİ və Fransa ilə "yeni tələbləri olan, münasibətlərdə daha çox bərabərlik və hörmət tələb edən" Afrika siyasətçilərinin yeni nəslini təmsil edir və əgər Paris bunu başa düşməsə, digər tərəfdaşların xeyrinə Afrikadan məcburi şəkildə çıxarılacaq. “Neue Zürcher Zeitung” qeyd edir ki, Fay “təhlükəsizlik sahəsində Rusiya ilə əməkdaşlığı istisna etmədiyini” bildirib.
Son 3 ildə Sudan, Çad, Burkina-Faso, Qvineya, Nigerdə baş verən inqilabların hamısı fransız müstəmləkəçiliyinin buxovlarını qırıb-atmaq istəyir. Bu region indi od içindədir və Fransa hər şeyini itirmək üzrədir. Paris elə ona görə də özünü çox çılğın və qəzəbli aparır. Məhz bu üzdən son bir neçə həftə ərzində Makron Rusiyanı belə qəzəbli şəkildə təhdid edir, Fransa qoşunlarını Ukraynaya göndərməklə hədələyir.
“Redakted”in jurnalisti Kleyton Moris hadisələrin hansı sonluqla başa çatacağını da açıb göstərir: “Əgər Makron bu addımı atarsa, Rusiya prezidenti Putin Fransaya vəd etdiyi ölüm və dağıntını yaşatmaqdan zərrə qədər də çəkinməyəcək”. Fransa, həqiqətən, itirdiklərindən o qədər qəzəblidir ki, bütün dünyanı müharibə alovuna bürüməkdən belə çəkinmir.
Kleyton çıxışının sonunda ABŞ-a da üz tutur və deyir: “Yeri gəlmişkən, bunun Baltimordakı körpüyə kiberhücumla bitəcəyini düşünürsünüz? Yox. Bu, ABŞ-a xəbərdarlıqdır: “Siz indicə Moskvada terror aktının həyata keçirilməsinə kömək etdiniz...Əgər buna mane olmasaq, xaos yaranacaq”.
2007-2010-cu illərdə Nikola Sarkozinin dövründə Fransanın müdafiə naziri postunu tutan Herve Morin prezident Makronun hərəkətlərindən hiddətə gəldiyini bildirib. O, respublika prezidentini təkəbbürdə ittiham edib və nüvə dövləti olan Rusiyaya qarşı təxribatların Fransanın təhlükəsizliyini riskə atdığını deyib: “Niyə Aİ və NATO tərəfdaşlarımızı özümüzdən uzaqlaşdırmalıyıq, taktiki və strateji silahlara malik nüvə dövləti olan Rusiyaya meydan oxumalıyıq? – deyə Morin hiddətlə sual verir. Onun sözlərinə görə, Emmanuel Makron Avropa qoşunlarının Ukraynaya göndərilməsinin mümkünlüyü barədə danışanda özünü “uşaq kral” kimi aparıb və təkəbbürünü gizlədə bilməyib. Sanki bu “uşaq krala” “yeddi il ərzində saray əyanları ilə qaladan çıxmağa icazə verilməyib”. Fransa prezidenti Kremllə oyununda həddən artıq çoxlu kartlar üzə çıxarıb və bununla da “strateji qeyri-müəyyənlik” hərbi konsepsiyanı sarsıdıb”, – deyə Morin bildirib.
Makron, həqiqətən, özünün son addımları ilə “balaca şahzadə”yə daha çox bənzəyir, həm də daha çox qiymətli oyuncaqlarını itirən “prins”ə. Onun bu itkilərdən sonrakı qəzəb, hiddət və təkəbbürü isə yaxşı bir nə vəd etmir. Azərbaycanda gözəl bir zərb-məsələ var: “Sirkə çox tünd olsa, öz qabını çatladar”. Makron da ən yaxşı halda “Parisi partlada bilər”, – başqa heç nəyi.
İlqar RÜSTƏMOV
XQ