Rumıniyanın “AGERPRES” milli xəbər agentliyi Azərbaycanın Rumıniyadakı səfiri Hüseyn Nəcəfovun “Azərbaycan xalqı 28 May – Müstəqillik Gününü qeyd edir” sərlövhəli məqaləsini dərc edib.
Məqalədə Azərbaycanın müsəlman Şərqində ilk demokratik respublika (1918-1920) olduğu vurğulanıb. Qeyd edilib ki, 1918-ci il mayın 28-də Azərbaycan xalqının həyatında misilsiz hadisə baş verib, Şərqdə ilk parlamentli respublika olan Azərbaycan Xalq Cümhuriyyəti qurulub.
Yazıda Cümhuriyyət dövründə parlamentin, milli ordunun və ölkənin xarici siyasəti, Paris Sülh Konfransında Azərbaycanın dünya birliyi tərəfindən de-fakto tanınması, həmin dövrdə demokratiya prinsiplərinə və insanların bərabərliyinə əsaslanan hüquqların təmin edilməsindən də söz açılır.
Məqalədə, həmçinin 1993-cü ildə Heydər Əliyevin rəhbərliyi ilə ölkədə siyasi və iqtisadi sabitliyin bərqərar olunması, Prezident İlham Əliyevin rəhbərliyi ilə ölkədə siyasi, iqtisadi və sosial islahatların davam etdirilərək genişləndiyi də diqqətə çatdırılıb.
Qəzənfər QASIMOV, “Xalq qəzeti”
