Cəmi bir gündən sonra müharibə bitəcəkdi. Qələbə xəbərinə bürünəcəkdi ölkəmiz. Almayacaqdıq daha şəhid xəbərlərini. Oğulsuz qalmayacaqdı analar, atalar. Atasız qalmayacaqdı körpə balalar... Boynu bükülməyəcəkdi qız-gəlinlərin. Amma bu bircə günün içində dünyaya sığmadı nur üzlü şəhidim...

Rabitə rəisi mayor Əlövsət Əli oğlu Məmmədov 1988-ci ildə Goranboy rayo­nunun Muzdurlar kəndində anadan olub. Orta təhsildən sonra Heydər Əliyev adı­na Azərbaycan Ali Hərbi Məktəbinə daxil olub, 2009-cu ildə həmin məktəbi leyte­nant rütbəsi ilə bitirərək bir sıra hərbi his­sələrdə xidmət edib. 2013-cü ildə ailəsi ilə birgə cəbhə bölgəsində yaşamağa yollanıb. Ta şəhid olanadək Ağcabədidə xidmət edib. 2016-cı ilin 4 günlük aprel döyüşlərinin iştirakçısı olub. Azərbaycan dili ilə yanaşı rus, ingilis, alman dillərini də mükəmməl bilirdi Əlövsət.

Sentyabr ayının 27-dən Ermənistan silahlı qüvvələrinin genişmiqyaslı təxri­batına cavab olaraq başlanan Vətən mü­haribəsində mayor Məmmədov torpaqla­rımızın işğaldan azad edilməsi uğrunda döyüşlərə atıldı.

– Əslində, cəbhə zonasına gedən gündən həmişə onu itirmək qorxusu olub içimdə. Çünki asan deyil hər an ölüm ris­ki olan birini sevmək, yolunu gözləmək, – ömür-gün yoldaşı Rahinə xanım deyir bu sözləri. – Qohum olduğumuz üçün bir-birimizi uşaqlıqdan tanımışıq. Mən orta məktəbin son sinfində oxuyanda o artıq hərbi kursant idi. Sonra ailə qurduq. Əgər yenidən dünyaya gəlsəydim, ömrü­nün yarımçıq qalacağını bilsəydim belə, yenə onu seçərdim. O mənim cümlələrə sığdıra bilmədiyim acım və qürur mənbə­yimdir. 

Rahinə xanım Əlövsətdən sonra ya­rımçıq qalan evi tamamlayıb. Bir otaq ayıraraq şəhidin adına-sanına uyğun mu­zey yaradıb. Hər iki oğlunun gələcəkdə hərbçi olmasını, atalarının yolunu davam etdirməsini arzulayır. 

Əlövsətin cəbhə dostu, mayor Tural Quliyevin dedikləri: 

– Biz təkcə döyüş yoldaşı deyil, qar­daş, sirdaş idik. İlk növbədə, bir insan kimi vicdanlı, ləyaqətli oğul idi. Heç bir çətinlik onu qarşısına qoyduğu məqsəd­dən vaz keçirə bilməzdi. Əlövsət tabeçili­yində olan hərbi qulluqçulara daim böyük qardaş münasibəti bəsləyirdi, şəxsi prob­lemlərinə də kömək edirdi. Onun üçün hər şeydən öncə bir zabit kimi üzərinə düşən vəzifələri icra etmək önəmli idi. 

Şəhid olduğu gün həyatımın ən çə­tin günü oldu. Gecə idi. Hərəmiz bir is­tiqamətdə döyüşmüşdük. Yatıb, dincəlib növbəti döyüşə girməmiz üçün 3 saat vaxtımız vardı. Əlövsət zəng elədi, or­dan-burdan danışdıq, zarafatlaşdıq. De­dim, imkan ver, yataq, səhər yenə dö­yüşə girəcəyik. Dedi ki, nə yatmaq, bəlkə son danışığımızdı... Bəlkə şəhid olduq... Düzü, bu sözdən üşəndim.

Həmin gün daha ağır döyüşlər baş­landı. Əlövsət əsgərləri ilə birgə strateji əhəmiyyəti böyük olan bir yüksəklik uğ­runda döyüşə girdi. Onun döyüş ruhu yaradan səs tonu ilə verdiyi komanda əsgərləri daha da ruhlandırırdı, qələbəyə inamı artırırdı. Maksimum səviyyədə şəx­si heyəti qoruyaraq irəliləyirdi. Və döyüş tapşırığı uğurla başa çatdı, yüksəklik gö­türüldü. Amma həmin gün... müharibənin 43-cü günü... Döyüş tapşırıgını yerinə yetirərkən şəhid oldu Əlövsət.

Şəhidliyi ilə yalnız atası Əli kişinin, anası Xalidə xanımın, qardaşı Sübhanın, bacısı Lalənin, ömür-gün dostu Rahinə­nin, oglanları Mətin və Sənanın deyil, bütün Goranboyun, bütün Azərbaycanın doğması, əzizi oldu...

Əlövsət Məmmədov xidmət müddə­tində komandanlığın çoxlu sayda təltif­lərinə layiq görülüb. Azərbaycan Res­publikası Silahlı Qüvvələrinin 95 və 100 illikləri, “Qüsursuz xidmətə görə” 3-cü dərəcəli medallarla təltif olunub. II Qara­bağ müharibəsindəki igidliyi isə ölümün­dən sonra “Vətən uğrunda”, “Xocavəndin azad olunmasına görə” medalları ilə qiy­mətləndirilib. 

Bəli, ölümlə qələbə arasındakı mə­safə cəmi bircə gün oldu. Noyabrın 8-i Zəfər Günündə şəhidlik zirvəsinə ucaldı nur üzlü şəhidim. Uğrunda canını qurban verdiyi üçrəngli Vətən bayrağına sarıla­raq elə Bayraq Günündə, noyabrın 9-da nəhəng bir izdihamla doğulduğu Muzdur­lar kəndində Şəhidlər xiyabanında dəfn edildi.

44 günlük Vətən müharibəsinin 43-cü günündə şəhidlik zirvəsinə ucalan mayor Əlövsət Məmmədov, haqqın ödənməz! Nur içində yat!

Xuraman ABBASOVA,
Goranboy rayonunda çıxan “Mübariz” qəzetinin baş redaktoru