Onun söylədikləri kino lenti kimi gözlərimiz önündən keçir. Özümüzü gerçək döyüş meydanında hiss edirik. Mayor İntiqam Əmirov savaşdan həyəcansız danışa bilmir:
– Döyüş elədir ki, bəzən sənə 200-300 əsgər versələr də, tapşırığı yerinə yetirmək mümkün olmaz. Amma iki-üç nəfər bacarıqlı zabit, rütbəli zabit görəndə elə bilirsən ki, bir briqada köməyinə gəlib. İdarəetmə tam başqa şeydir. Bəzən olurdu ki, döyüşdə əsgərlər panikaya düşür, xaos yaranır. Əsgərin biri oradan çığırır: “qəlpə dəydi”, o biri deyir ki, “yaralandım”. Bir başqası isə qışqırır: “Komandir, düşmən zirehli texnikası gəlir”. Döyüşdə ayağını, qolunu itirən, gözü çıxan, bədəni param-parça olan hərbçi az olmur. Belə bir şəraitdə əsgərləri idarə etmək çox çətinləşir, onları döyüşə kökləmək, yenidən təşkil etmək o qədər də asan olmur. Döyüşü təşkil etmək, nizam-intizam yaratmaq isə çox önəmlidir.
Adi bir diqqətsizlik, qorxaqlıq böyük faciələrə səbəb ola bilər. Bölmənin rəhbərliyini və nəzarətini möhkəm saxlamaq vacibdir. Ona görə də peşəkar zabitlərə çox ehtiyac olur. Bəli, döyüş göstərir ki, saydan çox, idarəetmə bacarığı önəmlidir. Mən bunu gördüm, döyüşlərdə yaşadım. Çətin məqamda qərar qəbul etmək, vəziyyəti düzgün qiymətləndirmək əsas şərtlərdən biridir.
Özümü itirmədim, o stresi yaşamadım, göz yaşım gəlmədi, ən çətin halda çıxış yolunu tapa bildim. Mən belə şəraitdə tabeliyimdə olanlara deyirəm: “Şəhid olanlara Allah rəhmət eləsin, Vətən sağ olsun, bir kənara qoyun, qisasını alaq, döyüşümüzü davam etdirək. Hələ də fikirləşirəm ki, necə yaşadım bunları, bu qanlı səhnələri.
Zabitin sözlərinə görə, “N” saylı hərbi hissənin bölmələri Suqovuşan istiqamətində hücuma keçmişdi. “Biz isə əvvəlki mövqedə möhkəmlənmişdik. Gecə düşmən yenidən həmlə etdi. Bu barədə komandirlə danışıb artilleriya dəstəyi istədim. Xətdə Əfqan Abdurahmanovun sakit-sakit koordinatları artilleriya bölməsinə verdiyini eşitdim. Bundan əvvəl o, yüksəkliyin müdafiəsində artilleriya ilə işləmişdi və koordinatları yaxşı bilirdi. Özü mənimlə əlaqəyə çıxdı.
– Yolu bağla, nəzarətdə saxla, əsas diqqətini yola ver, qalan yerdən girə bilməzlər. – dedi.
– Bağlamışam, – dedim.
Düşmənin əks-hücumunun qarşısını aldıq”.
Sentyabrın 30-da 4-cü tabora kömək üçün 1-ci tabor komandirinin maddi-texniki təminat üzrə müavini, kapitan Vüqar Əliyev başda olmaqla bir bölük göndərilir. Tabor komandiri dedi: “Qısamüddətli sakitlik oldu, hiss edirdim ki, aldadıcı bir sakitlikdir. Səhərisi, oktyabrın 1-i axşamı atışma düşdü, hücumun qarşısını aldıq. Həmin döyüşdə Amil Rzayev qumbaraatan kimi çox fəal iştirak etdi, düşmənin canlı qüvvəsinin məhv edilməsində önəmli rol oynadı. Oktyabrın 1-də yaralandı, axşamüstü şəhid oldu.
Oktyabrın 2-si, günorta üstü idi, bir də gördüm bizim mövqeyin üstündə pilotsuz uçuş aparatı uçur. Dərhal briqada komandiri ilə əlaqə yaratdım, PUA ilə bağlı məruzə etdim. Dəqiqləşdirmək istəyirdim ki, aparat bizə, yoxsa düşmənə aiddir.
Briqada komandiri dedi:
– Gözlə, dəqiqləşdirək.
Ermənilərin uçuş aparatı qara olur. Bir az yaxınlaşanda gördüm ki, korpusu qaradır və dərhal atəş əmri verdim. Az sonra xəbər gəldi ki, biz tərəf havaya pilotsuz uçuş aparatı qaldırmayıb. Bir neçə dəqiqədən sonra aydın oldu ki, düşmən tərəfi yerüstü kəşfiyyat aparır, kameralar vasitəsilə məlumatlar toplayırmış.
Saat 15:30 olardı. Durduğumuz yüksəklikdən aşağıdakı dərədən zəif səslər gəlməyə başladı. Ermənilər idi. Həmin istiqamətə müşahidə yeri vardı və oradan həm 1444 yüksəkliyini izləmək, həm də dərə istiqamətindən gələn səsləri eşitmək olurdu. Minaatan batareyanın komandirini də özümlə götürüb ora getdim. Yanımızda 2-ci tabora qərargah rəisi təyin olunmuş mayor Azad Həsənov da vardı. Soltan Məmmədovun taboru bizdən aralı olduğundan mənim yanıma gəlmişdi. Mən minaatan batareyanın komandirini ona görə gətirmişdim ki, dərəyə baxsın, koordinatları çıxarsın və dərəni vursun.
Bir neçə dəqiqə keçmişdi ki, mövqeyimizə artilleriya və minaatanların atəşi başladı, avtomat və pulemyotlardan da atırdılar. Yüksəkliyə düşmənin şəxsi heyəti hücuma keçdi: irəliləməyə can atırdılar. Əfqan Abdurahmanov həmişə deyərdi ki, yolu nəzarətə götür. Elə də etdim.
Gərgin döyüş gedirdi, düşmən nəyin bahasına olur-olsun, 1353 yüksəkliyini geri almaq, oranı tez bir zamanda tutmaq istəyirdi. Yüksəklik getsə idi, bu vaxtadək əldə etdiyimiz uğurları itirəcək, əvvəlki mövqeyə qayıdacaqdıq. Yüksəklik nəyin bahasına olur-olsun qorunmalı, son nəfərədək vuruşmalı idik və vuruşduq da. Haradasa saat 16:30-da üzərimizə, daha doğrusu, mən olduğum mövqeyə 120 mm-lik minaatanın mərmisi düşdü. Onda gördüm ki, ətrafı toz-duman bürüyüb. Qolumdan yaralandım, qan sızırdı, kürəyimdən yaralanmağımdan isə xəbərim yox idi. Sola dönəndə gördüm ki, yaralılar var, yerə uzanıblar. Sağ tərəfdə mənim rabitəçim Ülvi Pənahov şəhid olmuşdu. Şəhid olanlardan biri də baş çavuş Mirzə idi. Mirzə çox cəsur oğlan olub, ölümdən qorxmazdı. Döyüş gedə-gedə şəxsi heyətə çay, yemək paylayar, həm də döyüşərdi.
Yanıma gələn mayor Azad Həsənov, bölük komandirim Xaliq Məmmədzadə də yaralanmışdılar. Xalid ürəkli zabit idi, ən çətin anlarda əzmkarlığı, cəsarəti ilə seçilirdi. Gizir Elvin Abbasov tabor hərəkət edəndə öncül qrupda olardı, əgər qabaqda düşmənin hər hansı kəşfiyyat qrupu olardısa, ilk onları qarşılayan və döyüşə girənlərdən biri də o idi. O, yüksəkliyin müdafiəsində də fəal iştirak etdi.
Mən vurulanda gördüm ki, səngərdə olan əsgərlər “kombat yaralandı” deyərək oradan çıxmaq istəyirlər. Onların yaralandığımı bilib ruhdan düşmələrinə yol vermək olmazdı, bu panikaya səbəb olardı. Əsgər qorxdu, təlaşa düşdüsə, özünə nəzarəti itirəcək, hara gəldi qaçacaq. Bunun sonu isə böyük itki deməkdir. Qolumu tutaraq uca səslə, hamının geriyə, səngərə qayıtmasını əmr etdim. Sonra hərbi hissə komandirinə yaralandığımı məruzə etdim.
Gizir Fuad Məmmədov, sürücüm Rəşad kürəyimdən yaralandığımı bildirdilər. Sanitar gəlib sarğı qoydu, məni döyüş meydanından çıxarıb sığınacağa apardılar. Döyüş meydanında isə taborun qərargah rəisi Etibar Hacıyev qaldı. Yaralanmağıma baxmayaraq, nə qədər çətin olsa da, döyüşü qərargah rəisinin köməyi ilə idarə etdməkdə davam etdirdim. Bu yüksəkliyi Əfqanın rəhbərliyi ilə üç gün müdafiə etmiş, əks-həmlələrin qarşısını almışdıq. İndi onu qorumağa, müdafiə etməyə cavabdeh mən və taborum idi. Düşmənin əks-həmləsi bu dəfə də uğursuzluğa uğradı. Bu döyüşü uduzmaq haqqımız yox idi. Gecə caat 12-də döyüş sahəsindən çıxarıldım”.
Bütün çətinliklərə və itkilərə baxmayaraq, yüksəkliyin düşmən tərəfindən tutulmasına imkan verilmədi. Qanla aldığımız yüksəkliyi heç vaxt geri verə bilməzdik və sonadək qanımızla-canımızla qoruduq”.
(Ardı var)
P.ƏFƏNDİ
XQ