Hər sahədə zamanı qabaqlayanlar həmişə, hər kəsdə böyük maraq doğurur. Bu günlərdə isə Bakı məktəblisi – 15 yaşlı Məhəmməd Həsənzadənin vaxtından iki il əvvəl tələbə adı qazanması onun kimliyi, bu uğuru necə qazanması ilə bağlı suallar doğurdu.
Öncə onu qeyd edək ki, Məhəmməd həkimlər ailəsində doğulub. Anası oftalmoloq, atası isə cərrah–ginekoloqdur. Məhəmmədin Vasif adlı qardaşı, Fatimə adlı bacısı var. Ailənin başçısı Yaşar Həsənov Naxçıvanda işə göndərildiyinə görə onlar 5 il orada yaşayıblar.
Bacısı Fatimə 1-ci sinfə gedəndə Məhəmmədin 5 yaşı varmış və ingiliscə 1000-ə qədər sayırmış. O dildə çox söz, hətta şeir də bilirmiş. Bir sözlə, çox zəkalı uşaq imiş. Fatiməni dərsə aparıb-gətirəndə anası Kəmalə xanım Məhəmmədi də özü ilə götürürmüş. Dəhlizdə bacısını gözləyəndə onun şeir söyləməsi, zirəkliyi müəllimlərin diqqətini cəlb edib. Uşağın bu qabiliyyəti barədə xəbər məktəbin direktoruna da çatıb. Beləliklə, Məhəmməd 5 yaşında xüsusi yoxlanışla 1-ci sinfə qəbul edilir.
Kəmalə Həsənova oğlunun uğurundan iftixarla danışır:
– Məhəmməd həmişə öndə olmağı sevib. Bu yaşında onun 1 saatı da boş deyil. Vaxtın qədrini onun kimi bilən çətin tapılar. Hansı saatda idman etməyi, dostları ilə görüşməyi, hətta telefonla, kompüterlə məşğul olmağı, yemək yeməyi, dərs oxumağı öncədən sıralayır. Aşağı siniflərdə oxuyanda yuxarı sinfin dərsləri ilə maraqlanırdı. O, 9-cu sinfi 267 saylı məktəbdə əla qiymətlərlə bitirdi. Sonrakı illərdə Ağdam şəhər 28 saylı köçkün məktəbində oxudu. O, orta təhsilini fərqlənmə attestatı ilə başa vurdu.
İmtahanlarda mən Məhəmməddən daha yüksək nəticə gözləyirdim. O, 585 yox, 650–700 bal toplaya bilərdi. Əgər o qəza olmasaydı...
Öyrəndik ki, Məhəmməd yanvar ayında skuter sürərkən yıxılıb və ciddi zədə alıb, 2 ay yataqda qalıb. Müalicə dərslərdən geri qalmasına səbəb olsa da, özündə güc tapıb. Arzuladığı nəticəni əldə edə bilməsə də, Bakı Dövlət Universitetinin hüquq fakültəsinə daxil olub. Məhəmməd bildirdi ki, arzuları çoxdur:
– Hüquq fakültəsini bitirdikdən sonra xarici ölkələrin birində kibercinayətkarlıqla bağlı təhsil almaq və o sahədə işləmək istəyirəm. Kiberhücumların vurduğu ziyanın əhatəsi get-gedə genişlənməkdədir. Mən də bu sahədə çalışmaq, cinayətlərin qarşısının alınması üçün lazımi təhsil almaq arzusu ilə yaşayıram.
Kəmalə xanım həmişə oğlunun böyük dəstəkçisi olub:
– Oğlumun ali məktəbə hazırlaşan zaman keçirdiyi yuxusuz gecələr hədər getmədi. Məhəmməd qəza keçirəndən sonra onu Litvaya, Riqa Texniki Universitetinə ingilisdilli yay düşərgəsinə göndərdim – 3 həftə Riqanı, Estoniyanı, Finlandiyanı, İtaliyanı, Fransanı gəzmək şansı əldə etdi. İmtahandan sonra olan bu gəzinti onun əhvalına yaxşı təsir etdi.
İki qardaşını, bacısının yoldaşını Vətənə qurban verən Kəmalə xanıma oğlunun, ümumiyyətlə, övladlarının uğurları nə qədər xoş olsa da, ürəyindəki kədər üz-gözündən çəkilməyib. İtki onu daxilən sarsıtsa da, bu pozitiv xanıma şəhidlərlə bağlı yazılan, deyilən hər söz təskinlik verir.
“Hələlik, Məhəmmədin təhsil uğurlarına şahid və dəstək olun!”– diləyilə ailədən ayrılıram. 15 yaşlı tələbəmizi isə universitet, mühazirələr, seminarlar və kitabxanalar gözləyir.
Uğur olsun, Məhəmməd, tələbə adın mübarək!
Zərifə BƏŞİRQIZI
XQ