Elə ki, bu qırmızı kərpicdən hörülmüş tağlı qapıdan içəri keçdin, qarşına əzəmətli bir heykəl çıxmalı idi. Yanında da gözəl bir fəvvarə. Əslində şəkilə diqqətlə baxanda çoxdan istifadəyə verilən fəvvarənin arxa tərəfində ucaldılan həmin “heykəl” görünür. Betondan tökülmüş hündür bir tikilidir. Nədir, hələ ki, bilinmir. Amma hamı danışır ki, şəmkirlilərin həmyerlisi, əfsanəvi geoloq, Sosialist Əməyi Qəhrəmanı Fərman Salmanovun heykəli olacaq burada. 

Bəzi məqamlara aydınlıq gətirmək üçün Şəmkirin baş memarına zəng edirəm:

-Salam, İlqar müəllim. Burada Sibiri fəth edən həmyerlimiz Fərman Salma­novun heykəli olmalı idi. Amma heykəl hələ də yoxdur, səbəbini bilmirsiniz?

-Bilmirəm.

-Görəsən, yarımçıq qoyub getdiklə­ri işi nə vaxt davam etdirəcəklər?

-Bilmirəm.

-Bəs hördükləri bu tikili nədir?

-Bilmirəm. Guya, neft buruğudu, nədi, bilmirəm...

Sağollaşıb, “çox ətraflı məlumat verdiniz” deyib telefonumu qapadıram.

Azərbaycan Respublikası Pre­zidentinin 9 iyul 2019-cu il tarixli Sərəncamından: 

“Azərbaycan Respublikası Kons­titusiyasının 109-cu maddəsinin 32-ci bəndini rəhbər tutaraq, Qərbi Sibirin Tümen vilayətində nəhəng neft və qaz yataqlarını kəşf etmiş məşhur azər­baycanlı geoloq, görkəmli alim, geo­logiya-mineralogiya elmləri doktoru, Rusiya Elmlər Akademiyasının müxbir üzvü, Sosialist Əməyi Qəhrəmanı Fər­man Qurban oğlu Salmanovun xatirə­sini əbədiləşdirmək məqsədilə qərara alıram:

1. Azərbaycan Dövlət Neft və Sə­naye Universitetində təhsil alan, xüsu­si istedadı ilə fərqlənən 2 nəfər tələbə üçün “Fərman Salmanov adına təqa­üd” təsis edilsin.

2. Azərbaycan Respublikasının Na­zirlər Kabineti:

2.1. Şəmkir şəhərində Fərman Sal­manovun heykəlinin ucaldılmasını tə­min etsin;

2.2. Şəmkir rayonunda təhsil aldı­ğı ümumi təhsil müəssisəsinə Fərman Salmanovun adının verilməsini təmin etsin...”.

Qeyd edim ki, bu sərəncam Azər­baycanda, xüsusilə Fərman Salma­novun doğulub boya-başa çatdığı Şəmkirdə hədsiz razılıqla qarşılıanıb. Artıq həmin sənədə əsasən Azərbay­can Dövlət Neft və Sənaye Universi­tetində təhsil alan, xüsusi istedadı ilə fərqlənən 2 nəfər tələbə üçün “Fərman Salmanov adına təqaüd” təsis edilib, Şəmkir şəhər məktəblərindən birinə də görkəmli geoloqun adı verilib. 

Bəs Şəmkirdə ucaldılacaq heykəl?

Ulu öndərimiz Heydər Əliyev və Azərbaycan Respublikasının Prezidenti İlham Əliyev həmyerlimizə həmişə xüsusi diqqət və qayğı ilə ya­naşıblar. 2007-ci ilin fevralında dövlət başçısı İlham Əliyev Prezident Sara­yında məşhur neftçi-geoloq, tanınmış alimi qəbul edib. Yadımdadır, o zaman Fərman Salmanov Bakıya gəlişindən və Azərbaycan Prezidenti ilə görüşün­dən böyük qürur hissi keçirdiyini bil­dirmişdi, Azərbaycanda onun məişət şəraitinin yüksək səviyyədə təmin olunmasına görə, dövlətimizin başçı­sına minnətdarlıq etmişdi. Prezidenti­miz də, öz növbəsində, görkəmli alimin geologiya elmində böyük xidmətlərini qeyd edərək, onun elmi nailiyyətlərinin Vətənimiz üçün daim iftixar hissi do­ğurduğunu vurğulamışdı… 

Lakin həmin ilin martında Fərman Salmanov 75 yaşında ikən dünyasını dəyişmiş və Rusiyada dəfn olunmuş­dur. Onu oxucuya yaxından tanıtmağa ehtiyac varmı? Zənnimcə, Fərman Sal­manov təkcə Azərbaycanda, Rusiyada deyil, bütün dünyada məşhurdur. Tək­cə bir faktı göstərim ki, bu gün Rusiya büdcəsinə milyardlar verən Sibir neft yataqlarını o kəşf edib. Halbuki rus­lar özləri deyirdilər li, bu yerlərdə neft yoxdur, hətta azərbaycanlı geoloqa ci­nayət işi də açılmışdı.

Bir onun aldığı mükafatlara və fəxri adlara baxın: Sosialist Əməyi Qəhrə­manı, Lenin, “Qırmızı Əmək bayrağı”, “Oktyabr İnqilabı” ordenləri, Lenin mü­kafatı, Rusiya Federasiyasının Əmək­dar geoloqu, Surqut şəhərinin fəxri vətəndaşı, Texas ştatının fəxri vətən­daşı…

Rus xalqının istəyi və Prezident Vladimir Putinin sərəncamı ilə Fərman Salmanovun adı rəsmən Surqut Hava Limanına verilib. Bu, Azərbycan oğlu­nun böyüklüyünün növbəti təsdiqidir. Bir neçə şəhərdə isə soydaşımızın heykəlləri və büstləri var.

…Şəmkirdə həmyerlimiz, fəxrimiz Fərman Salmanovun möhtəşəm bir abidəsinin açılacağı günü hamı səbir­sizliklə gözləyir. Lakin tikintinin az qala bir ilə yaxındır ki, yarımçıq, başlı-başı­na qoyulması haqlı narazılıq doğurur. Aldığımız məlumata görə, Mədəniyyət Nazirliyinə bunun üçün vəsait də ayrı­lıb.

Məlumat üçün bildirək ki, yazının əvvəlində söhbət açdığımız park Şəm­kirdə, şəhərin mərkəzindədir, sakin­lərin və qonaqların çox sevdiyi bir is­tirahət məkanıdır. Adına Xaqani parkı deyirlər. Xaqani İbrahimli Şəmkirin ilk şəhididir, 1992-ci ildə Şuşa ətrafında gedən döyüşlərdə həlak olub.

Uzun illər, yəni sovet dövründə “Komsomol parkı” kimi tanınan bu ba­ğın əsası 1850-ci ildə qoyulub. Sonra­lar parkda geniş yenidənqurma işləri aparılıb. Burada 2 hektar ərazidə yaşıl­lığın, güllərin və dekorativ kolların ara­sında oturacaqlar yerləşdirilib, körpü­sü olan su kanalları tikilib. Süni göldə ördəklər üzür. Ağaclardan quşlar üçün taxta yuvalar asılıb. Asiya və Amerika ölkələrindən nadir bitki növləri gətirilib, uca və qədim çinar ağacları var. Eyni zamanda, parkın ərazisində salınmış uşaq meydançasında yelləncəklər, ki­çik zoopark fəaliyyət göstərir.

Yəni bunları deməkdə məqsədimiz odur ki, yerli icra strukturları həmyer­lilərinin heykəli üçün şəhərin ən görmə­li yerində sahə ayırıblar. Elə isə ora nə vaxta kimi boş qalmalıdır? Ümid edirik ki, tezliklə bu sualın cavabını alacağıq, həm rayon sakinlərinin, həm də qəzeti­mizin səsinə səs verən tapılacaq.

Hamlet QASIMOV,
“Xalq qəzeti”nin bölgə müxbiri