Cənnət Qarabağımızın tacı, sevgilərimizin qibləgahı olan Şuşa indilər özünün çox mübarək günlərini yaşayır. Prezident İlham Əliyev və ailə üzvləri növbəti səfərləri ilə “zirvə” şəhərə üstün bir şərəf verdilər. 

Neçə-neçə mədəni-sosial obyek­tin açılışı reallaşdı, yeni layihələrə start verildi. Erməni işğalından azad edilmiş ruhumuzun paytaxtının ötən həftə “Türk dünyasının mədəniyyət paytaxtı” kimi də yeni bir statusu rəsmiləşdi. Eyni zaman­da, burada növbəti “Xarıbülbül” musiqi festivalı uğurla keçdi. Cıdır düzündən qanad açan musiqi sədaları dalğa-dal­ğa aləmə yayıldı. Axşam atəşfəşanlığına isə bədxahlarımız aşağılardan həsədlə, kin-küdurətlə baxdılar. 

Azərbaycan Prezidenti, müzəffər Ali Baş Komandan İlham Əliyev Şuşa­ya daim yüksək dəyər verən, “Şuşasız Azərbaycan yoxdur” – deyən ulu öndər Heydər Əliyevin 100 illik yubileyi müna­sibətilə elə bu uca dağların qoynundan xalqa müraciət edərək, Şuşanın önəmini bir daha dünyaya bəyan etdi: “...Hesab etdim ki, mən bu gün burada olmalıyam. Şuşada olmalıyam. Bu binanın önündə olmalıyam. Şuşa Zəfərimizin rəmzidir, Şuşa Zəfərimizin tacıdır. Şuşa işğaldan azad olunanda, bax, bu meydanda qəh­rəman Azərbaycan hərbçiləri mənə Şu­şanın azad olunması ilə bağlı raport ver­mişlər. Bu binanın damında Azərbaycan bayrağı qaldırılmışdır və Şuşanın azad olunması bizim tarixi Zəfərimizin əsas hisssəsi idi. Bildiyiniz kimi, ondan bir gün sonra Ermənistan kapitulyasiya aktına imza atmışdır”.

Möhtərəm Prezidentimiz xalqa mü­raciətində özünün müdrik siyasəti, atdığı tarixi addımları, arxasında gerçək əməl­lər duran qətiyyətli sözləri ilə bir daha ürəklərimizə sonsuz sevinc, misilsiz fərəh, tükənməz inam bəxş etdi. Dünya bir daha gördü və əmin oldu ki, ermənilə­rin əzəldən burada yaşamış olduqlarını iddia etmələri, olsa-olsa, cəfəngiyyatdır, tarix nağılbazlığıdır.

Bəli, düz 28 il 6 aylıq ayrılıqdan son­ra, nəhayət, vüsalına qovuşduğumuz Qarabağ, o cümlədən də Şuşa yenidən çal-çağırlı günlərini yaşayır. Pənahəli xa­nın, İbrahimxəlil xanın, Molla Pənah Vaqi­fin, Xurşidbanu Natəvanın, Qasım bəy Zakirin, Mir Mövsüm Nəvvabın, Nəcəf bəy Vəzirovun, Əbdürrəhim bəy Haqver­diyevin, əslən şuşalı olmuş Səməd bəy Mehmandarovun, Üzeyir bəy Hacıbəyli­nin, Cabbar Qaryağdıoğlunun, Bülbülün, Süleyman Ələsgərovun ruhları şaddır ki, artıq erməni qəsbkarlarının murdar nəfə­sindən təmizlənmiş Şuşa dirçəldilir, vəfalı sakinlərini, əzəli və əbədi sahiblərini qoy­nuna almağa hazırlaşır.

Yadımıza 2021-ci ildə dağların qoy­nunda tarixi Şuşa Bəyannaməsinin imza­landığı 15 iyun günü düşür. Azərbaycanla Türkiyə arasında müttəfiqlik münasibət­lərini rəsmiləşdirən həmin Bəyannamə­nin qüvvəyə minməsi ilə Şuşa bir az da əzəmətli, bir az da arxa-dayaqlı göründü. Başının üstündəki duman dağıldı, daha parlaq sabahlarla bağlı xətircəmliyi xeyli gücləndi. Bunun nə böyüklükdə hüquqi, siyasi, mənəvi stimul olduğunu təsəvvürə gətirdiyimiz hər an ürəyimiz sonsuz qürur və iftixarla döyünür. Şuşa bu gün qucaq açdığı əsrarəngiz tədbirlərlə şərəf və şan tariximizi daha da möhtəşəm edir.

...Heydər Əliyev Fondu və Mədə­niyyət Nazirliyinin təşkilatçılığı ilə Türk dünyasının mədəniyyət paytaxtı Şuşada keçirilən “Xarıbülbül” Beynəlxalq Musiqi Festivalının qala-konserti möhtəşəmliyi ilə hər kəsə unudulmaz təsir bağışla­dı. Səhnədə festivala qatılmış ölkələrin incəsənət ustaları istedad və məharət­lərini göstərdilər. “Xarıbülbül” musiqi kompozisiyası, Azərbaycan, Qazaxıstan, Özbəkistan, Türkiyə və Türkmənistan incəsənət ustalarının təqdimatında “Söz meydanı” vokal-instrumental kompozisi­yası, “Türk dünyası virtuozları” ansamb­lının ifasında “Çahargah bəhsi”, “Əfsanə Turan”, “Xalq xəzinəsi” kompozisiyaları və iştirakçı ölkələrin ifaları, rəqs qrupla­rının digər rəngarəng çıxışları ecazkarlığı ilə seçildi. Qala-konsert bütün iştirakçı­ların ifasında “Odlar yurdu Azərbaycan” kompozisiyası ilə başa çatdı. Amma onun xoş təəssüratları könülləri uzun za­man tərk etməyəcək. Cıdır düzü, Üzeyir Hacıbəylinin heykəlinin qarşısı, Bülbülün ev-muzeyi və Şuşanın digər məkanlarını əhatə edən festival tədbirləri ilə mədəniy­yət salnaməmizə əlvan və silinməz sətir­lər yazıldı. 

Xatırladaq ki, ötən il martın 31-də Tür­kiyənin Bursa şəhərində Beynəlxalq Türk Mədəniyyəti Təşkilatına (TÜRKSOY) üzv ölkələrin Mədəniyyət Nazirlərinin Dai­mi Şurasının növbədənkənar iclasında Azərbaycanın mədəniyyət paytaxtı Şuşa şəhəri 2023-cü il üçün “Türk dünyası­nın mədəniyyət paytaxtı”elan edilmişdi. TÜRKSOY-un bu münasibətlə düzənlə­diyi rəsmi açılış mərasimində təşkilata üzv ölkələrin nümayəndə heyətləri, türk dostluq və əməkdaşlıq təşkilatlarının rəhbərləri, digər qonaqlar iştirak etdilər. Vurğulandı ki, bu gün Şuşa və bütün Qarabağ özünün intibah dövrünü yaşa­yır. Qələbədən az vaxt keçməsinə bax­mayaraq, şəhərlərimizin, kəndlərimizin, tarix-mədəniyyət abidələrimizin, məhv edilən meşə massivlərinin və bütövlükdə yaşayış infrastrukturunun qısa müddətdə kompleks bərpası və yenidən qurulması istiqamətində Prezident İlham Əliyevin bilavasitə rəhbərliyi ilə intensiv işlər apa­rılır. Şuşa şəhərinin tarixi-mədəni siması bərpa edilir, Şuşaya yenidən mədəni hə­yat qayıdır.

Tədbirdə ürək sözlərini söyləyənlər – mədəniyyət naziri Adil Kərimli, Preziden­tin Şuşa rayonunda xüsusi nümayəndəsi Aydın Kərimov, TÜRKSOY-un baş katibi Sultan Rzayev, Türk Dövlətləri Təşkilatı­nın Baş katibi Kubanıçbek Ömüralıyev, Xalq artisti Polad Bülbüloğlu, Azərbay­can Yazıçılar Birliyinin sədri, Xalq yazı­çısı Anar və başqaları, ilk növbədə, kö­nüllərimizin paytaxtı olan Şuşaya yeni missiyasında xeyir-dualarını verdilər. On­lar inamla bildirdilər ki, ölkəmizdə davam edən “Heydər Əliyev İli” Azərbaycanın dünyada nüfuzunun daha da artmasına vəsilə olacaq. Türk dünyası ölkələrindən gəlmiş musiqi və folklor kollektivlərinin təqdim etdiyi konsert proqramları məra­simə əlavə rəng qatdı...

Festival və rəsmi tədbir başa çatsa da, Şuşada Türk dünyası mədəniyyətinin təntənəsi hələ bir çox layihə və mərasim­lərlə ilin sonunadək davam edəcək. Nadir şəhərsalma və memarlıq sənətinin açıq səma altında möhtəşəm muzeyi olan 271 yaşlı Şuşa Türk dünyasının mədəniyyət paytaxtı kimi şuşasevərləri öz orbitində hələ çox saxlayacaq. Heydər Əliyev Fon­du burada müxtəlif yerli və beynəlxalq tədbirlər keçirməyi davam etdirəcək, mədəni irsimizin bərpası üzrə geniş iş­lər görüləcək. Qarşıdakı dövrdə Şuşada “Qorqud Ata” Türk dünyası 3-cü Film Festivalı, eləcə də Birinci Türk Dünyası Mədəniyyət Forumu təşkil olunacaq. 

Göründüyü kimi, Şuşanın öz əzəli sa­hiblərinə qayıtması qəhrəmanlığın zirvə həddi olmaqla, bütün türk dünyasında xüsusi bir canlanma yaradıb. Şəhərin əsl tarixi simasının bərpası yönündə nəhəng layihələr gerçəkləşdirilir. Bu isə dostları­mızı sevindirir, düşmənlərimizi xar eləyir. 

Özünəməxsus cazibəsi, qançəkərli­yi olan Şuşamızın göylərində ruhumuz, beləcə, pərvaz etməkdədir! 

Əli NƏCƏFXANLI, “Xalq qəzeti”