Azərbaycan Prezidenti İlham Əliyevin, Birinci vitse-prezident Mehriban Əliyevanın diqqət və qayğısı sayəsində yalnız paytaxtda deyil, regionlarda da müasir tələblərə cavab verən məktəblər tikilir. Bu tədris müəssisələri müasir avadanlıq, istilik sistemi, zəngin kitabxana, əyani vəsait və kompüterlərlə təchiz olunaraq maddi-texniki bazası möhkəmləndirilir.
Belə məktəblərdən biri Heydər Əliyev Fondu tərəfindən Ağcabədi rayonunun Poladlı kəndində inşa edilir. Ağcabədi Rayon İcra Hakimiyyəti başçısının kənd inzibati ərazi dairəsi üzrə nümayəndəsi Əhməd Əhmədov deyir:
– Poladlı kənd tam orta məktəbi təmirsiz, qəzalı vəziyyətdə idi. Fənn kabinetlərinin sadəcə adı vardı, laboratoriya təcrübələri keçirilmirdi. Lazım olan avadanlıqlar çatışmırdı, olanlar isə köhnə, yararsız vəziyyətdə idi. Siniflərdə şagird sıxlığı təhsilin keyfiyyətini aşağı salırdı. Birinci vitse-prezident Mehriban Əliyevanın təşəbbüsü ilə Poladlı kənd tam orta məktəbinin tikintisi valideynləri çox sevindirdi.
Yeri gəlmişkən, təhsil müəssisəsi yeni tədris ilində – sentyabrda istifadəyə veriləcək. Bu barədə inşa olunan məktəbin iş icraçısı Samir Rəhimov bildirdi: – “Yeniləşən Azərbaycana yeni məktəb” layihəsi çərçivəsində məktəbin inşasına fevral ayından başlanılıb. Əsas məqsəd Poladlı kəndində təhsillə bağlı mövcud olan problemlərin aradan qaldırılması, müasir standartlara cavab verən məktəb binasının tikintisidir. Əvvəlki məktəb binası qəzalı vəziyyətdə idi. Onu sökərək yerində ikimərtəbəli, 300 yerlik tam orta məktəb binası tikirik. Binanın birinci və ikinci korpusları tədris məqsədilə, üçüncü korpusu bufet və akt zalı, dördüncü korpusu isə idman zalı üçün lahiyələndirilib. Binanın dam örtüyü metal kirəmitlə, akt və idman zallarının damı–metal ferma üzərindən sendvic panellərlə örtüləcək.
İş icraçısı bildirdi ki, Heydər Əliyev Fondunun təşəbbüsü ilə məktəbin həyətində müasir oyun meydançası da tikiləcək. Lahiyə üzrə stadionun sahəsi 968 kvadratmetr nəzərdə tutulub. Bundan başqa, təhsil ocağının həyətində 4500 kvadratmetr sahədə abadlıq işləri görüləcək, park salınacaq. Həmçinin təhsil müəssisəsinin həyətində qazanxana, transformator yarımstansiyası, içməli, çirkab və yanğın əleyhinə su anbarları inşa ediləcək.
Beləliklə, tədris korpuslarının inşası şagird sıxlığını aradan qaldırmaqla, həm də onların daha keyfiyyətli təhsil almasına şərait yaradacaq və tədrisin keyfiyyətinə müsbət təsir göstərəcək. Nəticədə ümumi təhsil göstəricilərində, xüsusilə də buraxılış imtahanları və ali məktəblərə qəbulun nəticələrində əvvəlki illərlə müqayisədə nəzərəçarpan irəliləyişlər müşahidə ediləcək.
Pünhan ƏFƏNDİYEV,
“Xalq qəzeti”nin bölgə müxbiri
