Biz Azərbaycan dövləti olaraq Qarabağda yaşayan erməni sakinlərin fərdi hüquq və təhlükəsizliyini təmin edəcəyimiz kimi, Ermənistan da qarşılılıq prinsipi əsasında Qərbi azərbaycanlıların hüquq və təhlükəsizliyini təmin etməlidir.
(Prezident İlham Əliyevin martın 16-da Ankarada Türk Dövlətləri Təşkilatının Dövlət Başçılarının Fövqəladə Zirvə görüşündəki çıxışından.)
Hayastan hazırda Laçın–Xankəndi yolunun, guya, blokadada olması barədə bütün dünyaya car çəkir, Qarabağ iqtisadi rayonunda yaşayan etnik hayların “humanitar böhran”la üzləşdiyini bildirir, dünya dövlətlərinin və aparıcı beynəlxalq təşkilatların ölkəmizə sanksiya tətbiq etməsinə nail olmağa çalışır. Rəsmi İrəvan iddia edir ki, Azərbaycan bununla, guya, Qarabağdan erməni əhalinin baş götürüb getməsinə nail olmaq istəyir. Biz azərbaycanlılar bunun ağ yalan olduğunu bilirik, necə deyərlər, hayların dabbağda gönünə bələdik. Rəsmi Bakı ekofəalların etiraz aksiyasının başladığı ilk gündən bəyan edib ki, Laçın yolu bağlanmayıb, Rusiya sülhməramlıları, Beynəlxalq Qırmızı Xaç Komitəsi, humanitar yüklər üçün yol daim açıqdır. Dekabrın 12-dən indiyədək bu yoldan 4 minə yaxın nəqliyyat vasitəsi keçib.
Biz hayların özlərinin bu üsuldan 1988-89-cu illərdə tarixi Azərbaycan torpağı, indiki Ermənistan ərazisində yaşayan soydaşlarımıza münasibətdə istifadə etdiklərini unutmamışıq. 1988-ci ilin əvvəlindən başlayaraq, Qərbi Azərbaycandakı soydaşlarımız iş yerlərinə, uşaqlar məktəbə buraxılmır, dükan-bazarda onlara ərzaq malları satılmır, işığı, telefonu, suyu, qazı kəsilir, yaşayışı dözülməz hala gətirilirdi. Əslində, bu, real psixoloji terror idi. Amma tez-tez fiziki terror da baş verirdi. Hazırkı Qərbi Azərbaycan İcmasının hüquqi varisi olan Azərbaycan Qaçqınlar Cəmiyyyətində 1990-cı ildə tərtib edilmiş siyahıya əsasən, 1988-1990-cı illərdə Ermənistanda 216 azərbaycanlı vəhşicəsinə qətlə yetirilib və ya millətlərarası münaqişə zəminində baş vermiş hadisələr nəticəsində həlak olub.
***
Azərbaycanın Vətən müharibəsində qazandığı Qələbə təkcə Qarabağ və Şərqi Zəngəzurun işğaldan azad olunması, dağıdılmış şəhər və kəndlərimizin bərpası demək deyil, həm də Ermənistandan qovulan soydaşlarımızın doğma yurd-yuvasına dönməsinə gətirib çıxarmalıdır. Azərbaycanlıların Qərbi Azərbaycana qayıdış məsələsi çoxdan gündəmdədir. Qərbi Azərbaycandan olan soydaşlarımız tarixi zəfərdən daha da ruhlanıblar. Onların qayıdış arzusu indi əvvəlkindən qat-qat güclüdür. Onlar 2022-ci ilin avqustun 3-də təşkilatlanaraq, artıq qeyd etdiyimiz kimi, Azərbaycan Qaçqınlar Cəmiyyətinin bazasında Qərbi Azərbaycan İcmasını yaradıblar. Dekabrın 24-də Prezident İlham Əliyev icmanın üzvləri ilə görüşdə, faktiki olaraq, Qərbi Azərbaycan mövzusunu xalqımızın yeni strateji hədəfi kimi müəyyən edib. İcma bu yaxınlarda Qərbi Azərbaycana Qayıdış Konsepsiyasını hazırlayıb. Soydaşlarımız sülh yolu ilə dədə-baba torpaqlarına geri dönmək, dinc yanaşı yaşamaq istəyirlər. Amma qayıdış beynəlxalq təhlükəsizlik təminatı altında olmalıdır. İcma həm də hesab edir ki, Qərbi Azərbaycana qayıdış məsələsi Ermənistanın öhdəliyi kimi, Azərbaycan–Ermənistan sülh müqaviləsində də təsbit olunmalıdır.
***
Rəsmi Bakı son vaxtlar israr və əzmlə Qərbi Azərbaycana qayıdış məsələsini beynəlxalq müstəvidə qaldırmaqdadır. Prezident İlham Əliyevin martın 16-da Türk Dövlətləri Təşkilatının Dövlət Başçılarının Fövqəladə Zirvə görüşündəki çıxışından epiqraf kimi istifadə etdiyimiz fikirlər də bunun əyani nümunəsidir. Cənab İlham Əliyev bildirib ki, Türk dünyası türk dövlətlərinin hüdudları ilə məhdudlaşmır. Türk dünyası daha böyük coğrafiyanı əhatə edir və tarixi torpağımız olan Qərbi Zəngəzurun 1920-ci ilin noyabr ayında sovet hökumətinin qərarı ilə Azərbaycandan alınıb Ermənistana verilməsi Türk dünyasının coğrafi cəhətdən ayrılmasına səbəb olub. 1991-ci ilə qədər bütün azərbaycanlılar indiki Ermənistan ərazisindən zorla qovulublar. Ermənistan Qarabağda və Şərqi Zəngəzurda olduğu kimi, indiki Ermənistan ərazisində, yəni, Qərbi Azərbaycanda da mədəni irsimizi, məscidləri, tarixi abidələrimizi dağıdıb. Azərbaycan ictimaiyyəti dəfələrlə UNESCO-ya indiki Ermənistanda Azərbaycan xalqının mədəni irsinin monitorinq edilməsi məqsədilə bu ölkəyə faktaraşdırıcı missiyanın göndərilməsi xahişi ilə müraciət edib və UNESCO-dan müsbət cavab gözləyir.
Prezident İlham Əliyev qeyd edib ki, Qərbi Azərbaycanda etnik təmizləməyə məruz qalan həmvətənlərimiz indi Qərbi Azərbaycan İcmasında birləşiblər:
“Onlar tarixi torpaqlara sülh yolu ilə qayıdışı qarşılarına məqsəd qoyublar. Qərbi Azərbaycan İcmasının hazırladığı Qayıdış Konsepsiyasına əsasən, indiki Ermənistan ərazisindən zorla deportasiya olunmuş azərbaycanlıların öz yurdlarına qayıdışı üçün müvafiq verifikasiya və zəmanət mexanizmi olan və hüquqi baxımdan məcburi olan beynəlxalq razılaşma əldə edilməlidir”.
***
Azərbaycan Prezidentinin sammitdəki çıxışı Hayastan hakimiyyətinin yuxusunun ərşə çəkilməsinə səbəb olub. Təcavüzkar ölkənin xarici siyasət idarəsi gecə ikən dövlət başçımızın fikirləri ilə bağlı açıqlama yayıb. Qərbi Azərbaycan ifadəsinin Azərbaycanın Hayastana ərazi iddialarının təzahürü adlandırıldığı bu bəyanat mahiyyətcə əvvəlkilərdən heç nə ilə fərqlənməyən növbəti kağız parçasıdır.
Öz növbəsində Qərbi Azərbaycan İcması Ermənistan XİN-in qərəzli bəyanatına münasibət bildirib. İcma qeyd edib ki, rəsmi İrəvan Azərbaycan Prezidentinin Qərbi Azərbaycan məsələsi ilə bağlı verdiyi bəyanatını yanlış məzmunda təqdim etməyə cəhd edərək, Qərbi azərbaycanlıların sülh yolu ilə, ləyaqətli və təhlükəsiz şəkildə qayıdış hüququna xələl gətirməyə cəhd edib: “İlk növbədə Qərbi Azərbaycandan qovulmuş azərbaycanlıların sülh yolu ilə qayıdışına verdiyi siyasi dəstəyə və bu məsələni mötəbər beynəlxalq formatların tribunasından çatdırmasına görə Prezident İlham Əliyevə təşəkkür edirik.
Ermənistan hökumətinin etiraz etdiyi Qərbi Azərbaycan ifadəsinə gəlincə, qeyd edək ki, həmin bölgədə yaxın tarixədək azərbaycanlıların çoxluq təşkil etdiyini və son dövrlərədək qeydə alınmış toponimlərin və hidronimlərin 95 faizdən çoxunun Azərbaycan mənşəli olduğunu nəzərə alaraq, bu ifadəni işlətməyin ciddi əsasları var. Xüsusilə, oranın qanuni sakinləri olan azərbaycanlılar etnik təmizləmə yolu ilə öz evlərindən zorla çıxarılıblarsa, o ifadəni işlətmək törədilmiş insanlıq əleyhinə cinayəti rədd etmək baxımından bütün insanlığın borcudur.
Öz evimizə sülh yolu ilə geri qayıtmaq tələbimiz Ermənistanın ərazi bütövlüyü və ya suverenliyinə xələl gətirə biləcək şəkildə yanlış təfsir edilə və ya qələmə verilə bilməz”.
Beləliklə, döyüş meydanında olduğu kimi, diplomatik cəbhədə də uğursuzluğa düçar olan Hayastan okeanda fırtınaya düşmüş gəmini xatırladır. Onun lövbər salacağı, ya da saya oturacağı yaxın vaxtlarda bilinəcək.
Qafar ÇAXMAQLI,
Türkiyənin Ərciyəz Universitetinin ermənişünaslıq şöbəsinin rəhbəri:
– Təkcə 1988-89-cu illərdə deyil, Ermənistan dövlətinin mövcud olduğu yüz ildən artıq müddətdə, hələ ondan əvvəl də buradakı azərbaycanlılar təzyiq və təqiblərə məruz qalıblar. Nəticədə, öz ata-baba yurdlarını tərk ediblər. İndiki Ermənistan ərazisi vaxtilə Azərbaycan türklərinin sıx məskunlaşdıqları ərazi olub. Ayrı-ayrı dövrlərdə qovulan, çıxdaş edilən əhalinin sayına, onların köç etdikləri ərazilərdə məskunlaşma xəritəsinə baxsaq, bu həqiqət açıq görünər. Təkcə 1918-ci ildə Ermənistan dövləti elan olunandan sonra Zəngəzuru, Göyçəni və İrəvanı yüz mindən çox insan tərk edib. Deportasiyalar sonrakı dövrdə də davam edib. Bunu biz demirik, tarixi faktlar deyir. 1988-89-cu illərdə qovulan əhalinin sayının 300 minə yaxın olduğu deyilir. Məncə, bu rəqəm də səhih deyil, real say daha çoxdur. Qərbi Azərbaycanın əsl sahibləri azərbaycanlılardır. Haylar orada əsrlər boyu yaşaya bilməzlər, o torpaqların sahibləri var və onlar tarixi Vətəni unutmayıblar. Artıq Vətənə qayıtmağın məqamı yetişib.
Səxavət HƏMİD, “Xalq qəzeti”