Siyasi nöqteyi-nəzərdən etibarsız, imzasına və sözünə sahib çıxmağı bacarmayan, Qərbdə və Şərqdə qapısını döydüyü “tərəfdaşlarından” arzuladığı dəstəyi görməyən rəsmi İrəvan indi də sabiq yetkililərin xidmətindən yararlanmaq qərarına gəlib. Həm də bu dəfə onların pullu xidmətindən istifadə etmək niyyətindədir.
Rəsmi dəvətlə İrəvana təşrif buyuran NATO-nun sabiq baş katibi, “Rasmussen Global” siyasi konsaltinq təşkilatının təsisçisi Anders Foq Rasmussen Ermənistanda olduğu iki gün ərzində bu ölkənin hərbi-siyasi rəhbərliyinə məsləhətlər verməklə, hayların başbilənlərinin başlarına ağıl qoymaqla məşğul olub. Və bu zaman “siyasi ekspert” Rasmussen müştərilərinə təkcə daxili məsələlərlə bağlı deyil, həm də bölgədəki mövcud durum barədə “ustad dərsləri” keçib. Dinləyicilərindən biri, Ermənistanın müdafiə naziri Suren Papikyanla görüşündən sonra Cermukda mətbuat konfransı keçirən Rasmussen deyib ki, o, bura rəsmi dəvətlə gəlib və məqsədi “Ermənistan hökumətinə Qərb və Avropa İttifaqı ilə əlaqələri gücləndirməkdə kömək” etməkdir.
***
Mətbuat konfransında “Azərbaycanın təcavüzünün nəticələrini öz gözləri ilə görmək üçün” cənub rayonlarına səfər etdiyini açıqlayan hərbi alyansın sabiq komandanı “mən gözəl Cermukda oldum və mer mənə azərbaycanlıların hücumlarının şəhərin turizminə necə mənfi təsir göstərdiyini söylədi”, - deyə bildirib.
Məhz Nikol Paşinyan hakimiyyətə gələndən sonra Ermənistana ayağı açılan əski NATO-çunun Azərbaycanla bağlı belə təxribatçı açıqlamaları başında durduğu “Rasmussen Global” siyasi konsaltinqin pulqazanma taktikasıdır. Xankəndi-Laçın yolunun humanitar məqsədlər üçün gecə-gündüz açıq olduğunu bilə-bilə “bu yolun dərhal və şərtsiz açılmasını” Azərbaycan hökumətindən tələb edən Rasmussen, deyəsən, keçmiş siyasi statusundan şəxsi biznesinin çiçəklənməsi üçün istifadə etməyə çalışır.
ARAYIŞ: 2009-2014-cü illərdə NATO-nun baş katibi postunda çalışan Anders Foq Rasmussenin bu, Ermənistana ilk səfəri deyil. O, 2012-ci ilin sentyabrında İrəvanda olub. Ser Rasmussen hələ hərbi blokun patronu postunda ikən erməni diasporu ilə sıx əlaqələrə malik olması heç kəsə sirr deyildi...
İndi lektora çevrilmiş sabiq komandan Rasmussen İrəvan istebleşmenti üçün təşkil etdiyi “siyasi hazırlıq kursları”nda mövzudan daha irəli gedərək, Hayastanın Qarabağa BMT-nin mandatına malik yeni sülhməramlı missiyasının yerləşdirilməsi ilə bağlı niyyətinə ekspert kimi münasibət bildirib: “Tərəflərin boynuna götürdüyü öhdəliklərin icrasına nəzarəti həyata keçirəcək beynəlxalq sülhməramlı hərbi kontingent üçün zəruri mexanizm yaradılmalıdır. Amma Rusiyanın iştirakı olmadan bu mandatı əldə etmək çətindir. Çünki Rusiya BMT Təhlükəsizlik Şurasının daimi üzvü kimi veto hüququna malikdir”.
***
Sıravi siyasətçiyə də aydındır ki, NATO-nun əski baş katibinin və onun arxasındakı qüvvələrin əsas məqsədi bölgədə Qərbin iştirakını təmin edəcək layihələri yeritmək, Rusiyanın bu coğrafiyada nüfuzunu heçə enənə qədər zəiflətməkdir. Əgər belə deyilsə, Qarabağ münaqişəsinə, sülh danışıqları üzrə ikitərəli, üçtərəfli dialoqa qəti dəxli və heç bir beynəlxalq statusu olmayan “Rasmussen Global”ın İrəvanda nə işi var? Elə mətbuat konfransında çıxışı zamanı Rasmussenin rəsmi İrəvana Kremldən uzaqlaşmaq, yeni “dostlar”ını (Qərbli –red.) bölgəyə gətirmək ruhunda müraciətləri də təsadüf sayılmamalıdır.
Amma daha gecdir. Bu gün belə altməqsədli meyillərin qarşısında özünün müstəqil və suveren siyasətini yeridən, bölgənin böyük güclərin siyasi-coğrafi mübaizə meydanına çevrilməsinə mane olan, milli maraqlarını hər şeydən uca tutan Azərbaycan var. 44 günə tarixi ədaləti bərpa edən Bakı doğma Qarabağımızla bağlı bütün yad çağırışları da dəf edəcək.
Bu səfəri, təbii olaraq, özünün biznes layihəsi, pul qazanmaq trendi sayan Rasmussen, yəqin İrəvandan məmnun yola salınıb. Bunu onun Ermənistanın cırılmış bayrağının altında fotoqrafa poza verərkən üzündən aşkar sezilən hay konyakının təsirinin sərməst işartılarından sezmək mümkündür...
İmran BƏDİRXANLI, “Xalq qəzeti”