Biz 1988-ci ilin sonlarında öz dədə-baba torpaqlarımızdan qovulmuşduq. Bəzən bu sözü deyəndə məni qınayırlar ki, “qovulduq” sözünü dilə gətirmə, erməni kimdir ki, bizi qovur? Ancaq fakt faktlığında qalır. Güclü himayədarlarına, son iki əsrdə formalaşdırılmış lobbinin və diaspor təşkilatlarının dayağına arxalanan ermənilər bizi öz yurdumuzdan ... həqiqətən, qovdular.
Azərbaycan Prezidenti İlham Əliyevin ötən il dekabrın 24-də Qərbi Azərbaycan İcmasının inzibati binasında yaradılan şəraitlə tanış olandan sonra Qərbi Azərbaycandan olan bir qrup ziyalı ilə görüşündə bizi doğma yurda qayıtmağa ruhlandıran fikirlər səsləndirdi. Dövlət başçımızın Qərbi Azərbaycan İcmasını bundan sonra daha mütəşəkkil formada fəaliyyət göstərməyə səsləməsi hamımız üçün çox önəmlidir – həm Qərbi Azərbaycandan olan insanlar, həm də bütün Azərbaycan xalqı üçün.
Cənab Prezident tövsiyə edir ki, biz bu işi daha məqsədyönlü şəkildə aparmalıyıq. Əlbəttə, bu layihənin reallaşdırılmasına bütün soydaşlarımız kömək etməlidirlər. İlk növbədə isə biz – Qərbi Azərbaycandan didərgin salınmış yüz minlərlə insan daha fəal olmalıyıq. Təbii ki, hərə öz bacardığı qədər. Mənim bacardığım isə həmin dəhşətli günlərin tarixçəsindən bəzi məqamların yenidən dünya ictimaiyyətinə çatdırılmasına kömək etməkdir.
... İndi gecənin yarısı yurd haqda fikirləşə-fikirləşə bu yazını yazdıqca, gözlərim önünə həyət-bacası ilə, bütün şəraiti ilə doğma olan birmərtəbəli o ata evimiz gəlir. Yurd dediyim öz köhnə ata evini təzə dəbli evimdən qat-qat üstün tutduğum bir vaxtda yurdu tərk etməli olduq. Ömrümün, uşaqlığımın ilkinliyi ilə bağlı olan o ata evini. Və bir də hiss eləyəndə ki, bu ilkinlikdən birdən-birə ayrılmısan, bütün əlaqələrin xırp kəsilib, adamı dəhşət bürüyür. Görün, o ixtiyar qocalar indi nələr çəkir.
Mənim üçün ən faciəlisi, ən ağırı evimdən axırıncı çıxdığım gün oldu. Nağıllarda deyildiyi kimi, çəkidə yüngül, vəzndə ağır, bəzi ev əşyalarını (baxmayaraq ki, mənim evimdə belə əşyalar yox idi) çıxarandan sonra, anamla ailəmi yurdla vidalaşdırıb, həyətdə bizi gözləyən Mamed müəllimin minik avtomobilinə əyləşdirdim. Atam isə uşaqlarla Gürcüstanda idi. Mən bir də geri, evə qayıtdım. Hər daşını, kərpicini isidə-isidə, əllərimlə sığallaya-sığallaya tikdiyim evimlə bir də vidalaşmağa qayıtdım. Bütün otaqları yenə də bir-bir gəzdim, axırıncı otaqda yarım saatdan artıq qaldım…
Həyətə çıxanda isə daha özümü saxlaya bilmədim. Titrəyə-titrəyə üstümə atılan itlərim, sanki, fəryad qoparıb, məndən imdad diləyirdilər. Başa düşürdülər ki, son görüşdü – itlərimi, evimi qoyub gedirdim. Aşağı əyildim, itlərlə vidalaşmaq üçün. Hər ikisi də dal ayaqları üstə qalxaraq titrəyirdilər. Yaşla dolu gözlərimlə birtəhər gözlərinin içinə baxdım. Hər iki itin gözündə yaş parıltısı gördüm. Bu dəfə hönkürtümü saxlaya bilmədim. İtlərin çox duyumcul olduğunu eşitmişdim. Axır ki, gözlərimlə də gördüm. Külək adamı yıxırdı. Elə bərk tufan başlamışdı ki. Bu da təbiətin fəryadı idi. Bir neçə gündən sonra da zəlzələ olacaqmış. Təbiətin zəlzələ fəryadı.
… Sənə qayıdıram, itirdiyim yurd, a doğma kənd, doğulub boya-başa çatdığım, çox yaxşılıqlarını, haqq-sayını gördüyüm a ixtiyar ulus! Çox sağ olsun genişürəkli xalqım, təmənnasız yaxşılıqlarına görə, mənzilimə, işimə, bəzi qayğılarımın yüngülləşdiyinə görə. Yuxularımdan çıxmayan o yurda, o ata evinə mən nə deyim. Mən qırmızı daşla tikilən ikimərtəbəli evimi erməni ilə beton mənzilə dəyişmişdim.
Dağ Borçalıdı mənim elim, ulusum. Qənimimə çevrilmək üçün kəsilib Sovet Ermənistanı yaradılan, Borçalı deyilən böyük bir mahalın dağlıq hissəsidi. Bu, dağlarla əhatə olunmuş böyük ərazidi. Dağlararası düzənliklərlə, çökəkliklərlə zəngin olan bu torpaq həm də Loru vadisi adlanır. Bu gün dilimizdə geniş işlənən “Loru dili” ifadəsi də bu torpağın adı ilə bağlıdı. Əgər “Loru dili”ndə ifadəsi eşidirsinizsə, bu o deməkdir ki, sadə, canlı xalq dilində danışmaq nəzərdə tutulur. Loru yurdları oğuz ellərinin, elatlarının yurdu olduğu kimi (bunu tez-tez rastlaşdığın oğuz qəbirləri nəql edir), Loru dili də oğuz elatının dilidi, Dədə Qorqud dilidi. Loru böyük bir ərazidə yerləşir. Ola bilsin ki, yaşı üç min ili adlayan Lulubi imperiyasının adı Loru toponimində qorunub saxlanır.
Mərkəzi Calaloğlu (Stepanovan) olmaqla, bir tərəfi Qarakilsə (Kirovakan), bir tərəfi isə Gümrüyə (Leninakan) qədər uzanır. Ağbaba Amasiya ellərinə çiyin-çiyinə söykəkdir. Qədim Loru Ağbabaya, Ağbaba isə Qarsa söykənir. Loru dağlıq yerdir. Ancaq aran səmti Canbaxçadı. Mənim doğulub, boya-başa çatdığım kəndim Canbaxçada yerləşir. Evli, Qızılkilsə, Sarıyal, Dəmirçilər, Başkeçidin kəndləri olan Muğanlı və Saatlı Canbaxçanın ən şən kəndlərindəndi.Özü də Dağ Borçalının arana baxan kəndləridi. Canbaxçanın kəndləri Qarayazı, Sarvan çökəklərindəki, Qazax ellərindəki qardaş-bacılarımızın, ağbirçəklərimizin, dədələrimizin yaylaqları idi.
O adları çəkilən kəndlərin mütləq çoxusu Qazax mahalından qopanlardı. O yerlər Qazax ellərinin yaylaq yerləri olub. Mənim kəndim Evli, İkinci Şıxlıdan ayrılmadı. “Talıföyü” İkinci Şıxlıda yaşayan böyük bir nəsildi. Qurudlu-motallı, qaymaqlı-ballı, aşıqlı, qonaqlı-qaralı, ağ-ağ sürülü Canbaxçam, Oy dərəsi.
Mənim Evli kəndim! Ağır elim, ulusum! İndi minlərlə qaçqının pasportunda doğulduğu məkan kimi qalırsan, ürəyində Vətən kimi yaşayırsan, qanımda dərd kimi qövr eləyirsən. Çox keçməkeşlər, qeylü-qallar görübsən. Yaşın boyu dörd dəfə adın dəyişib, hərəsi də bir tarixi hadisə ilə bağlı: Xarrat, Aşıq Novruz, Molla Eyyub, Evli. Hələ bu mən bilənlərdir.
Qaçqınlardan biri deyir ki, bu yaxınlarda evimizə kənd sovqatı gətirmişdilər, kəkotulu, itburnulu, qurudlu bir bağlama idi. Balaca nəvəm bağlamanı qucaqlayıb ağlamsına-ağlamsına bir müddət heç kimə vermədi. Yurd ətri, kənd iyisi duyduğu üçün. Mənim ömürlük yurd ətri duyacağım Molla Eyyubum. Dağın, düzün, çiçəyin-gülün hopub canıma, qanıma. Mərd adamların, təmənnasız yaxşılıqlar eləyən övladların, bir iş görmək istəyərkən qolundan yüz-yüz əllə yapışan xeyirxahların necə uca eləmişdi səni. Varın-bərəkətin göydən yağırdı. Bir də onu xatırlatmaq istəyirəm ki, qaçmamışıq o yurdlardan, geri çəkilməyə məcbur olmuşuq. Ürəklərimiz girov qalır o yurdlarda.
“El yeridi, yalqız qaldın səhrada”... Dədə Ələsgərin peyğəmbər fəhmi ilə dediyi bu ağrılı misra elə bil öz axirət taleyi üçün, bir də qədim Göyçənin qəmgin taleyi üçün deyilibmiş. Başımıza gələnləri xatırladıqca, yalqız qalan neçə-neçə tarixi abidələrimizin, ocaqlarımızın, inanc yerlərimizin, yaşı dünyanın özü qədər olan qəbiristanlıqlarımızın acısını qışqırır bizə bu misra. Çox keçməz, el yenidən dönər Qərbi Azərbaycan deyilən o dogma yurd yerlərinə.
Tahir TALIBLI,
Əməkdar jurnalist