Onların bu cəhdləri də fiaskoya uğrayacaq

Azərbaycan Ordusunun ötən ilin sentyabrında ərazi bütövlüyümüzün tam təmin edilməsi, Qarabağ iqtisadi rayonunun hər yerində suverenliyimizin bərpa olunması, separatçı rejimin varlığına son qoyulması üçün keçirdiyi lo­kal xarakterli antiterror tədbirlərinin ildönümü yaxınlaşdıqca, Ermənistan­dakı revanşistlərin və dünyadakı hay havadarlarının səsləri yüksəlməkdədir. Hər bir məsələdən öz mənfəətləri üçün istifadə edən bu dairələr lokal xarak­terli antiterror tədbirlərinin gələn ay qeyd edəcəyimiz birinci ildönümündən də yararlanmağa çalışırlar. Onlar bu hadisələrdən yenə də Azərbaycana qarşı hansısa sanksiyaların tətbiqi, ölkəmizin, guya, “etnik təmizləmə” həyata ke­çirməsi kimi heç kəsin inanmadığı yalanları gündəmə gətirmək üçün istifadə etməyə cəhd göstərirlər.

Xaricdə bu istiqamətdə əsas canfəşan­lığı yenə də bədnam Amerika Erməni Milli Komitəsi (ANCA) edir. Komitənin təşəb­büsü ilə sentyabrın 19-da ABŞ Konqresin­də lokal xarakterli antiterror tədbirlərinin birinci ildönümü ilə bağlı tədbir keçirilə­cək. Əlbəttə, onların yaydığı məlumatda məlum hadisələrin adı belə təhrif olunub. Zərurətdən, son çarə kimi həyata keçirilən antiterror tədbirləri “Azərbaycanın Art­saxa amansız hücumunun ildönümü” kimi qələmə verilib. ANCA-nın genişmiqyaslı tədbiri gözlənildiyi kimi, erməni lobbiçilə­rin çoxluq təşkil etdiyi ABŞ Konqresində keçiriləcək. Komitənin yaydığı məlumatda bildirilib: “Konqres liderləri, ictimai fəal­lar və koalisiya tərəfdaşları sentyabrın 19-da Kapitoli təpəsi adlandırılan yerdə Azər­baycanın “Artsax”da 2020-2023-cü illərdə törətdiyi “soyqırımı”na görə məsuliyyətə cəlb olunmasına həsr olunmuş tədbirdə iş­tiraka toplaşacaq və yerli ermənilərin qlo­bal mandat və beynəlxalq müdafiə altında təhlükəsiz qaytarılmasına çağıracaqlar. “Cavabdehlik 2024” adlı tədbir Azərbay­canın 2023-cü il sentyabrın 19-20-də on aylıq mühasirədən (?) sonra etnik təmiz­ləmə və 120 min etnik erməninin öz tarixi vətənlərindən qovulması (?) ilə başa çatan Artsaxa amansız hərbi hücumunun birinci ildönümünə təsadüf edir”.

ANCA-nın icraçı direktoru Aram Ambaryanın sözlərinə görə, onlar Ame­rikanın hər yerindən Vaşinqtona ona görə toplaşırlar ki, Azərbaycana hərbi yardıma qanunvericilik yolu ilə qadağa qoyulsun və ölkəmizə sanksiyalar tətbiq etməklə bizi məsuliyyətə cəlb etsinlər: “Birləş­miş Ştatlar BMT Təhlükəsizlik Şurasının “Artsax”ın yerli ermənilərinin beynəlxalq himayəyə alınmasını tələb edən qətnamə­sinin icrasına rəhbərlik etməklə bu prosesi geri qaytara bilər və qaytarmalıdır”.

Tədbir çərçivəsində senatorların və di­gər nümayəndələrin çıxışları olacaq, ABŞ rəhbərliyinin Azərbaycana qarşı sanksiya­ların tətbiq olunması, “soyqırımından sağ çıxanlara” yardım göstərilməsi və ermə­nilərin “Artsax”a təhlükəsiz qayıtmasına dəstək verilməsi ilə bağlı prosesə rəhbərlik etməsinin əhəmiyyəti vurğulanacaq.

Qeyd edək ki, ANCA dünyanın su­perdövlətində geniş fəaliyyət göstərən er­məni diasporunun əsas təşkilatıdır. Azər­baycan torpaqlarında etnik separatizm ocağının yaranmasında, sonrakı dövrdə torpaqlarımızın işğal olunmasında və bu işğalın uzun illər davam etməsində AN­CA-nın da özünəməxsus rolu var. Yaxşı təşkilatlanmış komitə bütün digər ermə­ni diaspor qurumlarından daha çox nü­mayəndəliyə və ofis şəbəkəsinə malikdir. Təşkilatın mənzil-qərargahı Vaşinqton­da yerləşir. Həmçinin onun İrəvanda da ofisi var. İşğalın davam etdiyi müddətdə ANCA-nın Xankəndidə də ofisi fəaliyyət göstərirdi. ANCA ABŞ-nin 25 ştatında 45 filiala malik olmaqla yanaşı iki regi­onal ofisə də malikdir. Bunlar Qərbdə Qlendeyl (Kaliforniya ştatı) və Şərqdə Utertaun (Massaçusets ştatı) şəhərlərində yerləşən ofislərdir. Təşkilatın Fransa, Bö­yük Britaniya və İtaliyada da nümayən­dəlikləri fəaliyyət göstərir. Bir müddətdir ki, ANCA Avropa İttifaqı nəzdində də nü­mayəndəliyə malikdir. Komitə özündə 10 min üzvü birləşdirərək 3,5 milyon dollar illik büdcəyə malikdir. ANCA müxtəlif gənclər təşkilatlarının, mətbu orqanların və institutların təsisçisidir. Qurum “Mas­sis Weekly”, “Armenian Liberty”, “Snark News Agency” və “Armenian News” kimi media resursları ilə yaxın əlaqələrə malikdir.

Təşkilatın əsas işi qondarma erməni soyqırımını tanıdılması, erməni diaspo­runun siyasi proseslərdə iştirakının təmin edilməsi, ABŞ–Ermənistan əlaqələrinin gücləndirilməsi, Ermənistana və Qarabağ­dakı keçmiş separatçı rejimə dəstək veril­məsi, erməni diasporunun maraqlarına uy­ğun olaraq ABŞ–nin xarici siyasətinə təsir göstərilməsidir. Təsadüfi deyil ki, ANCA 1997-ci ildə qondarma soyqırımını daha yaxşı tədqiq və təbliğ etmək üşün “Erməni milli institutu”nu təsis edib.

Hayların ABŞ-dəki diasporunun dövlət orqanlarına təsirinə gəldikdə isə demək la­zımdır ki, 1995-ci ildə Konqresdə erməni məsələləri üzrə ikipartiyalı (yəni, hər iki partiyanın nümayəndələrinin daxil olduq­ları–S.H.) konqresmenlər qrupu yaradı­lıb. İngilis dilində “Armenian Caucus” adlanan qrupu demokrat Frenk Pallone və respublikaçı Edvard Porter təsis edib. Sonradan Porterin yerini Co Nollenberq tutub. Bu qrupun fəaliyyəti Ermənistanın və erməni diasporunun maraqlarını əks et­dirən bir sıra sənədlərin Konqresin gündə­liyinə gətirilməsindən və qəbulu üçün səy göstərməkdən ibarətdir. Qrupun üzvü olan bir çox konqresmen 1992-ci ildə ABŞ-nin Azərbaycana birbaşa dövlət yardımını qa­dağan edən “Azadlığa dəstək aktına 907-ci düzəliş”in lehinə səs verən şəxslərdir. Konqresdəki qrupdan əlavə Demokratlar və Respublikaçılar partiyalarında erməni şuraları mövcuddur. ABŞ qanunvericilik orqanlarında bir neçə güclü lobbiçi ermə­ni məsələsi ilə məşğuldur. Onlardan ən məşhuru Senatın maliyyə məsələləri üzrə komitəsinin keçmiş sədri Robert Douldur. O, onilliklər boyu erməni məsələlərinin Konqresdə və Senatda özünə yer tapma­sı üçün çalışıb. ANCA 2001-ci ildə onu bu səylərinə görə mükafata layiq görüb. Həmçinin, erməni lobbiçiləri xarici siyasə­tin maliyyələşdirilməsi üzrə alt komitənin rəhbəri, senator Mitç Makkonelin öz tərəf­lərinə çəkilməsi işində uğura nail olub. ABŞ-də yaşayan ermənilər Makkonelə və onun təmsil etdiyi ştatda fəaliyyət göstərən Respublikaçılar Partiyasının bölməsinə 200 min dollar vəsait ianə ediblər. Bundan əlavə, erməni diasporu Makkonelin rəh­bərlik etdiyi respublikaçı senatorlar qrupu üzvlərinin yenidən seçilməsi üçün də ko­mitəyə küllü miqdarda vəsait ayırıb.

ANCA və digər erməni diaspor qrup­larının əsas məqsədi bunlardır: Qondarma erməni soyqırımının ABŞ hökuməti tərə­findən tanınması, Qarabağdan öz xoşları ilə getmiş ermənilərin geri qaytarılması və onlara yardım göstərilməsi, bədnam 907-ci düzəlişin qüvvədə saxlanılması, Ermənis­tana ABŞ tərəfindən yardım göstərilməsi, Türkiyəyə və Azərbaycana müasir silah satışının qarşısının alınması.

Bu təşkilat bir vaxtlar Bakı–Tbilisi–Ceyhan, Bakı–Tbilisi–Qars, Bakı–Tbilisi–Ərzurum kimi layihələrə də qarşı çıxırdı. Ancaq onların bütün cəhdləri boşa çıxdı. Azərbaycan qarşısına qoyduğu bütün iq­tisadi layihələri uğurla reallaşdırdı. Bu­nun nəticəsində ölkəmizə böyük məbləğ­də valyuta axınının gəlməsi reallaşdı. Bu isə iqtisadiyyatımızın güclənməsinə, ordu quruculuğu məsələsinə daha böyük diqqət ayırmağımıza, müasir silah-sursat almağı­mıza gətirib çıxardı. Bütün bunlar 2020-ci ildə 44 günlük Vətən müharibəsini qalibiy­yətlə başa vurmağımızda mühüm rol oy­nadı. Əlbəttə, burada əsas rolu yetişdirilən vətənpərvər gənc nəslin oynadığını da xü­susi vurğulamalıyıq.

Amerika erməniləri, onların diaspor və lobbi qurumları indiyədək bir çox təxribat­çı əməllərə imza atmışdılar. Amma onların, demək olar ki, hamısı uğursuzluğa düçar olmuşdu. Ermənilərin Konqresdə hazırlaş­dığı budəfəki təxribatın da uğursuz olacağı şübhəsizdir. Nyu-cersili ermənipərəst se­nator Robert Menendesin başına gələnlər, zənnimizcə, erməni diaspor və lobbisinə görk olmalıdır.

Beynəlxalq Münasibətlərin Təh­lili Mərkəzinin rəhbəri Fərid Şəfiyev “XQ”-yə açıqlamasında bildirdi ki, ermə­ni lobbisinin ABŞ-də Azərbaycana qarşı dinləmələr, hansısa tədbirlər keçirməsi ilk dəfə deyil. Onun sözlərinə görə, bu tədbir­lərin indiyədək heç bir təsiri olmayıb, bun­dan sonra da olmayacaq: “Əksinə, hesab edirəm ki, belə tədbirlər hazırda Ermənis­tan və Azərbaycan arasında aparılan sülh danışıqları prosesinə neqativ təsir göstərir. Amma bu, erməni radikallarını, hətta, mən deyərdim ki, irqçilərini və onların ANCA təşkilatını maraqlandırmır”.

F.Şəfiyev qeyd etdi ki, erməni lobbisi­nin maraqlarına xidmət edən ABŞ konqres­menlərini ancaq maliyyə vəsaiti və erməni əsilli seçicilərin səsi maraqlandırır: “Biz bugünlərdə Demokratlar Partiyasının üzvü olan senator Robert Menendesin aqibətini gördük. Onunla bağlı korrupsiya, rüşvət faktları açıqlandı. Nəticədə, o, siyasi kar­yerasını bitirdi. İndi isə yenə də Konqresdə hansısa şou təşkil edirlər. Yenə də deyirəm, onun real vəziyyətə heç bir təsiri olmaya­caq”.

Səxavət HƏMİD
XQ