Bu gün Bakıda Niderlandın müstəmləkəçiliyi altında olan Boneyra adasına həsr olunmuş beynəlxalq konfrans keçiriləcək. Tədbir Bakı Təşəbbüs Qrupu və Boneyra İnsan Hüquqları və Dəyişiklik Naminə Hərəkat tərəfindən təşkil olunub. Bu barədə Bakı Təşəbbüs Qrupunun icraçı direktoru Abbas Abbasov çərşənbə günü jurnalistlərə bildirib.

O qeyd edib ki, Boneyra adası cari ilin oktyabrında BMT-yə qətnamə layihəsi təq­dim edəcək. Bu sənəd adanın kolonizasiya siyahısına əlavə olunmasını özündə əks et­dirir. 

“Bakıda səfərdə olan Boneyra adasının nümayəndə heyəti Bakı Təşəbbüs Qrupuna burada birgə beynəlxalq konfransın təşki­li ilə bağlı müraciət edib. Biz konfransın avqustun 22-də təşkili barədə qərara gəlmi­şik. Nümayəndə heyəti qətnamə layihəsini təqdim etməzdən əvvəl Bakıdan bununla bağlı dünyaya çağırış ünvanlayacaq”, - deyə icraçı direktor əlavə edib.

Konfrans iştirakçıları

Boneyra adasının nümayəndə heyə­tinin üzvü, Boner Dəyişim Hərəkatının yaradıcısı Ceyms Finis:

– Bizim adamız Niderlandın müstəm­ləkəsidir. İnsanlarımız çox çətin vəziyyət­dədir. Belə ki, adamızdakı bütün qanunlar müstəmləkə olduğumuz üçün Niderland tərəfindən yazılır. Bizim xalqımız demok­ratik hüquqlarına sahib deyil. 

Müstəmləkəçilikdən əziyyət çəkən ölkələrə dəstəyinə və bizə sözümüzü demək üçün şərait yaratdığına görə Azərbaycan dövlətinə və xalqına təşəkkür edirəm. 

Niderland hökuməti qanunları dəyiş­dirib və artıq Avropa İttifaqı ölkələrinin vətəndaşı olan insanlar buraya köçmək hüququ əldə ediblər. 

2030-cu ildə ölkəmizin yerli əhalisinin 30 faizdən az olacağı deyilir. Demək olar ki, biz öz ölkəmizdə milli azlıq olacağıq. İnsanlarımızın bu vəziyyətdən şikayət et­mək hüquqları belə yoxdur.

Boneyra adasının nümayəndə heyə­tinin üzvü, BMT yanında Afrikaəsilli Vətəndaşlar Forumunun üzvü June So­omer:

– Müasir dünyada hələ də müstəmləkə­çilikdən əziyyət çəkən, boyunduruq altında olan ölkələr, insanlar var. Təəssüf ki, buna qaradərili insanlar daha çox məruz qalırlar. Bakı Təşəbbüs Qrupu çox mühüm plat­formadır və müstəmləkəçilikdən əziyyət çəkənlərin yanında olduğunu hər zaman göstərir. 

Azərbaycanda olmaq, avqustun 22-də keçiriləcək beynəlxalq konfransa qatılmaq mənim üçün çox mühüm əhəmiyyətə ma­likdir.

Müstəmləkədən əziyyət çəkən insan­ların buraya gəlib öz səslərini dünyaya çatdırmaları çox yaxşı fürsətdir. Müstəm­ləkələrin və quldarlıq rejiminin afrikaəsil­li insanlara hələ də təsir etməsindən da­nışmaq da vacibdir. Biz bu ölkələrin necə müstəqillik əldə edə biləcəyi haqqında mü­zakirələr aparmalıyıq. O cümlədən biz on­ların bu müstəqillik yolunda nələr etdiyinə baxmalıyıq.

Belizin nümayəndə heyətinin üzvü, Belizin BMT-də daimi və səlahiyyətli sə­firi Karlos Füller:

– Bakı Təşəbbüs Qrupu müstəmləkə­çilikdən əziyyət çəkən ölkələr üçün çox mühüm platforma yaradır və buna görə təşəkkür edirik. Düşünürəm ki, biz və müstəmləkəçilikdən əziyyət çəkən digər xalqlar bunu dünyanın diqqətinə çatdırma­lıdırlar. 

Bizim ölkəmiz öz müstəqilliyini 1981-ci ildə əldə edib. Bu çox əziyyətli proses idi. Müstəqilliyimiz uğrunda əzmlə mübarizə aparmışıq və buna 20 ildən sonra nail ola bilmişik. Müstəmləkəçilikdən əziy­yət çəkən digər ölkələr və regionlar da öz səslərini ucaltmalıdır.