Rusiyalı ekspert İqor Korotçenko məğlub ölkənin nicatını bunda görür
“ABŞ-ın Azərbaycana real təzyiq rıçaqları yoxdur. Azərbaycanda daxili sabitliyi pozmaq mümkün olmayacaq. Çünki Azərbaycan Respublikası effektiv siyasi hakimiyyət sisteminə malikdir və onun strukturu möhkəmdir”.
Bu sözləri üç həftə bundan əvvəl Azərbaycan mediasına açıqlamasında deyən rusiyalı hərbi ekspert, Xəzər Strateji Araşdırmalar İnstitutunun baş direktoru İqor Korotçenko bu gün Bakı və İrəvanın tezliklə sülhə gəlmək təşəbbüsləri, Ermənistandan keçəcək Zəngəzur dəhlizi, Qərbin bölgədəki yeni prioritetləri, eləcə də Rusiya–Ermənistan münasibətlərinin indiki durumu ilə bağlı fikirlərini bölüşür. Bu barədə onun “Caliber.az”a verdiyi müsahibəsindən qısa icmalı oxucuların diqqətinə çatdırırıq.
Əvvəlcə Bakı və İrəvanın 7 dekabr tarixli birgə bəyanatına toxunan rusiyalı ekspert bunun irəliyə doğru sıçrayış olduğunu söyləyir. Əcnəbi platformalardan vasitəçisiz birbaşa dialoqa keçidin səmərəliliyinin artıq ilk əlamətlərinin göründüyünü qeyd edən İ.Korotçenko bu məsələdə müsbətlərlə yanaşı, mənfilərin də yer aldığına diqqəti çəkir:
“Bir məqam sual altında qalır: Ermənistan Qarabağ ermənilərinin problemini sazişin mətninə salmaqdan vaz keçməyə, konkret olaraq, özünün baza prinsipindən imtina etməyə hazırdırmı? Azərbaycan bu sualın cavabında tam məntiqli təklif irəli sürüb: onda sülh mətninə Ermənistandan zorla qovulan 300 min azərbaycanlının geri qayıtmasını nəzərdə tutan maddəni də daxil edək. Bax burada İrəvanın vurnuxması başlayır. Aydın məsələdir ki, ermənilər belə bir təklifə “hə” deməyəcəklər, necə ki, Azərbaycan da Qarabağ erməniləri ilə bağlı dediyimiz maddənin sülh müqaviləsinə salınması ilə razılaşmayacaq. Bakının dəmir məntiqi ondan ibarətdir ki, əgər Qarabağdan köçənlər bizim vətəndaşlardırsa, onda bu məsələ Azərbaycanın daxili işidir. Yox, əgər deyilsə, onda geri necə qayıda bilərlər? Yəni, sülh danışıqlarının bu cür dalana dirənmək riski də var”.
* * *
İkitərəfli danışıqlarda çox şeyin Nikol Paşinyanın mövqeyindən asılı olacağını deyən Korotçenko İrəvanın məsələyə mövcud reallıqdan çıxış edərək yanaşacağı və deyilən bənddən imtina edəcəyi təqdirdə, sülh sazişinin imzalanmasını mümkün hesab edir: “Əgər səslənən nikbin proqnozlara inansaq və cari ilin sonunadək sülh sazişi imzalanarsa, bu halda İlham Əliyev və Nikol Paşinyanın Nobel Sülh mükafatına namizədlikləri irəli sürülə bilər. Əlbəttə, bu sənədin gələn ildə də imzalanmasına heç nə mane olmayacaq. Əsas odur ki, bu, baş versin”.
Ermənistan baş nazirinin zərurət yaranarsa, növbədənkənar parlament seçkilərini keçirməyə hazır olduğu barədə açıqlamasına münasibət bildirən rusiyalı ekspert bunun aşağıdakı mümkün ssenaridən xəbər verdiyini güman edir:
“Misal üçün, o, sülh müqaviləsinə şərt irəli sürməkdən imtina edir və sənədi imzalayır. Amma bununla eyni vaxtda növbədənkənar seçkilərin və ölkə hökumətinə etimad haqqında referendumun keçirilməsini elan edir. Bu isə ona sülh sazişinə görə məsuliyyət yükünün ağırlığını öz boynundan cəmiyyətin qərarına transformasiya etməsinə imkan verəcək. Nikol Vovayeviçin hiyləgərliyini və buqələmunluğunu nəzərə alsaq – hər şey mümkündür. Belə düşünürəm ki, hər halda, o, reallıqdan çıxış edəcək, necə deyərlər, göylərdən Yerə enəcək. Daxildə uğursuz diplomat kimi nə qədər tənqid olunsa da, o, yaxşı başa düşür ki, sülh müqaviləsi ilə bağlı bundan sonrakı inadkarlığın heç bir faydası olmayacaq. Qarabağ Ermənistanın əlindən birdəfəlik çıxıb və onun bu mövzuda alver etmək imkanı belə qalmayıb”.
* * *
Bakı və İrəvanın imzalayacağı sülh sazişinin ABŞ, Fransa, Avropa İttifaqını Azərbaycana istənilən təsir rıçaqlarından məhrum edəcəyinə diqqəti çəkən İqor Korotçenkonun qənaətinə görə, onların sözdə buna tərəfdar olduqlarını bəyan etmələrinə baxmayaraq, əslində, sazişin bağlanmamasında maraqlıdırlar:
“Misal üçün, bu günlərdə Aİ Ermənistanda müşahidə missiyası kontingentinin artırılması barədə qərar verdi. Bu qərarı Azərbaycana, İrana və Rusiyaya qarşı düşmən davranışı kimi izah etmək mümkündür. Çünki həmin mülki müşahidəçilərin özəyini diplomatik çətir altında gizlənmiş Avropa ölkələrinin peşəkar kəşfiyyatçıları təşkil edirlər. Buraya ilk növbədə Fransanın DGSE, Almaniyanın BND kimi xarici kəşfiyyat qurumları, eləcə də digər xüsusi xidmət orqanlarının xəfiyyələri daxildir”.
Müsahibəsində Zəngəzur dəhlizi mövzusuna da yer ayıran rusiyalı ekspert Azərbaycanın artıq İrandan keçməklə özünə nəqliyyat marşrutunun inşasına başladığını söyləyir. Buna görə Ermənistandan keçməli olan Zəngəzur dəhlizinin lazımsız layihə kimi qalacağını əmin olan, İrəvanın ortaya atdığı yeni “dünyanın qovşağı” ideyasının da, əslində, yollarından və loqistikasından heç kimin faydalana bilməyəcəyi “dünyanın dalanı” olacağını deyən İ.Korotçenko Rusiya–Ermənistan münasibətlərinin hazırkı durumunu bu cür qiymətləndirdi:
“Bu münasibətləri “tarıma çəkilmiş naqil” kimi xarakterizə etmək olar. Paşinyan üzünü Qərbə çevirir, NATO ölkələrindən silah almağa başlayıb. Hər şeydən göründüyü kimi, İrəvan bu siyasətini bundan sonra da davam etdirəcək. Doğrudur, Nikol Moskvanı çox qıcıqlandıra biləcək kəskin hərəkətlərə yol verməyəcək, amma bu zaman MDB və KTMT çərçivəsində görüşlərdən və istənilən siyasi formatlarda iştirakdan məsafəli davranacaq. Fəqət münasibətlərin iqtisadi müstəvisi burada istisnadır. Buna görə İrəvan mütləq pauza götürəcək”. .
Hazırladı:
İ.HƏSƏNQALA
XQ