İki qardaş ölkə arasında imzalanmış Şuşa Bəyannaməsi isə Azərbaycanın bütün ərazisində Türkiyəni hüquqi tərəfə çevirib
Kənar qüvvələrin, üçüncü tərəfin bu məsələyə necə yanaşmasından asılı olmayaraq həqiqət bundan ibarətdir: Qarabağ Azərbaycan ərazisidir və Azərbaycanla Türkiyə arasında 44 günlük müharibədən sonra imzalanan müttəfiqlik barədə Şuşa Bəyannaməsi bizim ərazimizlə bağlı məsələlərdə Ankaranı hüquqi tərəfə çevirib.
Əslində, Türkiyə təkcə siyasi yox, həm də hüquqi baxımdan tərəfdir. Ona görə də Ankaranın Qarabağ iqtisadi rayonumuzda müvəqqəti yerləşdirilmiş Rusiya sülhməramlı kontingentinin qalma müddəti başa çatanda Qarabağdan çıxmasını istəməsinin hüquqi əsasları var.
Sülhməramlılar hansı tərəfin tələbatını ödəyir?
Rusiya XİN-in rəsmi nümayəndəsi Mariya Zaxarova Türkiyə Prezidenti Rəcəb Tayyib Ərdoğanın NATO-nun Vilnüs Zirvə toplantısından sonra mediaya verdiyi Rusiya sülhməramlılarının 2025-ci ildə Qarabağdan çıxmasına dair açıqlamasına “Ankara üçtərəfli bəyanatın tərəfi deyil” formasında münasibət bildirib. Rəsmi Moskva bununla Ankaraya öz mesajını çatdırmış oldu: “Yəni, Türkiyə Qarabağ məsələsinə qarışmamalıdır”.
Amma postmüharibə dövrünün yaratdığı reallıqlar və ortada olan hüquqi və hərbi əsaslar Zaxarovanın dediyindən fərqli həqiqəti diktə edir. Rusiya XİN rəsmisinin açıqlamasında istinad etdiyi 2020-ci il 10 noyabr Bəyanatının 5-ci bəndində qeyd olunur: “Münaqişə tərəflərinin razılaşmalara əməl etməsinə nəzarətin səmərəliliyinin artırılması məqsədilə atəşkəsə nəzarət üzrə sülhməramlı mərkəz yaradılır”. Məhz həmin razılaşmaya əsasən, Ağdamda Türkiyə–Rusiya Birgə Monitorinq Mərkəzi təşkil edildi, türk əsgəri də qarşılıqlı razılaşmaya uyğun olaraq, bölgəyə daxil oldu. İndi monitorinq mərkəzinin konkret əməli fəaliyyətinin nə qədər səmərəli və effektiv olub-olmaması məsələsini kənara qoyaq. Fəqət üçtərəfli razılaşmaya əsasən, Ağdama əsgər göndərən Türkiyə bu razılaşmanın hüquqi (de-yure) tərəfidir. Qarabağda fəaliyyət qiymətləndirməsinə baş vursaq, onda gərək iki il dörd aydan sonra bölgəni tərk edəcək Rusiya sülhməramlı kontingentinin öz funksiyasını, həmin üçtərəfli bəyanatla boynuna düşən öhdəliyi yerinə yetirmə əmsalına gərək “iki” yazaq. Amma Rusiya XİN-in rəsmi nümayəndəsi brifinqdə bildirir ki, sülhməramlılar regionda mühüm sabitləşdirici rol oynayırlar. Onların əsas funksiyası atəşkəs rejimini qorumaqdır: “Bölgədə gərgin vəziyyətin davam etdiyini nəzərə alsaq, onların fəaliyyətinə daha çox tələbat var. Cənubi Qafqazda sülhün qorunması İrəvan və Bakının, o cümlədən, Ankaranın da daxil olduğu regional oyunçuların maraqlarından irəli gəlir”.
Sülhməramlıqları müəmmalı görünən rus hərbçilərinə kimin “tələbat” hiss etdiyini, ya da onların kimin “tələbatını” ödədiyi artıq şübhəli görünür. Xüsusilə son aylar Ermənistan və Azərbaycan arasındakı şərti sərhəddə, eləcə də sülhməramlıların nəzarətində olan Qarabağda erməni separatçılarının törətdiyi hərbi təxribatlar bu şübhələrə əsas verir.
Ankara konkret sözünü deyir
Türkiyənin rus sülhməramlıların zamanı çatanda Qarabağdan çıxmasını səsləndirməkdə tam hüquqi əsası var. 2020-ci il 10 noyabr Bəyanatının 4-cü bəndində qeyd olunur ki, üçtərəfli razılaşmanı imzalamış tərəflərdən hər hansı biri sülhməramlı missiyanın bitmə müddətinə 6 ay qalmış buna xitam verilməsi üçün müraciət edə bilər. İndi bölgədə hadisələrin dinamikası, sülh danışıqları ətrafında cərəyan edən proseslər məhz bu sonluğa doğru inkişaf etməkdədir. Bu məqamda Ankaranın konkret mövqe sərgiləməsini də həmin reallıq şərtləndirir. Təbiidir ki, bu yerdə Moskva arsenalındakı bütün “diplomatik hücum vasitələrini” işə salmağa məcburdur. Ona görə də narazılıqlarını büruzə verir. Onu da qeyd etməyi zəruri sayırıq ki, hazırda regional və beynəlxalq müstəvilərdə müşahidə edilən ziddiyyətli geostrateji gəlişmələr fonunda Türkiyə–Azərbaycan strateji müttəfiqliyinin önəmi daha aydın şəkildə nəzərə çarpır. Zəfərimizlə başa çatan 44 günlik Vətən müharibəsindən sonra bu müttəfiqlik çoxvektorlu xarakter aldı. Müxtəlif platformalarda aparılan sülh danışıqlarında, zirvə görüşlərində Bakı daim yanında Ankaranın mənəvi və siyasi dəstəyini görür, doğma nəfəsini hiss edir. Bu mənada Türkiyə bizim ən yaxın və sadiq müttəfiqimiz, eyni zamanda bölgədə icraçısı və iştirakçısı olduğumuz bütün layihələrdə tərəfdaşımızdır.
Bu da danılmaz həqiqətdir ki, Xəzər və Qara dəniz hövzələrini əhatə edən böyük bir coğrafiyada siyasi proseslərin gedişatını, bölgənin iqtisadi cəhətdən inkişafını, xüsusilə də təhlükəsizlik məsələlərini Azərbaycan-Türkiyə əməkdaşlığından kənarda təsəvvür etmək qeyri-mümkündür. İki qardaş ölkənin öz tərəfdaşları ilə birlikdə həyata keçirdiyi nəqliyyat, enerji layihələri artıq qlobal əhəmiyyət daşıyır, Avropanın enerji təhlükəsizliyinin təmin olunmasında mühüm rol oynayır.
Dünyada bu tərəfdaşlığın analoqu yoxdur
Azərbaycan və Türkiyə arasındakı siyasi, iqtisadi, mədəni, eləcə də başqa sahələrdə əlaqələr dünya ölkələri üçün bir örnəkdir. Aybaay, günbəgün intensivləşən bu münasibətlər dostluğun, qardaşlığın zirvə nöqtəsi sayıla bilər. İki ölkə arasında dostcasına, qardaşcasına formalaşmış qarşılıqlı münasibətlərin anatomiyası hələ XX əsrin əvvəllərində Türkiyənin böyük dövlət xadimi, Qazi Mustafa Kamal Atatürkün ifadə etdiyi “Azərbaycanın sevinci sevincimiz, kədəri kədərimizdir”, XX əsrin sonlarında isə dünya şöhrətli siyasətçi, ulu öndərimiz Heydər Əliyevin dilə gətirdiyi “Bir millət, iki dövlət” kəlamlarda öz əksini tapıb.
Azərbaycan Respublikasının Prezidenti İlham Əliyevin aşağıdakı sözləri isə iki ölkə arasındakı çağdaş əlaqələrin xarakterini tam mənasında ehtiva edir: “Həm siyasi, həm iqtisadi, həm də başqa sahələrdə bizim əlaqələrimiz bütün ölkələr üçün örnəkdir. Mən dəfələrlə demişəm ki, bu gün dünyada Türkiyə və Azərbaycan qədər bir-birinə yaxın və bağlı olan ölkələr yoxdur. Bu, həqiqətdir. Bu, həm tarixi və etnik köklərə əsaslanan həqiqətdir, eyni zamanda, biz – iki qardaş ölkə öz siyasətimizlə bu birliyi daha da möhkəmləndirdik”.
“Bir millət, iki dövlət” prinsipinə söykənərək tərəqqi edən münasibətlərin yüksək səviyyədə olduğunu bildirən Azərbaycan Prezidenti İlham Əliyev hər iki ölkənin dövlət başçılarının qarşılıqlı səfərlərinin ikitərəfli siyasi və iqtisadi əməkdaşlığın inkişafında əhəmiyyətli rol oynadığını xüsusi olaraq vurğulayır: “Türkiyə ilə Azərbaycan arasında bütün sahələrdə əlaqələr çox uğurla inkişaf edir. Son iyirmi ilə yaxın müddətdə Türkiyə ilə Azərbaycan arasında əlaqələr daim yüksək səviyyədə olmuşdur. Bu gün bu gözəl ənənələr davam edir və bütün məsələlərdə əməkdaşlığımız yaxşı nəticələr verməkdədir.".
Türkiyə Prezidenti Rəcəb Tayyib Ərdoğanın Azərbaycana son səfəri zamanı keçirdiyi görüşlərdə hər iki dövlətin irəli sürdüyü yüksək səviyyədə Strateji Əməkdaşlıq Şurasının qurulması üçün verilən qərar da Türkiyə ilə Azərbaycan arasında gələcəyi əhatə edən və ikitərəfli münasibətlərdə atılan mühüm addımlardan biridir.
Türkiyə Azərbaycan üçün bütün dövrlərdə və bütün məsələlərdə güvənilən tərəf olub. Necə ki Qarabağ münaqişəsinin həllində də tərəf olaraq qəbul edilib. Bölgədə Türkiyə–Azərbaycan əməkdaşlığı, işbirliyi və tərəfdaşlığı olmadan heç bir təşəbbüs, heç bir layihə həyata keçirilə bilməz. Bunu Cənubi Qafqaza gözlərini zilləmiş heç kəs unutmamalıdır.
Fərid ŞƏFİYEV,
beynəlxalq münasibətlər üzrə ekspert
Türkiyə Ağdamda Rusiya ilə Birgə Monitorinq Mərkəzində tərəfdaşdır. Bəyanat üç ölkə arasında imzalanıb və Türkiyə orada yoxdur, – demək qətiyyən doğru deyil. Türkiyə orada var. Hətta adı üçtərəfli sənəddə keçməsə belə, onda niyə Monitorinq Mərkəzində fəaliyyət göstərir? Sadəcə aydındır ki, Rusiya Ermənistan və Azərbaycan arasında məhz postmünaqişə mərhələsini qəbul etmək istəmir. Onun üçün hələ də Ermənistan–Azərbaycan münaqişəsi öz qüvvəsində qalır. Bununla da Kreml Cənubi Qafqazda özünün təsir imkanlarını saxlayacağını düşünür. Amma faktiki olaraq bölgədə cərəyan edən hadisələr onu göstərir ki, Ermənistanın özündə də Rusiyanın təsiri xeyli zəifləyib. Yəni, münaqişə üzərində idarəetmə prinsipi, konsepsiyası artıq işləmir. Moskva həm də ona görə çox narahatdır ki, Azərbaycan və Ermənistan arasında sülh müqaviləsi imzalana bilər və bu faktın özü onun üçün münaqişənin arzuedilən sonluğu deyil. Çünki tərəflər arasında sülh sazişi imzalananda Rusiyanın burada mövqeyi zəifləyəcək, təsir rıçaqlarının effekti də sıfıra enəcək.
İmran BƏDİRXANLI, “Xalq qəzeti”