İyulun 4-də Moskvada Azərbaycanın daxili işlərinə kobud müdaxilə kimi qiymətləndiriləcək hadisə baş verib. Həmin gün Erməni Apostol Kilsəsinin Rusiya və Novo-Naxiçevan (?) yeparxiyasının şəhərdəki məbəd kompleksində erməni diaspor təşkilatlarının rəhbərləri və nümayəndələrinin, həmçinin erməni əsilli Rusiya Federasiyası vətəndaşlarının yığıncağı keçirilib. Yığıncağa Erməni Apostol Kilsəsinin yeparxiyasının rəhbəri, arxiyepiskop Ezras sədrlik edib.
İclas iştirakçıları Laçın–Xankəndi yolunun girişində iyunun 15-də Dövlət Sərhəd Xidmətinin hərbi qulluqçusunun yaralanması ilə nəticələnmiş hücumdan sonra, bu təxribatın səbəblərinin araşdırılması, sərhəd nəzarət-buraxılış məntəqəsinin və oradan keçidin təhlükəsizliyinin təmin edilməsi məqsədilə Azərbaycan tərəfindən həyata keçirilən müvafiq tədbirləri öz xislətlərinə uyğun şəkildə şərh ediblər. Hadisənin məsuliyyətini Azərbaycanın üzərinə qoymağa çalışan haylar Qarabağda yaranmış “kritik vəziyyəti” pisləyiblər. Onlar bölgədə humanitar böhranın (?) hər ötən gün daha da ağırlaşdığını, Ermənistandan Qarabağa qazın və elektrik enerjisi verilişinin kəsilməsinin (?)beynəlxalq hüquq baxımından müharibənin bir forması olduğunu bildiriblər.
Həmçinin qeyd olunub ki, iyunun 28-də Rusiya sülhməramlılarının məsuliyyət zonasında artilleriya və pilotsuz uçuş aparatlarının tətbiqi ilə baş vermiş və 4 Qarabağ hərbçisinin ölümü ilə nəticələnən “təcavüz aktı” Azərbaycanın Qarabağ məsələsini hərbi yolla həll etmək niyyətini bir daha təsdiqləyib. Bu şərtlər daxilində iclas iştirakçıları Vladimir Putinə müraciət etmək qərarına gəliblər. Müraciətdə Rusiya Prezidenti Qarabağ ermənilərini müdafiə etməyə, həmçinin Qarabağın blokadasının (?) aradan qaldırılması üçün səy göstərməyə və bölgə əhalisinin təhlükəsizliyinin və azad sosial-iqtisadi fəaliyyətinin təmin edilməsi üçün tədbirlər görməyə çağırılıb. Müraciəti imzalayanlar Putini əmin ediblər ki, onlar bu məsələlərin həlli üçün əllərindən gələni etməyə hazırdırlar (?).
Qeyd olunub ki, faşizmə qarşı Böyük Vətən müharibəsində kiçik “Qarabağ xalqı” (?) özünü qəhrəmancasına aparıb, on minlərlə oğul və qızını döyüş meydanlarına göndərib, sovetlər ölkəsinə 34 Sovet İttifaqı Qəhrəmanı, 7 nəfər “Şöhrət” ordeninin tam kavalerini, minlərlə zabit, onlarca general və 5 marşal verib. Bildirilib ki, “neonasistlər” (?) bu gün “qəhrəman xalqı” aclıqla, soyuqla, yoxsulluqla məhv etməyə çalışır, bütün ağlagələn və ağlasığmaz insan haqlarını tapdalayır, onları öz vətənlərini tərk etməyə məcbur etməyə, torpaqlarına sahib çıxmağa, “Artsaxın minillik xristian sivilizasiyasını məhv etməyə” çalışırlar. “Biz, bu müraciəti imzalayan Rusiya vətəndaşları Sizdən xahiş edirik ki, 2020-ci ilin noyabrında Rusiyanın könüllü olaraq qəbul etdiyi öhdəliklərə uyğun olaraq tarixi vətənimizi, Qarabağ ermənilərini qoruyasınız”, – müraciət bu sözlərlə bitir. Müraciəti 42 diaspor təşkilatı və 22 erməni əsilli Rusiya vətəndaşı imzalayıb.
***
Ermənilərin bütün tarixinin miflər üzərində qurulduğu heç kim üçün sirr deyil. Bəlkə də dünyada özünün keçmişini bu qədər bəzəyən, nağıllar, əfsanələr uyduran, hər yerdə özünün izini axtaran başqa bir xalq yoxdur. “Dənizdən-dənizə böyük Ermənistan” xülyası ilə yaşayan, hətta Nuh peyğəmbəri də az qala erməni çıxaran, onun gəmisinin Ağrı dağına yan alması ilə əsatirlər düzüb-qoşan hayların bu davranışı artıq bizi təəccübləndirmir. Buna baxmayaraq, onların yalanlarını cavabsız buraxmaq bu yalanları qəbul etmək demək olardı. Odur ki, gəlin, ermənilərin V.Putinə müraciətindəki yalanlara cavab verək.
Əvvəla, qeyd etmək lazımdır ki, Azərbaycan elə ermənilərin V.Putinə müraciətdə haqqında bəhs etdikləri sərhəd nəzarət-buraxılış məntəqəsini beynəlxalq hüquqa uyğun olaraq öz ərazisində yaradıb. Bu məntəqədən erməni əsilli Azərbaycan vətəndaşlarının Qarabağ iqtisadi rayonuna və Ermənistana giriş-çıxışı normal məcrada baş tutub. İyunun 15-də baş verən hadisədən sonra bu təxribatın səbəblərinin araşdırılması, sərhəd nəzarət-buraxılış məntəqəsinin və oradan keçidin təhlükəsizliyinin təmin edilməsi məqsədilə Azərbaycan tərəfindən müvafiq tədbirlər həyata keçirilir. Bu tədbirlərin blokada kimi qələmə verilməsi əsassızdır, Azərbaycana böhtan atmaqdır. Üstəlik, ermənilər beynəlxalq hüquqdan danışırlarsa, beynəlxalq hüquqa görə, Qarabağın dağlıq hissəsi də, aranı da Azərbaycanın ərazisidir. Bütün dünya Azərbaycanın Qarabağ üzərində suverenliyini tanıyır. Hətta, Ermənistanın baş naziri Nikol Paşinyan da may ayında Azərbaycanın 86,6 min kvadratkilometrlik ərazidə suverenliyini tanıdığını, bura Qarabağın da daxil olduğunu bildirib. Belə olan təqdirdə ermənilərin beynəlxalq hüquqdan danışması riyakarlıqdır.
Ermənilərin digər yalanı iyunun 28-də baş verən hadisələrlə bağlıdır. Məsələ ondadır ki, rəsmi İrəvan Qarabağda ordusunun olmadığını iddia edir. Ancaq həmin gün məhv edilən yaraqlılardan ikisi Ermənistan vətəndaşı idi və onların meyitləri Laçın yolundakı sərhəd nəzarət-buraxılış məntəqəsindən keçirilməklə Beynəlxalq Qırmızı Xaç Komitəsinin avtomobilləri ilə İrəvana aparıldılar. Bununla bağlı internetdə videogörüntülər də var. Məlumata görə, onlar İrəvanda döyüşlərdə həlak olanların dəfn edildikləri Yerablur qəbiristanlığında torpağa gömülüblər.
***
Müraciət müəllifləri yalançı olduqları qədər hiyləgərdirlər. Onların Prezident V.Putin, bütün Rusiya xalqı və iqtidarı üçün həssas olan Böyük Vətən müharibəsi, faşizm-nasizm və neonasizm mövzusundan sui-istifadə etməyə çalışmaları bu hiyləgərliyin göstəricisi sayıla bilər. Bu məsələdə də onlar yalan danışıblar. Böyük Vətən müharibəsində Azərbaycan vətəndaşı olan 23 erməni əsilli şəxs Sovet İttifaqı Qəhrəmanı adına layiq görülüb. Onlar təkcə Qarabağda yaşamayıblar. Bakıda, Gəncədə, Şamaxıda və digər bölgələrimizdə yaşayıblar. Üstəlik, onlar Azərbaycanın siyahısı ilə bu ada layiq görülüblər. Yəni, beynəlmiləl Sovet İttifaqında onların erməni kimliyi əsas məsələ deyildi. Qarabağdan 5 nəfərin marşal rütbəsinə layiq görülməsi iddiası isə nonsensdir. Azərbaycanda yaşayan ermənilərdən 3 nəfər marşal, 1 nəfər isə admiral rütbəsinə layiq görülüb. Onlardan biri də şəxsiyyəti ilə bağlı ziddiyyətli məlumatlar mövcud olan aviasiya marşalı Sergey Xudyakovdur (Armenak Xanferyants). Bu həmin Xudyakovdur ki, Mancuriyadan Moskvaya göndərilən bir təyyarə qızılın oğurlanmasında ittiham olunaraq 1945-ci ilin dekabrın 14-də Çitada həbs edilib. O, Moskvaya aparılıb dövlətə xəyanətdə ittiham olunub. Məhkəmə 1950-ci ilin aprelin 18-də Xudyakovu əmlakı müsadirə olunmaqla edam cəzasına məhkum edib və elə həmin gün güllələnib. İndi ermənilər V.Putini aldatmağa cəhd edə bilərlər, ancaq əminik ki, Rusiya Prezidenti köməkçilərindən bu barədə məlumat istəsə, həqiqətlər ona çatdırılacaq.
Neonasizm mövzusu da ruslar üçün çox həssasdır. Ancaq Rusiya rəhbərliyi onu da çox yaxşı bilir ki, müharibə illərində nasistlərə əlaltılıq edən Qaregin Njdeyə İrəvanın mərkəzində qranitdən heykəl məhz “qədim və sivil xalq” tərəfindən ucaldılıb.
Qarabağın “qədim erməni torpağı” olması iddiasına gəldikdə isə yalnız bir faktı qeyd etmək lazımdır. Ermənilərin Qarabağa köçürülməsini sübut edən tarixi mənbələrdən biri “Marağa–150” abidəsidir. Tərtər rayonunun Şıxarx qəsəbəsindəki “Marağa–150” abidəsi 1978-ci ildə ermənilərin özləri tərəfindən İran Marağasından Qarabağa köçürülmələrinin 150 illiyi ilə əlaqədar inşa edilib. XX əsrin sonlarında Ermənistanın torpaqlarımıza qarşı növbəti ərazi iddiaları başlayanda “Marağa–150” abidəsi ermənilər tərəfindən qəsdən dağıdılıb. Çünki bu abidə ermənilərin əzəli Azərbaycan torpağı olan Qarabağa köçürülməsinin sübutu idi. Bu baxımdan əminik ki, ermənilərin yalanlarla dolu daha bir müraciəti havada qalacaq. Qarabağla bağlı bütün məsələlər, burada baş verən hər şey Azərbaycanın daxili işidir və ona qarışmaq yolverilməzdir. Qarabağdakı, Ermənistandakı, Rusiyadakı, eləcə də dünyanın digər yerlərindəki bütün ermənilər bunu birdəfəlik yadda saxlamalıdırlar.
Aydın QULİYEV,
politoloq
– Azərbaycan 44 günlük Vətən müharibəsində dünya erməniçiliyinə, erməni separatizminə və lobbiçiliyinə elə zərbə vurub ki, onlar bu gün güclü hesab etdikləri dövlətlərin paytaxtlarında hər qapıya baş vurub ölkəmizin qələbəsinin təsirindən çıxmağa çalışırlar. Bugünlərdə Rusiyadakı erməni diaspor təşkilatlarının Vladimir Putinə etdiyi, başdan ayağa böhtan və iftiradan ibarət olan bəyanatına bu nöqteyi-nəzərdən yanaşmaq lazımdır. Eləcə də ABŞ-dakı erməni təşkilatları Prezident Co Baydenə müraciət ediblər. Ermənilərin bu iki dövlət başçısına ünvanladıqları müraciətlər mahiyyətcə və məzmunca oxşardır və sanki bir yerdə hazırlanıb. Sadəcə olaraq, sözlər və bəzi cümlələr fərqlidir. Hər iki halda Azərbaycanın 44 günlük müharibədə Ermənistana vurduğu zərbələrin təsirini zəiflətmək cəhdindən, ölkəmizin müharibədən sonra yaratdığı yeni reallıqların inkarından söhbət gedir. Bu müraciətlərdə söhbət erməni xalqının mənafeyindən getmir, təcavüzkar erməniçilik ideologiyasının maraqları çərçivəsində müəyyən hədəflərə nail olmaqdan gedir. Rusiyada və ABŞ-da erməni diasporu, erməni xalqının adından danışmaq istəyən dini konfessiyalar eyni yoldadırlar. Məqsədləri Azərbaycana böhtan atmaq və müharibədə uduzaraq bu gün Cənubi Qafqazda və dünyada ifşa olunmuş sifətlərini yenidən bərpa etmək, itirdikləri mövqeləri geri qaytarmaqdır. Ancaq bunların heç bir perspektivi yoxdur.
Səxavət HƏMİD,
“Xalq qəzeti”