Yüz otuz üç ildir ki, siyasi partiya adı altında terror fəaliyyəti həyata keçirən “Daşnaksütyun”un fəaliyyəti yaxın zamanda dayandırıla bilər. Bu barədə Ermənistan Milli Assambleyasının hakim “Vətəndaş sazişi”ndən olan deputatı Akop Aslanyan məlumat verib. Akop Aslanyan qeyd edib ki, “Daşnaksütyun” partiyasının fəaliyyətini dayandırılması zərurətdən irəli gəlir.
Onun antixalq partiyasına çevrildiyini bildirən erməni deputat, yaxın bir neçə il ərzində adıçəkilən təşkilatın ölü partiyaya çevriləcəyini və tarix səhnəsindən silinəcəyini qeyd edib.
• Arayış: 1890-cı ildə yaranan “Daşnaksütyun” partiyasının ilk proqramı 1894-cü ildə qəbul edilib. Elə ilk proqramında Türkiyəyə qarşı açıq ərazi iddiaları yer almış, türk torpaqlarının işğal edilməsi partiyanın əsas məramı kimi qeyd olunmuşdur. Azərbaycanın Naxçıvan və Qarabağ bölgələrinin işğalı da “Daşnaksütyun”un başlıca hədəflərinə daxil idi. Sonrakı dönəmlərdə Türkiyə və Azərbaycana qarşı yüzlərlə terror aktı həyata keçirən “Daşnaksütyun” bu gün də dünyanın əsas “terror ixracatçılarından” biri olaraq qalmaqdadır.
Sülh yolunda böyük əngəl
Tarixi faktların təhlili göstərir ki, “Daşnaksütyun” bütün dövrlərdə sülh yolunda böyük əngəl olub. “Daşnaksütyun” və onun liderlərinin bu gün də Azərbaycanla Ermənistan arasında sülh müqaviləsinin imzalanmasına mane olduğu, rəsmi İrəvana təzyiqlər göstərdiyi məlum həqiqətlər sırasındadır.
Paşinyan hakimiyyətini xain, təslimçi hesab edən “Daşnaksütyun” liderləri hesab edirlər ki, rəsmi İrəvanın yürütdüyü siyasət Ermənistanın maraqlarına uyğun deyil və daha çox Azərbaycanın mənafeyinə cavab verir. Nümunə üçün qeyd edək ki, “Daşnaksütyun” partiyası cari ilin aprel ayında verdiyi bəyanatda İrəvanın Bakı ilə sülh müqaviləsi bağlamağa hazırlaşdığını bildirib, bu müqavilənin imzalanmasına mane olmağın zəruriliyini qeyd edib: “Daşnaksütyun partiyasının ali orqanı bir daha təsdiq edir ki, Ermənistan hakimiyyəti çoxdan ölkəmizin təhlükəsizliyi ilə bağlı üzərinə götürdüyü öhdəliklərdən imtina edib. O bizi yeni müharibəyə və sülh gündəmi adı ilə yeni güzəştlərə aparır. Çətinləşən şəraitdə Ermənistanın milli maraqlarını rəhbər tutan bütün sağlam gücləri birləşməyə çağırırıq ki, düşmənin xidmətçiləri olan hökumətin öldürücü milli siyasətinin davam etməsinə imkan verməyək”.
Daim terror və təxribat siaysəti yürüdən “Daşnaksütyun”, hər zaman olduğu kimi, bu gün də sülh yolunda əsas maneələrdəndir. Görünən odur ki, “Daşnaksütyun”un bu qorxunc missiyası Ermənistan hakimiyyəti, eləcə də sadə ermənilər tərəfindən də dərk edilməkdədir. Məhz bunun nəticəsidir ki, tarixən Türk dünyasının minlərlə nümayəndəsinin qətlini təşkil edən “Daşnaksütyun”un fəaliyyətinin dayandırılması erməni millət vəkilləri tərəfindən dilə gətirilməkdədir.
Xatırladaq ki, “Daşnaksütyun” partiyasının fəaliyyəti 1994-cü ildə Ermənistanın o zamankı prezident Levon Ter-Petrosyanın fərmanı əsasında dayandırılmışdır. Yalnız 4 ildən sonra – 1998-ci ildə partiyanın fəaliyyəti sabiq prezident Robert Koçaryan tərəfindən bərpa olunmuş, partiya siyasi müstəvidə fəaliyyət azadlığı əldə etmişdir.
Partiyanın öz xalqına qarşı da ağır cinayətləri...
“Daşnaksütyun” tarixən Türkiyə və Azərbaycan xalqları ilə yanaşı, sadə ermənilərə qarşı da ağır cinayətlər törədib, yüzlərlə erməniyə yönəlik sui-qəsd təşkil edib. Buna səbəb həmin ermənilərin terrror təşkilatının tələblərinə əməl etməməsi, onların vəhşiliklərinə boyu əyməməsi olub.
“Daşnaksütyun” hələ 1892-ci ildə Tiflisdəki ilk qurultayında Türk dünyası ilə yanaşı, sadə ermənilərə qarşı da faktiki müharibə elan etmişdir. Qurultayda şüar xarakterli bir neçə qərar qəbul edilmişdi ki, bunlardan da biri “Sözündən dönənləri, erməni xainlərini öldür, intiqam al” idi. Bu şüar türk xalqına qarşı mübarizədə yer almaq istəməyən, terror təşkilatına pul ödəməkdən imtina edən, onun tapşırıqlarını icra etməkdən yayınan erməniləri qətlə yetirməyi nəzərdə tuturdu.
Türk tarixçisi Esat Urasın “Tarixdə ermənilər” əsərində qeyd edir ki, 1890-cıil aprelin 20-də Ərzurumda “Daşnaksütyun”un zülmündən cana doyan ermənilər üsyan etmiş, terror təşkilatına açıq itaətsizlik sərgiləmişdi. Vətəndaşların müdafiə dərnəyinin rəhbərlik etdiyi üsyanı yatırmaq üçün hərəkətə keçən “Daşnaksütyun” üsyançılara atəş açmış, nəticədə hər iki tərəfdən 100-dən çox şəxs həlak olmuş, 300-ə yaxın erməni isə yaralanmışdır (Esat Uras. Tarihte Ermeniler, s.459).
“Daşnaksütyun” partiyası 1988-ciilin Sumqayıt hadisələrində də, öz məkrli niyyətini həyata keçirmək üçün dinc erməniləri qətlə yetirmiş, törədilən cinayətlərə görə Azərbaycanı ittiham etmişdir. Həmin vaxt Sumqayıtdakı ermənilərin bir çoxunu “Daşnaksütyun”un hücumlarından məhz azərbaycanlılar qorumuş, sadə erməniləri labüd ölümdən xilas etmişlər.
...Sumqayıtda o zaman bir çox millətin nümayəndələri, o cümlədən, 14 min erməni yaşayırdı. Bu şəhərin tarixində heç vaxt millətlərarası ayrı-seçkilik olmamışdı. Bəs, necə oldu ki, bu hadisə baş verdi və bu, kimə lazım idi? Bu suallara cavab birmənalıdır. Sumqayıt hadisələri Qarabağı Azərbaycandan ayırmaq istəyən erməni millətçilərinə və onların havadarlarına lazım idi. Faciəli günlərin şahidləri olmuş ziyalılar da bu fikirdədirlər.
Bütün bu faktlar onu göstərir ki, “Daşnaksütyun” türk xalqı ilə yanaşı, həm də öz erməni toplumunun nümayəndələrinə qarşı da ağır cinayətlər törədib. Ona görə də bu partiyanın bağlanması hər şeydən öncə ermənilərin özünün mənafeyinə uyğundur.
Seymur ƏLİYEV