Ermənistan üzvü olduğu Kollektiv Təhlükəsizlik Müqaviləsi Təşkilatının baş katibinin müavini postuna öz namizədini müəyyənləşdirməkdən imtina edib. Ölkənin Xarici İşlər Nazirliyinin mətbuat katibi Vaan Hunanyan rotasiya qaydasına uyğun olaraq, nəzərdə tutulmuş prosedurun yerinə yetirilməyəcəyini təsdiqləyib. Qeyd edək ki, buna qədər də bir sıra erməni teleqram kanalları belə bir qərarın çıxarılacağına dair məlumat yaymışdılar. Hunanyanın təsdiqi həmin məlumatların doğruluğunu sübuta yetirdi. 

Bəli, KTMT-dəki məsul vəzifədən imtina Ermənistanın Rusiya ilə yollarını ayırmaq istiqamətindəki növbəti addı­mıdır. Axı, qurumdakı başlıca söz sa­hibi Rusiyadır. Deməli, İrəvanın hazırkı qərarı Ermənistanın Kremlin orbitindən çıxmaq istiqamətindəki səylərinin KTMT fazasının aktivliyinin göstəricisidir. 

Onu da diqqətə çatdıraq ki, Ermə­nistan buna qədər də KTMT müstəvi­sində Rusiya ilə ziddiyyətlərə getmişdi. Məsələn, rəsmi İrəvan bir müddət öncə qurumun Ermənistanda keçirilməli olan ənənəvi hərbi təlimindən imtina etmişdi. İmtina üçün kifayət qədər aşağılayıcı ton seçilmişdi. Həm baş nazir Paşin­yan, həm də spiker Alen Simonyan qə­rarı təxminən belə əsaslandırmışdılar: Gələcəklər sərhəd yaxınlığında təlim keçirib gedəcəklər, buna qarşılıq Azər­baycan və Türkiyə aktivləşəcək və Er­mənistan çətin duruma düşəcək. 

Bəli, İrəvanın yanaşması, açıq-aş­kar, KTMT-nin, daha doğrusu, Rusiya­nın heçə sayılmasıdır. Paşinyan admi­nistrasiyası haqqında söz açdığımız təlimə etiraz qərarından əvvəl də analoji addım atmışdı. Yada salaq ki, ötən ilin noyabrında KTMT-nin İrəvanda sam­miti keçirilirdi. Toplantıda quruma üzv ölkələrin liderləri də iştirak edirdilər. Hətta Rusiya Prezidenti Vladimir Putin özü belə tədbirə təşrif buyurmuşdu. 

Belə demək mümkünsə, KTMT-nin ağır çəkililərinin Ermənistan paytaxtın­da olması rəsmi İrəvana sanki jest idi. Ancaq Paşinyanın Putinin bu jestindən nəticə çıxarmayacağı hələ tədbirdən əvvəl məlum idi. Belə ki, Ermənistan iq­tidarı sammitə bir neçə gün qalmış İrə­van küçələrində anti-Rusiya nümayiş­ləri təşkil etmişdi. Həmin nümayişlərdə Moskva əleyhinə sərt bəyanatlar, hətta, təhqirlər belə səslənmişdi. Bu, azmış kimi, nümayişçilər Gümrüdəki Rusiya hərbi bazasının ölkədən çıxarılmasını tələb etmişdilər. 

Ümumən, KTMT-nin İrəvan sammiti əsnasında baş verənlər Paşinyanın an­ti-Rusiya teatrının növbəti tamaşa mey­danı kimi yadda qalmışdı. Bilavasitə toplantının özünə gəldikdə isə erməni baş nazir qurumun üzvlərindən Azər­baycanı təcavüzkar kimi qiymətləndir­məyi, ötən ilin sentyabrında baş vermiş sərhəd toqquşmasına siyasi qiymət ver­məyi tələb etmişdi. Əlbəttə, bu istəyinə nail ola bilməyəcəyi ona yaxşı məlum idi. Paşinyan, öz aləmində, Rusiyanı fakt qarşısında qoyduğunu düşünmüş­dü. 

Qeyd edək ki, Paşinyan KTMT müstəvisində təzadlı fikirləri ilə də diqqət çəkmişdi. Doğrudur, o, ötən ilin sentyabrında Azərbaycanla Ermənistan arasında hərbi toqquşma baş verdikdə, dərhal KTMT-ni köməyə, yəni hərbi mü­daxiləyə çağırmışdı. Ara sakitləşdikdən sonra isə qurumun müşahidə missiya­sından imtina etmişdi. Paralel olaraq Avropa İttifaqının mülki missiyasını bölgəyə dəvət etmək istiqamətində iş aparmışdı. 

Bütün bunlar, eləcə də, Ermənista­nın rotasiya qaydasında KTMT-nin baş katibinin müavini postuna namizəd ver­məkdən imtinası, heç şübhəsiz, ölkənin Rusiyadan tamamilə qopmaq arzusu­nun növbəti bariz göstəricisidir. Hələlik, buna qarşılıq Moskvanın edə biləcəyi heç nə yoxdur. Belə getsə, Ermənistan hakimiyyəti KTMT-dən də çıxa bilər. Proseslər də bilavasitə ona doğru gedir. 

Ə.RÜSTƏMOV, “Xalq qəzeti”