Azərbaycan dili xalqımızın mənəvi sərvəti, dövlət müstəqilliyimizin başlıca rəmzlərindən biridir. Zaman-zaman ana dilimizin keşikçiləri bu dəyərli mirası qoruyub, cilalayıblar. Təəssüf ki, indi doğma dilə yad münasibət meylləri də nəzərə çarpır.
Hələ əsrimizin əvvəllərində – 2001-ci ildə qəbul edilmiş “Azərbaycan Respublikasında dövlət dili haqqında” Qanununa əsasən, “Azərbaycan Respublikası ərazisində bütün xidmət sahələrində, reklam və elanlarda dövlət dili işlənilir. Əcnəbilərə xidmət göstərilməsi ilə bağlı müvafiq xidmət sahələrində dövlət dili ilə yanaşı, digər dillər də tətbiq oluna bilər. Zəruri hallarda elanlarda (lövhələrdə, tablolarda, plakatlarda və s.) dövlət dili ilə yanaşı, digər dillərdən də istifadə oluna bilər. Lakin onların tutduğu sahə Azərbaycan dilindəki qarşılığının tutduğu sahədən böyük olmamalı və Azərbaycan dilindəki yazıdan sonra gəlməlidir”. Bu qanunun tələblərinə əməl edilməməsi cəmiyyətdə məyusluq doğurub.
“Dövlət dilinin tətbiqi işinin təkmilləşdirilməsi haqqında” Prezident fərmanında qeyd edilir: “Şəhər və qəsəbələrimizin görkəminə xələl gətirən əcnəbi dilli lövhələr gənc nəslin Azərbaycançılıq ruhunda tərbiyəsinə mənfi psixoloji təsir göstərir”. Göründüyü kimi, kimlərsə bu fərmana da məhəl qoymurlar. Əcnəbi dillərin təbliğatçılarına çevrilmiş obyektlərin sahibləri təkcə Prezident fərmanına deyil, dövlətin rəsmi azərbaycançılıq ideologiyasına da etina etmirlər.
Xatırlayırıq ki, bir müddət əvvəl “Filoloji Araşdırmalar və Dil Monitorinqi Mərkəzi” İctimai Birliyi Bakının mərkəzi prospekt və küçələrində monitorinq keçirib. Təkcə 1 küçədə aparılan monitorinq zamanı məlum olub ki, ərazidəki 42 ticarət və xidmət obyektindən 41-də (!) Azərbaycan dilindən ümumiyyətlə istifadə edilməyib. Digər ərazilərdə də utandırıcı vəziyyət yaranıb. Bu yaxınlarda redaksiyamızın qonağı olan Xalq şairi Sabir Rüstəmxanlı bu barədə sualımızın cavabında dedi ki, Bakının mərkəzində reklamların 90 faizi kənar sözlərdən ibarətdir. Axı, bizim dilimizin imkanları yetərincədir, nədən qondarma sözlər dilimizə gətirilsin?
Təqdim etdiyimiz fotokollajdan hər şey aşkarca bəlli olur...
Bir problem də bəzi reklam-ünvan lövhələrinin, necə deyərlər, sınıq-salxaq vəziyyətə düşməsi və “şikəstliyin” aradan qaldırılmamasıdır. Nizami Kino Mərkəzinin yanındakı bir lövhə xeyli vaxtdır ki, bu vəziyyətdədir: “Əfsanə” adlanan lövhədən “f” və “a” hərfləri düşüb və “Ə...s...nə” oxunur (Əcaba, ora girmək üçün əsnəmək lazımdırmı?).
Görünən budur ki, millətin varlığını təsdiq edən ana dilimiz hazırda Bakı küçələrindən sıxışdırılıb. Yad dillərdə yazılmış, narazılıq yaradan, əsəbləri tarıma çəkən reklam, plakat və lövhələr paytaxtımızın üzqarasına çevrilib. Anlaşılandır ki, reklamsız bazarda yer tutmaq mümkün deyil, buna görə istər rəqəmsal, istərsə də ənənəvi reklamlardan istifadə zəruridir. Amma bu zaman reklam dilinin bərbad hala salınması anlaşılan deyil.
Az qala addımbaşı Bakının dil mənzərəsi ilə bağlı xoşagəlməz mənzərələrlə üzləşirik. Bu qanun pozuntuları mütləq aradan qaldırılmalıdır. Bakı Şəhər İcra Hakimiyyəti öz səlahiyyətləri daxilində buna qarşı barışmaz mövqe tutmalı, paytaxt küçələrində “Azərbaycanda dövlət dili haqqında” qanuna riayət edilməsinə nəzarəti gücləndirməlidir.
Əli NƏCƏFXANLI
XQ