Xəbər verildiyi kimi, Azərbaycan yazarları qardaş Türkiyədə yaradıcılıq səfərində olublar. İstanbul Kültür Universitetində Azərbaycan Yazıçılar Birliyinin (AYB) sədri, Xalq yazıçısı Anarla görüş keçirilib, ertəsi gün isə Türk Ədəbiyyatı Vaqfında “Qobustan” dərgisinin Türkiyə özəl sayının təqdimat mərasimi olub. “Qobustan”ın baş redaktoru, yazıçı-dramaturq Pərvin Nurəliyeva bizimlə söhbətində İstanbul görüşləri barədə ətraflı məlumat verib. Aşağıda onun dediklərini təqdim edirik.

– Səfərimiz maraqlı tədbirlərlə yadda qaldı. “İki çağın yazarı: Anar” adlı görüş­də universitetin müəllim heyəti və tələ­bələr iştirak edirdilər. Filologiya fakültəsi­nin dekanı, professor Fatih Göksal Türk dünyasının böyük yazarı Anarın türkiyəli gənclərlə görüşünün əhəmiyyətindən söz açdı. Universitetin əməkdaşları Vahit Türk, İsa Kocakaplan çıxışlarında Anarın ümumtürk ədəbiyyatının zənginləşmə­sində xidmətlərindən danışdılar. Yazı­çı-tərcüməçi İmdat Avşarın Xalq yazıçı­sının yaradıcılığında Türkiyə mövzusu ilə bağlı geniş məruzəsi maraqla dinlənildi. O, gənclərə Türkiyənin və özəlliklə türk ədəbiyyatının Azərbaycandan necə gö­ründüyünü anlamaq üçün məhz Anarın əsərlərini, o cümlədən böyük türk şairi Nazim Hikmət haqqında “Kərəm kimi” romanını və TÜRKSOY-da yayımlanan “Çağdaşlarım” kitabını oxumağı tövsiyə etdi. Mətbuat Şurasının sədri, AYB-nin sədr müavini Rəşad Məcid Anarın Tür­kiyə sevgisindən maraqlı məqamlara işıq tutdu. Onun “Yaşamaq haqqı” traktatı ilə ümumtürk tarixini və mədəniyyətini böyük ustalıqla incələdiyini vurğuladı və həmin əsəri gözəl dərslik kimi dəyərlən­dirdi. Mən isə gənclərə Anar yaradıcılı­ğında əks etdirilmiş xoşbəxtlik reseptlə­rini anlatdım. 

Xalq yazıçısı Anar tədbirin təşkilatçı­larına təşəkkürünü bildirdi və türk gənc­lərlə görüşün ondan ötrü xüsusi əhəmiy­yət daşıdığını dilə gətirdi. O, iki qardaş xalqın ədəbiyyatının daha da yaxınlaş­ması üçün belə görüşlərin əhəmiyyətli olduğunu vurğuladı. Mətnlərində və bi­oqrafiyasında Türkiyənin necə özəl yer tutması ilə bağlı səslənən fikirlərə əlavə olaraq dedi: “Mən hələ əlifbanı öyrənmə­dən, oxuyub-yazmağı bilmədən də öncə anam mənə türk şairlərinin şeirlərini, əsasən də Nazım Hikmətin “Günəşi içən­lərin türküsü” kitabını oxuyardı. Sonralar isə özüm oxudum müxtəlif türk şairlərini və çox sevdim, haqlarında məqalələr, ki­tablar yazdım”. 

Sonra iştirakçıların alqışları ilə Anara xatirə hədiyyəsi təqdim edildi, gənclər ya­zıçıya kitab imzalatdılar. Növbəti gün isə Türk Ədəbiyyatı Vəqfi Xalq yazıçısı Anarı “Türk dünyasının ağsaqqalı” mükafatına layiq gördü. Onu da əlavə edim ki, qar­daş ölkəyə yaradıcılıq səfəri çərçivəsin­də Xalq yazıçısı Türkiyənin “Yeni şəfəq” qəzetinə, TRT telekanalına müsahibələr verib, həmçinin TVNET kanalının canlı efirində sualları cavablandırıb.

Pərvin Nurəliyeva səfər çərçivəsin­də İstanbulda Türk Ədəbiyyatı Vaqfın­da “Qobustan” dərgisinin Türkiyə özəl sayının təqdimatı ilə bağlı fikirlərini də açıqladı:

– Dərgimizin özəl sayı AYB-nin Türk Ədəbiyyatı Vaqfı və “Türk ədəbiy­yatı” dərgisi ilə qarşılıqlı əməkdaşlığı­nın məhsuludur. Razılaşmaya əsasən, “Türk ədəbiyyatı” dərgisi ilə “Qobus­tan”ın hərəsinin bir sayı Azərbaycana və Türkiyəyə həsr olunmalı idi ki, bu da uğurla reallaşdı. 

Mərasimdə Türk Ədəbiyyatı Vaqfının rəhbəri, şair Sərhat Kabaklı Ustad Ana­rın yaratdığı və hələ sovet dövründən ümumtürk mədəniyyətini təbliğ edən “Qobustan” dərgisinin Türkiyə özəl sa­yının buraxılmasını tarixi hadisə adlan­dırdı. Ədəbiyyatşünas alim, professor Ramazan Korkmaz, Xalq yazıçısı Anar, “Türk ədəbiyyatı” dərgisinin baş redakto­ru İmdat Avşar, Mətbuat Şurasının sədri, şair Rəşad Məcid bizim dərgi ilə bağlı səmimi ürək sözlərini dilə gətirdilər. Mən də öz çıxışımda bu il “Qobustan”ın 55 ya­şının tamam olduğunu və yubiley ilimizə Türkiyə özəl sayı ilə qədəm qoymağımız­dan şərəf duyduğumuzu söylədim. Onu da deyim ki, mərasimdə Rəşad Məcid və mən “Əhməd Kabaklı adına ədəbiyyat mükafatı”na layiq görüldük.

Hazırladı:
Əli NƏCƏFXANLI
XQ