Onun öz rənglər dünyası var. Baxırsan və sirrinə, sehrinə düşürsən. Rənglərin də öz ruhu olduğuna inanırsan. Söhbət fırçasının möcüzələri heyrət yaradan Əməkdar rəssam, professor İsa Məmmədovdan gedir. 

İsa Məmmədovun ya­radıcılığını səciyyələndirən ifadə tərzinin impressionizm üslubundadır. Zaman-zaman müxtəlif janrlara müraciət etsə də, daha çox mənzərəyə üs­tünlük verən rəssam bir-birin­dən gözəl, rəngarəng tablolar ərsəyə gətirir. Mənzərə janrı vasitəsilə o, əhatə olunduğu gerçəkliyi, təbiətdən ilhamla­naraq aldığı xoş təəssüratlarını sənətsevərlərə özünəməxsus bədii şərhlə çatdırır. Əsasən, kətan üzərində yağlı boya tex­nikası sayəsində işıq-kölgənin təzadı və qovuşuğundan mə­harətlə istifadə edir. 

O, Zəngəzurda dünyaya göz açıb. İncəsənət zövqü ki­çik yaşlarından formalaşmağa başlayıb. Əvvəlcə qarmon ça­lıb, amma bir də görüb ki, bu musiqi aləti onun cızma-qara etdiyi kağızın üzərində peyda olub. Rəsmə baxanlar can­sız təsvirdən qarmonun həzin melodiyalarını duyublar. İlk “iş”lərini, beləcə, karandaşla kağıza, kömürlə daşa, divara, təbaşirlə lövhəyə çəkə-çəkə anlayıb ki, rəssamlıq onun ru­huna daha yaxındır, daha çə­kicidir. 

Bu həvəs onu 1974-cü ildə Əzim Əzimzadə adına Azərbaycan Dövlət Rəssamlıq Məktəbinə gətirib. İlk müəllimi olan Rəşid Heydərzadədən sənətin bütün incəliklərini bö­yük sevgi ilə mənimsəyib. Ora­da təhsilini tamamlayan gənc rəssam bir müddət Moskva­da da rəssamlıq dərsləri alıb. Sonra Vətənə qayıdaraq, Azərbaycan Dövlət Mədəniy­yət və İncəsənət Universiteti­nin rəngkarlıq fakültəsinə daxil olub. Xalq rəssamları Mikayıl Abdullayev, Nadir Əbdürrəh­manov, Böyükağa Mirzəzadə kimi korifeylərdən öyrənib. Diplom müdafiəsi zamanı is­tedadını zəhmətkeş kəndli qadınların obrazları vasitəsilə bir daha göstərib. Kətan üzə­rində yağlı boya texnikası ilə təsvir etdiyi “Lerik qadınları” adlı çoxfiqurlu kompozisiyasını məharətlə ərsəyə gətirib. Tab­loda kənd həyatı, ənənəvi ge­yimli qadınlar canlanıb. Müəl­limləri baxıb “əhsən” deyiblər. Sonra onun rəsmləri müxtəlif miqyaslı sərgilərə “ayaq açıb”, diqqət çəkib, təqdir edilib. 

İsa Məmmədovun yaradı­cılığının ən önəmli cəhətlər­dən biri də onun “Bakı” möv­zusuna tükənməz sevgi ilə müraciət etməsidir. Gözəl pay­taxtımıza adi insanlardan fərqli baxış bucağından yanaşması, təsvir etdiyi əsərlərinin mövzu sərbəstliyi, kompozisiya quru­luşu, real həyata olan lirik, ro­mantik münasibət ifadəsi seyr­çiyə “gəl-gəl” deyir. Buna misal olaraq onun “Bakı mənzərə­si”, “Dənizkənarı Milli Park”, “Paytaxtın Nizami küçəsi”, “Payız” adlı mənzərə əsərləri­ni göstərə bilərik. Hər bir tab­losundan fərdi müşahidələrin və ilkin təəssüratların bəhrələri boy göstərir. Fəsillər dəyişdik­cə təbiətin dondan-dona düş­məsi, açıq havada gözgörəti dəyişən rənglərin ahəngi rəs­samı valeh etdiyi kimi, onlara tamaşa edənləri də ovsunlayır. 

İlin müxtəlif çağlarının, günün çeşidli vaxtlarının rən­garəng koloriti “Bakı motivi”, “Vağzalyanı meydan”, “Bakı mənzərəsi”, “Fəvvarələr mey­danı”, “Bakı. Bizim küçə”, “Ba­kının Milli parkı”, “Bakı vağza­lı” və s. kimi bir çox mənzərə əsrlərində ecazkar əksini ta­pıb. Bizcə, ömründə bir dəfə də Bakıda olmayan, amma İsa Məmmədovun rəsmlərinə baxmaq şərəfinə nail olan hər kəs elə bilər ki, kətan üzərin­də gördükləri gözünə, könlünə lap çoxdan doğma olan mən­zərələrdir. 

İsa Məmmədovun yurdu­muzun dilbər guşələrinə vur­ğunluğunu da fırça dili ilə gözəl ifadə edib. Bu cənnətməkan diyarın ürəkaçan təbiətindən, əsrarəngiz gözəlliklərindən il­hamlanaraq təsvir etdiyi tablo­larla tanışlıq əsl mənada riqqət yaradır. “Şəki mənzərəsi”, “Şəki motivi”, “Şəki. Kiş kəndi” və s. kimi əsərlərində rəssam Şəki təbiətinin füsunkarlığını öz əlvan palitrası ilə elə sər­giləməyə nail olub ki, adam duyğularını həmin rəsmlərə layiq şəkildə dilə gətirməkdə çətinlik çəkir. 

Rəssamın “Payız” adlı ilk fərdi sərgisi Azərbaycan Rəssamlar İttifaqının Vəcihə Səmədova adına sərgi qale­reyasında təşkil olunub. Son­ra müxtəlif xarici ölkələrdə əsərlərini nümayiş etdirilib. Türkiyənin İstanbul şəhərin­də “Bakı” mövzulu, 2011-ci ildə Almaniyanın Bakı-Berlin qalereyasında fərdi sərgiləri ziyarətçilərinə doyulmaz zövq aşılayıb. Hamı görüb və sevə-sevə etirafda bulunub ki, İsa Məmmədovun müxtəlif janrlar­da yaratdığı sənət əsərlərində­ki özünəməxsus gözəllik duyu­mu onun zəngin daxili aləminin təcəssümüdür. Rəssamın rən­gkarlıq tabloları reallığa o qə­dər yaxındır ki, istər-istəməz adama qeyri-adi təmiz dağ havasını, çiçəklərin qoxusunu hiss etdirir. Sənətkarın hər bir əsərinin arxa planında keçirdi­yi dərin emosiyaları, təcrübələ­ri, hiss və duyğuları dayanır. 

Bu gün də onun bənzər­siz əsərləri Türkiyə, Rusiya, Fransa, İtaliya, ABŞ və s. kimi ölkələrdə nümayiş olunur, mu­zeylərdə, şəxsi kolleksiyalarda qorunaraq saxlanılır. Bu rəsm­lər baxan hər kəsi Azərbaycan gözəllikləri qarşısında baş əy­məyə vadar edir.

Ötən ildən Əməkdar rəs­sam fəxri adını daşıyan İsa Məmmədov UNESCO-nun nəzdindəki Rəssamlar Bir­liyinin üzvüdür. Azərbaycan Dövlət Rəssamlıq Akademiya­sının rəngkarlıq kafedrasında pedaqoq kimi fəaliyyət göstə­rir. İlahi vergisi olan sənətinin incəliklərini gənclərə həvəslə öyrədir. 

Əli NƏCƏFXANLI, 
Əməkdar jurnalist,
Ziyarət CABAROVA,
sənətşünas