Müslüm Maqomayev adına Azərbaycan Dövlət Akademik Filarmoniyasının səhnəsində Xocalı soyqırımına həsr olunmuş anım mərasimi təşkil edilib. Tədbirə başlamazdan əvvəl Xocalı soyqırımı qurbanlarının xatirəsi bir dəqiqəlik sükutla yad olunub.
Sonra dirijor Mustafa Mehmandarovun rəhbərliyi ilə Üzeyir Hacıbəyli adına Azərbaycan Dövlət Simfonik Orkestri və Azərbaycan Dövlət Xor Kapellası tərəfindən Xocalı faciəsinin qurbanlarına dərin ehtiram hissi olaraq instrumental musiqilər səsləndirilib.
Anım mərasimində Qara Qarayevin “Matəm odası”, Əli Əlizadənin “Serenata dolore”, Soltan Hacıbəyovun “Karvan” simfonik lövhəsi, Rauf Əliyevin “Şuşanın dağları başı dumanlı”, “Azadlığa gedən yollar” simfonik poeması, Aqşin Əlizadənin 4 nömrəli “Muğamvari” simfoniyası, “Azərilər” Kantatasından “Final” adlı musiqi əsərləri dinləyicilərə təqdim olunub.
Tədbirin sonunda Azərbaycan Dövlət Xor Kapellasının bədii rəhbəri və dirijoru Gülbacı İmanova hər il olduğu kimi bu il də Xocalı faciəsi qurbanlarının əziz xatirəsinin musiqi vasitəsilə yad edilməsinin əhəmiyyətini qeyd edib.
Fidan HÜQUQQIZI,
Elşən Ağalarov (foto),
“Xalq qəzeti”
