Azərbaycanın işğaldan azad olunmuş ərazilərinə yerli biznesin axını davam edir. Artıq Xankəndi və Şuşa şəhərləri də biznes qurmaq üçün növbəti ərazilər kimi təqdim edilir. Elə iyunun 27-28-də İqtisadiyyat Nazirliyinin təşkilatçılığı ilə Şuşa və Ağdamda 100-dən çox biznes nümayəndəsinin iştirakı ilə “Sahibkarlar üçün yeni imkanlar: Qarabağı birlikdə quraq” adlı tədbir keçirilməsi də məhz bu məqsədə xidmət edir. 

Tədbirdə çıxış edən İqtisadiyyat na­ziri Mikayıl Cabbarov dövlət və biznes təmsilçilərinin iştirakı ilə keçirilən birgə tədbirlərin müsbət ənənəyə çevrildiyini, bugünkü görüşün də regionun inkişafı­na və özəl sektorun güclənməsinə töhfə verəcəyini vurğulayıb. Bildirilib ki, Prezi­dent İlham Əliyevin rəhbərliyi ilə ölkəmiz­də sosial-iqtisadi inkişaf sahəsində bö­yük uğurlar əldə edilib. Prezident İlham Əliyev azad olunmuş ərazilərin iqtisadi reinteqrasiyasına böyük diqqət yetirir. Azad olunmuş ərazilərdə aparılan bərpa və quruculuq işləri iqtisadi və sosial inki­şaf üçün yeni imkanlar açıb. Regionda biznesin inkişafı üçün yaradılan şərait, dövlət-sahibkar işbirliyi müstəvisində yeni layihələr reallığa çevrilib. İşğaldan azad edilmiş ərazilərin bərpası və iqtisadi dirçəlişi vətəndaş olaraq hər birimiz üçün əsas prioritetdir. Dövlət bu sahədə üzə­rinə düşən öhdəlikləri yerinə yetirir, biz­nes üçün bölgədə əlverişli şəraiti təmin edir. Vurğulanıb ki, bölgəyə biznes sub­yektlərinin artan marağı nəzərə alınsa, belə fürsətlərdən yararlanmaq həmişə asan olmayacaq.

İqtisadiyyat naziri işğaldan azad edilmiş ərazilərimizin iqtisadi potensialı, buradakı sənaye parkları, biznes üçün yaradılan əlverişli şərait barədə məlumat verib. Qeyd edilib ki, özəl təşəbbüslə­ri hərtərəfli təşviq etmək və dövlət-özəl sektor tərəfdaşlığını inkişaf etdirməklə regiona investisiya qoyuluşunun artırıl­ması hədəflənir. Bundan başqa, bölgə­də biznes qurmaq istəyən sahibkarların maliyyə imkanlarına çıxışı İqtisadiyyat Nazirliyinin müvafiq qurumları tərəfin­dən təmin edilir, eləcə də banklarla bu sahədə birgə mexanizmin hazırlanması gündəmdədir. Daha bir stimul isə azad edilmiş ərazilərdə ölkədə istehsal olun­mayan məhsul istehsalı ilə məşğul olan sahibkarların istehsal etdikləri məhsulun alışının təşkil edilməsidir ki, bunun da üzərində iş aparılır. 

Bildirilib ki, hazırda Qarabağın bərpa­sı və yenidən qurulması qarşıda duran prioritet istiqamətdir. İş adamlarının bu sahədəki rolundan bəhs edən iqtisadiy­yat naziri qeyd edib ki, işğaldan azad edilmiş ərazilərdə yaradılan iş yerlərinin çox hissəsi məhz özəl sektorun payına düşür. Bu baxımdan ölkədə rezident sa­yına görə Sumqayıt Kimya Sənaye Par­kından sonra ikinci olan Ağdam Sənaye Parkının əhəmiyyəti vurğulanıb. 

İqtisadiyyat Nazirliyi yanında İqtisa­di Zonaların İnkişafı Agentliyinin (İZİA) İdarə Heyətinin sədri Seymur Adıgözəlov işğaldan azad olunmuş sənaye parkları haqqında ətraflı məlumat verib. Diqqətə çatdırılıb ki, Ağdam Sənaye Parkında ümumi investisiyalarının həcmi 216 mil­yon manatdan çox olan 25 sahibkarlıq subyektinə rezidentlik, 6 sahibkarlıq su­byektinə isə qeyri-rezidentlik statusu ve­rilib. Həmin sahibkarlıq subyektləri tərə­findən sənaye parkında, ümumilikdə, 2 mindən çox iş yerinin yaradılması nəzər­də tutulur. İndiyədək rezidentlər tərəfin­dən sənaye parkına 35 milyon manatdan artıq investisiya yatırılıb, 300-dək daimi iş yeri yaradılıb. 

O deyib ki, Ağdam Sənaye Parkında müəyyən edilmiş prioritet fəaliyyət is­tiqamətləri tikinti materiallarının istehsalı, kənd təsərrüfatı məhsullarının qablaşdı­rılması, meyvə-tərəvəz konservləri, ət və süd məhsulları, yem, gübrə istehsalı və emalı, eyni zamanda, xidmət sahələrinin, soyuducu kameraların və s. təşkili müəy­yənləşdirilib. 

“Araz Vadisi İqtisadi Zonası” Səna­ye Parkının isə hazırda 10 rezidenti və 2 qeyri-rezidenti olduğunu diqqətə çatdıran S. Adıgözəlov bildirib ki, investorlar tərə­findən parka, ümumilikdə, 83,4 milyon manatdan artıq investisiyanın yatırılma­sı, 700-dən çox iş yerinin yaradılması nəzərdə tutulur. O, həmçinin bildirib ki, bugünədək sənaye parkına 14 milyon manatdan çox investisiya yatırılıb, 20-dən artıq iş yeri yaradılıb. “Hər iki sənaye par­kına sahibkarlar tərəfindən böyük maraq göstərilir. 2024-cü ilin birinci yarımilliyində Ağdam Sənaye Parkı üzrə ümumi investi­siya dəyəri 68 milyon manat olan 9 layihə­nin, “Araz Vadisi İqtisadi Zonası” Sənaye Parkı üzrə ümumi investisiya dəyəri 42,7 milyon manat olan 6 layihənin rezidentliyi təsdiqlənib” – deyə İZİA sədri əlavə edib.

Ötən müddətdə Xankəndi, Xocalı və Ağdərədə 43 obyekt fəaliyyətə başlayıb və 350 şəxs işlə təmin olunub. Bunu isə Azərbaycan Respublikası Prezidentinin Xankəndi şəhərində, Ağdərə və Xocalı rayonlarında xüsusi nümayəndəsi Elçin Yusubov bildirib. O deyib ki, cari ildə hə­min obyektlərin sayının 80-ə çatdırılması nəzərdə tutulur. Xüsusi nümayəndənin sözlərinə görə, burada ticarət, turizm, ye­yinti sənayesi, balıqçılıq, kənd təsərrüfatı və digər sahələr üzrə geniş imkanlar var.

Daha sonra Azərbaycan Respublika­sı Prezidentinin Şuşa rayonunda xüsusi nümayəndəsi Aydın Kərimov, Şərqi Zən­gəzur iqtisadi rayonuna daxil olan Cəbra­yıl, Qubadlı və Zəngilan rayonlarında xü­susi nümayəndə Vahid Hacıyev, Ağdam, Füzuli və Xocavənd rayonlarında xüsusi nümayəndə Emin Hüseynov, Laçın rayo­nunda xüsusi nümayəndə Məsim Məm­mədov işğaldan azad olunmuş yaşayış məntəqələrində həyata keçirilən məs­kunlaşdırma prosesi, eləcə də ərazilərin iqtisadi potensialı, investisiya mühiti və infrastruktur layihələri ilə bağlı tədbir işti­rakçılarına ətraflı məlumat veriblər. 

Qeyd edilib ki, azad edilmiş ərazilər­də sənaye parklarının rezidentləri qey­diyyata alındıqları vaxtdan başlayaraq, 10 il müddətinə əmlak, mənfəət və torpaq vergilərindən azaddırlar. Bundan başqa, sənaye parklarında aşağı həddə icarə haqqı tətbiq edilir, dövlət vəsaiti hesabı­na elektrik, təbii qaz, içməli və texniki su, sürətli internetlə təmin edilmiş infrastruk­tur qurulur. 

Həmin gün nümayəndə heyəti Xankəndi şəhəri ilə tanış olub. Şəhərin istehsal müəssisələrinə baş çəkən sa­hibkarlara buranın iqtisadi potensialı, yeni yaradılmış infrastruktur və həyata keçirilməsi təklif edilən investisiya la­yihələri barədə məlumat verilib. Bunun­la yanaşı, sahibkarlar və müvafiq dövlət qurumlarının nümayəndələri Xankəndi şəhərinin tarixi, burada görülən bərpa iş­ləri və şəhərin sənaye mərkəzinə çevril­məsi istiqamətində aparılan işlər barədə məlumatlandırılıb. Qeyd olunub ki, işğal vaxtı separatçılar tərəfindən xarici görü­nüşü dəyişdirilmiş tikililərin əvvəlki siması qaytarılır, binalarda bərpa işləri aparılır, eləcə də biznes fəaliyyətinin genişləndi­rilməsi tədbirləri görülür.

Tədbir çərçivəsində sahibkarlıq subyektlərinə Qarabağ və Şərqi Zəngə­zur iqtisadi rayonlarının investisiya im­kanları və biznes perspektivləri təqdim edilib, dövlət-özəl əməkdaşlığı modeli üzrə müzakirələr aparılıb. Eyni zamanda, işğaldan azad edilmiş ərazilərdə tətbiq olunan güzəşt və azadolmalar, digər döv­lət dəstəyi tədbirləri, bu ərazilərin bərpa və iqtisadi reinteqrasiyasında sahibkarla­rın rolu mövzularında panel müzakirələr təşkil edilib. Sahibkarlara bu ərazilərdə həyata keçirilməsi təklif edilən investisiya layihələri, məhsulların ixrac potensialı, logistika imkanları təqdim edilib, iştirak­çıları maraqlandıran suallar cavablandı­rılıb.