Martın 1-də Bakıda keçiriləcək Cənub Qaz Dəhlizi Məşvərət Şurası çərçivəsində nazirlərin 10-cu toplantısı və “Yaşıl enerji” Məşvərət Şurası ilə bağlı nazirlərin 2-ci iclası ərəfəsində Almaniyadan ölkəmizə böyük nümayəndə heyəti səfərə gəlib. Bu, həm də ənənəvi enerji konfransına olan yüksək beynəlxalq maraqdan irəli gəlir.
Qeyd edək ki, Almaniya Federativ Respublikasının aparıcı şirkətlərinin rəhbərlərindən ibarət nümayəndə heyətinə Almaniya–Azərbaycan Xarici Ticarət Palatasının icraçı direktoru Tobias Baumann, “Falk” konsaltinq şirkətinin icraçı direktoru Tomas Falk, “Uniper Global Commodities SE” şirkətinin birinci vitse-prezidenti Uve Fip, “Rhenus Group” beynəlxalq nəqliyyat şirkətinin layihələr üzrə idarə heyətinin direktoru Heinrix Kerstgens, “VNG” Səhmdar Cəmiyyətinin İdarə Heyətinin sədri Ulf Heitmüller, “Rohde & Schwarz” şirkətinin regional satış direktoru Viktoriya Gerasimova və “HHLA International” şirkətinin icraçı direktoru Filip Sveens daxildir.
Fevralın 28-də Prezident İlham Əliyev Alman İqtisadiyyatının Şərq Komitəsinin sədri Mixael Harmsın rəhbərlik etdiyi nümayəndə heyətini qəbul edib. Dövlətimizin başçısı alman iş adamlarının ölkəmizə səfərininin əhəmiyyətindən söhbət açaraq əvvəlki görüşləri məmnunluqla xatırladıb. Bu baxımdan böyük nümayəndə heyətinin iqtisadi əməkdaşlığın gündəliyinin müzakirəsi üçün Azərbaycana səfər etməsinin önəmi qeyd olunub.
Nümayəndə heyəti adından Prezident İlham Əliyevə qəbula görə minnətdarlığını çatdıran Almaniya Federativ Respublikasının Azərbaycandakı səfiri Ralf Horlemann dövlətimizin başçısının Münxen səfəri zamanı Almaniya kansleri ilə keçirdiyi görüşlərin onlarda yüksək təəssürat yaratdığını diqqətə çatdırıb. COP29-un keçirildiyi bu ildə sülh müqaviləsinin imzalanmasına nail olmaq üçün yaranmış imkanın sabitlik, iqtisadi inkişaf və əmin-amanlıq baxımından çox önəmli olduğunu diqqətə çatdırıb.
Səfir alman iş adamlarından ibarət böyük nümayəndə heyətinin Azərbaycana səfərinin əsas məqsədlərindən birinin ölkəmizlə əməkdaşlıqda maraqlı olduqlarını nümayiş etdirməkdən ibarət olduğunu vurğulayıb. Azərbaycan Prezidentinin inauqurasiya nitqində iqtisadi, o cümlədən enerji sahəsində transformasiya məsələlərinin ciddi önəm verməsinin əməkdaşlıq üçün böyük imkanlar yaratdığını xatırladan nümayəndə heyətinin rəhbəri Almaniya biznes dairələri və şirkətlərinin bu gündəliyə böyük töhfələr verməyə hazır olduğunu deyib.
Almaniya nümayəndə heyətinin ölkəmizə səfərini yüksək qiymətləndirən dövlətimizin başçısı iqtisadi sahənin ikitərəfli münasibətlərimizdə həmişə mühüm rol oynadığını vurğulayaraq bu amili əlaqələrimizin yaxşı göstəricisi kimi dəyərləndirib. Yeri gəlmişkən, ötən ilin martında Prezident İlham Əliyev Berlinə səfəri zamanı Almaniya Kansleri ilə görüşündə əlaqələrimizin geniş gündəliyinə daxil olan məsələlər, o cümlədən ölkələrimiz arasında iqtisadi əməkdaşlıq əlaqələrinin vəziyyəti müzakirə olunmuşdu. Həmin görüşü məmnunluqla xatırladan dövlətimizin başçısı Azərbaycanın özünü təmin edən ölkə olduğunu qeyd edərək bildirib ki, ölkəmizdə gedən proseslər və həyata keçirilən işlər Azərbaycanın normal həyatını təmin edir.
Almaniya nümayəndə heyətinin rəhbəri Azərbaycana infrastruktur, sənaye, kənd təsərrüfatı, bank və maliyyə, alternativ enerji və digər sahələrlə məşğul olan 40-dan artıq şirkətin rəhbəri və nümayəndələri ilə gəldiklərini diqqətə çatdıraraq keçirdikləri səmərəli görüşlərin onda yüksək təəssürat yaratdığını bildirib. O deyib ki, Azərbaycan, həqiqətən, iqtisadi islahatlarla bağlı böyük işlər həyata keçirir. Onun fikrincə, iki ölkə yalnız ənənəvi enerji sektorunda deyil, başqa sahələrdə də əməkdaşlıq üçün yaxşı imkanlara malikdir.
Yeri gəlmişkən, son illər Azərbaycan–Almaniya iqtisadi-ticarət əlaqələrində dinamik inkişaf müşahidə olunur. Ölkəmiz Almaniyanın Cənubi Qafqazda ən mühüm iqtisadi və ticarət tərəfdaşı sayılır. Təkcə onu qeyd etmək kifayətdir ki, hazırda bu ölkənin Almaniyanın Cənubi Qafqaz ölkələri ilə ticarət dövriyyəsində Azərbaycanın payı təxminən 65 faiz təşkil edir. Eyni zamanda, Almaniyanın Federal İqtisadiyyat və İxraca Nəzarət Ofisinin məlumatına istinadən, Almaniyanı neftlə təmin edən ölkələr sırasında önəmli yerlərdən birini məhz Azərbaycan tutur.
İki ölkə arasında ən yüksək səviyyədə baş tutan qarşılıqlı səfərlər, eləcə də Azərbaycanın biznes imkanlarının və “Made in Azerbaijan” brendinin təşviq olunması məqsədilə Almaniyada keçirilən biznes forumlar ikitərəfli iqtisadi-ticari əlaqələrin daha da genişlənməsinə xüsusi töhfə verir və ikitərəfli iqtisadi münasibətləri yeni mərhələyə qaldırır. Bununla yanaşı, Azərbaycanın iqtisadi və turizm potensialının Almaniyada təşviq olunması məqsədilə ölkəmiz hər il Almaniyada keçirilən müxtəlif beynəlxalq sərgilərdə milli stendi ilə iştirak edir.
M.YAQUBZADƏ
XQ
