30 min ton ərzaqlıq buğda tədarük olunub
Respublikamızda ərzaqlıq buğda ilə özünütəminetmə səviyyəsi aşağı olduğu üçün dövlətimizin başçısı tərəfindən bu istiqamətdə yeni hədəflər müəyyənləşdirilib və qarşıdakı 3-4 ildə vəziyyəti yaxşılaşdırmaq məqsədilə müvafiq qurumlara tapşırıqlar verilib.
Eyni zamanda cari ilin əvvəlindən etibarən 5 il müddətində ərzaqlıq buğdaya məhsul subsidiyasının tətbiqinə başlanılıb, daxili bazarda strateji mallar üzrə qısamüddətli kəskin qiymət dəyişmələrinin qarşısını almaq üçün Dövlət Ehtiyatları Agentliyi yaradılıb. Dövlət Taxıl Fondu isə bu agentliyin sərəncamına verilib.
Azərbaycan Prezidentinin 2022-ci il 19 iyul tarixli “Ərzaqlıq buğda ilə özünütəminetmə səviyyəsinin yüksəldilməsinə dair bir sıra tədbirlər haqqında” fərmanında da ölkənin ərzaqlıq buğda ilə özünütəminetmə səviyyəsinin yüksəldilməsi və ərzaq təhlükəsizliyinin gücləndirilməsi qarşıya mühüm vəzifə kimi qoyulub.
Kənd Təsərrüfatı Nazirliyinin məlumatına görə, ölkə Prezidentinin həmin fərmanının icrası istiqamətində ötən müddətdə işlər uğurla davam etdirilib. İndiyə qədər 18 rayonda 28 təsərrüfatla 22,4 min hektar pivotaltı sahədə ərzaqlıq buğda istehsalının həyata keçirilməsinə dair müqavilələr bağlanaraq əkinlər aparılıb. Şirkətlərdən daxil olan operativ məlumatlara əsasən həmin sahələrin 22 min hektarından (98,1 faiz) 111,8 min ton məhsul istehsal edilib. Hər hektardan orta məhsuldarlıq 50,1 sentner olub.
Fərmanın icrası məqsədilə ərzaqlıq buğda ilə özünütəminetmə səviyyəsinin yüksəldilməsi, yerli ərzaqlıq buğda istehsalçılarının fəaliyyətinin stimullaşdırılması və onlara dövlət dəstəyinin göstərilməsi ilə əlaqədar Dövlət Ehtiyatları Agentliyinin Kənd təsərrüfatı, İqtisadiyyat və Maliyyə nazirlikləri ilə razılaşdırılmış təklifini nəzərə alaraq Nazirlər Kabineti bu il iyunun 21-də “Ərzaqlıq buğdanın dövlət tədarük qiymətinin müəyyənləşdirilməsi barədə” sərəncam verib. Sərəncama əsasən, Nazirlər Kabineti 7 iyul 2009-cu il tarixli qərarı ilə təsdiqlənən “Dövlət Taxıl Fondunun saxlanması və istifadəsi Qaydaları”nın 1 nömrəli əlavəsində vurğulanan keyfiyyət göstəricilərinə uyğun yerli ərzaqlıq buğdanın bir tonunun dövlət tədarük qiymətini 2023-ci il üçün 450 manat müəyyənləşdirib.
Fərmana əsasən, Kənd Təsərrüfatı Nazirliyi ilə bağlamış müqaviləyə əsasən müasir suvarma sistemlərinin tətbiq edildiyi təsərrüfatlarda istehsal olunmuş və Dövlət Ehtiyatları Agentliyinə və un dəyirmanlarına təhvil verilmiş ərzaqlıq buğdanın hər tonuna görə istehsalçılara 100 manat məhsul subsidiyası ödəniləcək.
Respublikamızda ərzaqlıq buğda ilə özünütəminetmə səviyyəsinin yüksəldilməsi üçün bu məhsulun idxalı da diqqətdə saxlanılıb. Dövlət Gömrük Komitəsinin məlumatına görə, bu ilin yanvar-iyun aylarında 493,2 min tondan çox buğda idxal edilib. İdxal edilən buğdanın dəyəri 145,5 milyon dollar olub. 2022-ci ilin eyni dövründə məbləği 142,9 milyon dollar olmaqla, 400,7 min ton buğda idxal edilib.
Hesabat dövründə düyü idxalı da artıb. Belə ki, cari ilin 6 ayında dəyəri 32,5 milyon dollar olan 36,4 min ton düyü idxal edilib. Ötən ilin eyni dövründə 31,5 min ton düyü idxalı həyata keçirilib. İdxal edilən düyünün dəyəri 26,6 milyon dollar olub.
Qarğıdalı idxalında da artım baş verib. Bu müddətdə 17,5 milyon dollarlıq 56,3 min ton qarğıdalı idxal olunub. Ötən ilin eyni dövründə isə məbləği 14 milyon dollar olan 38 min ton qarğıdalı idxal edilib.
V.BAYRAMOV, “Xalq qəzeti”