İndi onlara bir yerə cəmləşib “Qu quşunun son nəğməsi”ni oxumaq qalır
Azərbaycan və Ermənistan xarici işlər nazirləri arasında iyulun 25-də Moskvada keçirilən görüş başa çatdıqdan bir gün sonra hayların baş naziri Nikol Paşinyan növbəti təxribatçı addımı atdı. O, Azərbaycanın suveren ərazilərinə “humanitar yük” adı altında avtomobil konvoylarının göndəriləcəyini bildirdi. Ölkəmizlə razılaşdırmadan atılan bu addım Azərbaycanın ərazi bütövlüyü və suverenliyinə qarşı növbəti təxribatdır. Bu təxribatın Ermənistan dövləti və baş nazir səviyyəsində təşviqi rəsmi İrəvanın sülh müqaviləsini imzalamaqda maraqlı olmadığını bir daha nümayiş etdirir.
Bütün məsələlərdə qətiyyət nümayiş etdirən, iradəsinə heç bir qüvvənin təsir edə bilmədiyi rəsmi Bakının bu təxribatçı addımın da icra olunmasına imkan verməyəcəyi gün kimi aydın idi. Bununla belə, İrəvan Qarabağın erməni sakinlərinin, guya, böhranla üzləşdiyini iddia edərək, Bakının isə bu “böhran”ın aradan qaldırılmasında maraqlı olmadığı görüntüsünü yaratmaq, ölkəmizə qarşı beynəlxalq ictimaiyyətin təzyiqinə nail olmaq üçün şou düzənləmək yolunu tutdu.
Məsələnin digər maraqlı tərəfi Ermənistandan Qarabağa göndərilən və dörd gündür Laçın sərhəd nəzarət-buraxılış məntəqəsinin qarşı tərəfində gözləyən 400 tona yaxın “humanitar yardım gətirmiş” TIR-ların məxsus olduğu “Spayka” şirkəti ilə bağlıdır. Şirkətin saytında (spayka.am) “Spayka” Məhdud Məsuliyyətli Cəmiyyətinin 2001-ci ildə iş adamı David Qazaryan tərəfindən yaradıldığı, kənd təsərrüfatı məhsullarının istehsalı üzrə regionun çoxprofilli aparıcı aqroholdinqi, beynəlxalq yükdaşıma bazarında lider, böyük meyvə-tərəvəz istehsalçısı və MDB ölkələri, Avropa və Fars körfəzinə ixracatçı olduğu qeyd edilib. Şirkətin “Volvo” istehsalçısının 200-dən çox yük avtomobilindən ibarət parkı var.
Bundan əlavə, “Spayka” Ermənistanda “Volvo”, “Carrier”, “Transicold”, “Krone”, “Shmitz Gargobull” şirkətlərinin rəsmi distribütorudur. “2009-cu ildə şirkət “Araratfruit” ticarət nişanını yaradıb. Bu brend bir neçə ildən sonra ixrac edilən ölkələrdə yüksək keyfiyyətli erməni meyvə-tərəvəzlərinin əlamətdar nişanına çevrilib. Bu gün “Spayka” şirkəti meyvə-tərəvəz ixracının 70 faizə qədərini təmin etməklə Ermənistanın aqrar iqtisadiyyatında strateji rol oynayır...” Bu fikirlər şirkətin saytında qeyd olunub. Ancaq şirkət özünü hər nə qədər öyməyə, sudan quru çıxmağa çalışsa da, tarixindəki qara ləkələri yuya bilməz. Bu mənada “Faktyoxla Lab” saytının “humanitar yük”ün niyə məhz bu şirkətə həvalə olunması və ümumiyyətlə, şirkətin fəaliyyəti ilə bağlı araşdırması maraq doğurur.
Qırx dörd günlük Vətən müharibəsinin qızğın çağında – 2020-ci ilin oktyabrın 10-da işğalçı ölkəyə silah-sursat daşıyan mülki yük maşınlarının Gürcüstan-Ermənistan sərhədində saxlanılması barədə məlumat və foto yayılmışdı. Məlumatda bildirilirdi ki, hərbi avtomatik idarəetmə sistemləri Ermənistanın logistika şirkəti olan “Spayka”ya məxsus mülki yük maşınları ilə daşınıb. Hərbi texnikanın quraşdırıldığı avtomobil mülki bağlamalarla üstüörtülü şəkildə yük qoşqusunun arxasına aşkarlanmışdı. Bu, həm də onu göstərirdi ki, Ermənistan hakimiyyət orqanları Gürcüstanın öz ərazisindən hərbi yük daşınmasına qoyduğu qadağanı da davamlı şəkildə pozublar.
“Spayka”nın müharibə zamanı həyata keçirdiyi qanunazidd fəaliyyəti ilə bağlı ən dolğun məlumat isə 2021-ci ilin mart ayında şirkətin media üçün yaydığı açıqlamada əks olunub. Açıqlamada qeyd olunur ki, şirkət 2020-ci ilin sentyabrın 28-dən noyabrın 9-dək Moskva və İrəvandan Xankəndiyə daşımaları öz hesabına həyata keçirib. Qarabağa gətirilən yüklərə ərzaq məhsulları, dərmanlar, şirkətin avtotəmir mağazalarında yığılan xüsusi avadanlıqlar, habelə Rusiyadan “UAZ” maşınları daxil olub. Bundan başqa, qondarma “dqr” rejiminə mobil soyuducular təhvil verilib. Bu maşınlar isə həlak olan erməni əsgərlərinin meyitlərinin daşınması üçün nəzərdə tutulubmuş. Şirkət açıqlamada əməkdaşlarının qanunsuz hərbi birləşmələrin tərkibində döyüşdüyünü də etiraf etmişdi. “Təəssüf ki, müharibə zamanı şirkətimizin 4 işçisi həlak olub. Onlardan ikisi sürücü idi”,– deyə açıqlamada qeyd olunurdu.
Diqqətçəkən digər fakt isə müharibənin başa çatmasından 13 gün sonra N.Paşinyanın Ermənistanın tanınmış iş adamları ilə görüşməsidir. Bununla bağlı “Sputnik Ermənistan” agentliyinin yaydığı məlumatda qeyd olunurdu ki, N.Paşinyan “Spayka”nın rəhbərliyinə daxil olan David Qazaryan və Vaan Kerobyanla da görüşüb. Sonradan bəlli olmuşdu ki, Paşinyan “Spayka” rəhbərliyindən müharibədə həlak olmuş erməni əsgərlərin meyitlərinin şirkətə məxsus olan, meyvə-tərəvəzlərin saxlanılması üçün nəzərdə tutulmuş soyuducularda saxlanılmasını xahiş edib. Xatırladaq ki, həmin dövrdə Ermənistanda hərbçilərin cəsədlərinin mobil soyuducularda saxlanılması ilə bağlı qalmaqal yaşanmışdı. İrəvan sakinləri “Metsamor morqu”nun yaxınlığında park edilmiş “Spayka” şirkətinə məxsus mobil soyuducuları lentə almışdılar. Həmin soyuducularda həlak olmuş erməni əsgərlərin meyitlərinin olduğu müəyyənləşmişdi. O da bildirilirdi ki, Ermənistanın şəhər və rayonlarında tibb müəssisələrinə məxsus morqlarda cəsədlərin saxlanılması üçün yer qalmadığı üçün belə bir addım atılıb.
Hayastan mediasında yayılan bir məqalədə isə qeyd olunurdu ki, Paşinyanın həlak olmuş əsgərlərin soyuducuda gizlədilməsi ilə bağlı xahişini yerinə yetirdikdən sonra şirkətin direktoru David Qazaryana qarşı 2019-cu ilin aprel ayında Ermənistan Dövlət Gəlirləri Komitəsi tərəfindən vergidən yayınma və dövlətə külli miqdarda ziyan vurmaq maddələri ilə açılmış cinayət işinə də xitam verilib. Bildirilirdi ki, bundan sonra şirkət baş nazirə dəstək olmağa başlayıb və işçilərini avtobuslarla Paşinyanın mitinqlərinə daşıyıb.
“Spayka”nın digər tərəfdaşı isə “Ameriabank”dır. “Ameriabank” yağ-pendir və digər süd məhsullarının istehsalı üçün “Spayka” aqroholdinqin yeni zavodunun inşasının əsas maliyyə tərəfdaşı kimi çıxış edib. Bank zavodun investisiya proqramına 15 milyon dollar yatırıb. Bu bankın əsas səhmdarı isə Qarabağda reinteqrasiya prosesində olduqca destruktiv rol oynayan oliqarx Ruben Vardanyandır. Vardanyan “Troyka Landromat”ın ifşasından sonra bu bankı alaraq, çirkli pulların yuyulması və digər cinayət əməllərində istifadə edib.
***
Bu arada Qarabağda cərəyan edən hadisələr heç də humanitar böhrandan əziyyət çəkən bölgədə baş verənlərə bənzəmir. Elə dünən separatçıların “parlamentinin sədri” Artur Tovmasyan “istefa” verdiyini açıqlayıb. O, yaydığı müraciətdə bildirib ki, şəxsi qərarı ilə “parlamentin sədri” postunu tərk etmək kimi siyasi məsuliyyəti öz üzərinə götürür, lakin “Artsax xalqı”nın 1991-ci ildə referendumda qəbul etdiyi ideyaya həmişə sadiq qalacaq.
“Hraparak” qəzeti yazır ki, “yeni sədr” gələn həftənin çərşənbə axşamından gec olmayaraq, “növbədənkənar iclasda seçiləcək”. “Daşnaksütyun”un üzvü David İşxanyanın “namizədliyi” ətrafında siyasi konsensus olduğu bildirilir.
Artur Tovmasyanın “istefası” batmış gəmini ilk olaraq siçovulların tərk etməsi olayını xatırladır. Görünür, daha bir separatçı proseslərin geridönməz şəkil aldığını duyaraq, vaxtında aradan çıxmaq istəyir. Onun bu davranışı öz dərisini xilas etməsinin göstəricisidir. Digər separatçı “qlavarlar” isə onlara yaradılmış şəraitdən istifadə etməli, vaxtında Azərbaycanın qanunlarını qəbul etməli, ölkəmizin normal vətəndaşı olmaq istiqamətində əməli fəaliyyətə başlamalıdırlar. Yalnız bu yolla digərləri özlərini xilas edə, onlara münasibətdə hansısa amnistiya tətbiq oluna bilər. Əks-təqdirdə Arayik Arutyunyan və onun dəstəsi üçün çox çətin olacaq.
Aydın QULİYEV,
politoloq
– Azərbaycanın Laçın yolunda baş verən prosesləri tam nəzarətə götürməsi Qarabağda və Ermənistanın hərəkətlərində fərqli davranışlar yaratmağa başlayıb. Əgər ermənilər əvvəllər istədikləri malları Xankəndiyə daşıyırdılarsa, bu gün onlar həmin imkandan məhrum ediliblər. Onların bu gün istifadə edə biləcəkləri yeganə yol Ağdam-Xankəndi yoludur. Bu yol açıqdır. Azərbaycan dəfələrlə özünün erməni sakinlərinə bu yol vasitəsilə humanitar yüklərin daşınmasının mümkünlüyünü bəyan edib. Elə Xarici İşlər Nazirliyinin iyulun 29-da yayılan bəyanatında da Azərbaycanın özünün Qarabağ bölgəsində yaşayan erməni sakinlərin hüquqlarını ölkə Konstitusiyası əsasında təmin edəcəyi, eyni zamanda, suverenliyi və ərazi bütövlüyünə qarşı istənilən addımın qarşısını qətiyyətlə alacağı vurğulanıb. Azərbaycanın erməni sakinlərinin reinteqrasiyası ilə bağlı ardıcıllığı, qətiyyəti və prinsipiallığı Ermənistanı və Qarabağ separatçılarını çətin duruma salıb. Onlar indiki şəraitdə özlərini təşviş içində hiss edirlər.
Ağdam-Xankəndi yolu ilə bağlı təklifin qəbul olunmaması bir daha göstərir ki, onların niyyəti humanitar yük daşımaq deyil. Əsas hədəfləri Qarabağ ətrafında gərgin vəziyyəti saxlamaqdan, Xankəndiyə mümkün qədər qeyri-humanitar təyinatlı mallar daşımaqdan və dünya miqyasında hay-küy salmaqdan ibarətdir. Ancaq Azərbaycan düşünülmüş taktika həyata keçirərək, həm Ermənistanın Qarabağa qeyri-humanitar yük daşımasının qarşısını aldı, həm də separatçılar arasında təşviş yaratdı. Artıq separatçı başçılarla Qarabağda yaşayan sadə ermənilər arasında fikir ayrılıqları yaranıb. “Parlamentin sədri” Tovmasyanın “istefa verməsi” dediklərimizə sübutdur. Bu “istefa” separatçıların yaranmış vəziyyətdən real çıxış yolu tapa bilmədiklərinin nəticəsidir. Eyni zamanda, artıq Xankəndidə reinteqrasiyanın zəruri olduğunu anlayan kəsim özünü yavaş-yavaş büruzə verir. Əlbəttə, Azərbaycan indiki kimi doğru-düzgün siyasət yürütdükcə reinteqrasiya tərəfdarlarının sayı da artacaq. Pozuculuqla məşğul olanların atacağı təxribatçı addımların isə heç bir səmərəsi olmayacaq.
Səxavət HƏMİD, “Xalq qəzeti”