24 il öncə, 1999-cu il iyulun 12-də Xəzərin Azərbaycan sektorunda yerləşən “Şahdəniz” yatağının açılması rəsmən elan olunub. Bu münasibətlə ölkə prezidenti, ulu öndər Heydər Əliyevin iştirakı ilə təntənəli təqdimat mərasimi keçirilib.
Açılışda ARDNŞ-in birinci vitse-prezidenti İlham Əliyev, Şahdəniz konsorsiumunun prezidenti, “BP-AMOKO Eksploreyşn–Azərbaycan şirkətinin rəhbəri Endi Honvud, “Statoyl” şirkətinin maliyyə nəzarəti meneceri İnge Layf Rulendsholm, əfsanəvi neftçi-geoloq, akademik Xoşbəxt Yusifzadə, eləcə də Böyük Britaniya, ABŞ, Norveç, Rusiya, İtaliya, Türkiyə, Fransa və İranın ölkəmizdəki səfirləri iştirak ediblər.
Ümummilli lider Heydər Əliyev bu əlamətdar hadisə münasibətilə neftçiləri və ölkə ictimaiyyətini təbrik edərək deyib: “Şahdəniz” yatağı Azərbaycanın Xəzər dənizindəki sektorunda, demək olar ki, ən böyük və ən zəngin neft və qaz yataqlarından biridir... “Şahdəniz” konsorsiumunun prezidentinin və başqa natiqlərin burada verdikləri məlumatlar bizi həddən artıq sevindirir və güman edirəm ki, bu, dünya miqyasında böyük bir hadisəyə çevriləcəkdir”.
Xatırladaq ki, “Şahdəniz” yatağı uzun illərdir ki, Azərbaycanın və Avropanın enerji təhlükəsizliyinin təminatına mühüm töhfələr verir. Burada qazma işlərinə 1990-cı ildə başlanılsa da, vəsait çatışmazlığı səbəbindən işlər yarımçıq dayandırılıb. Yalnız 1996-cı ilin iyun ayında Bakıda “Şahdəniz” qaz-kondensat yatağının kəşfiyyatı, işlənməsi və hasilatın pay bölgüsünə dair saziş imzalandıqdan sonra neft ölkəsi kimi tanınan Azərbaycan, eyni zamanda, iri qaz təchizatçısı kimi də dünyanın maraq dairəsinə daxil olub. Bu saziş dünyanın transmilli neft şirkətlərinin “Əsrin müqaviləsi”nin imzalanması ilə təməli qoyulmuş Azərbaycanın yeni neft strategiyasının hədəflərinin dəqiqiliyinə inamı bir qədər də artırıb.
Məlumat üçün bildiririk ki, “Şahdəniz” yatağı Bakıdan 70 kilometr cənub-şərqdə, suyun dərinliyinin 50-600 metr arasında dəyişdiyi ərazidə yerləşir. Dünyanın ən böyük qaz-kondensat yataqlarından biri sayılan “Şahdəniz”in sahəsi 140 kvadratkilometrdən çoxdur. Bu həm də layihənin operatoru olan BP şirkətinin kəşf etdiyi ən böyük qaz yatağıdır. Belə ki, “Şahdəniz” yatağının təsdiqlənmiş ehtiyatı 1 trilyon kubmetr qaz və 240 milyon ton kondensatdan ibarətdir. Bu da Azərbaycanın qaz potensialının, təxminən, 50 faizini təşkil edir.
“Şahdəniz-1” layihəsi çərçivəsində tikinti-quraşdırma işlərinə 2003-cü ilin fevral ayında start verilib. Bu mərhələdə suyun 105 metr dərinliyində 15 quyunun qazılması üçün nəzərdə tutulmuş nəhəng hasilat, qazma və yaşayış platforması inşa olunub, hər biri 100 kilometr uzunluğunda olan iki sualtı boru kəməri çəkilib. “Şahdəniz” yatağından həmin kəmərlər vasitəsilə nəql olunan qaz və kondensatın qəbulu üçün Səngəçal terminalında lazımi infrastruktur yaradılıb. Bundan əlavə, “Şahdəniz” qazının Gürcüstana və Türkiyəyə ixracını təmin etmək məqsədilə 690 kilometrlik Cənubi Qafqaz boru kəməri tikilib istismara verilib.
2013-cü il dekabrın 17-də isə konsorsium iştirakçıları tərəfindən “Şahdəniz-2” layihəsinin işlənməsi üçün yekun investisiya qərarı qəbul olunub. Bununla da, “Şahdəniz” qaz hasilatı və ixracı layihəsi həlledici mərhələyə qədəm qoyub. Bu qərar Azərbaycan və Gürcüstan ərazisi boyunca Cənubi Qafqaz boru kəmərinin ixrac gücünə ildə 16 milyard kubmetr əlavə olunması (Azərbaycanda 48 düyməlik yeni boru kəməri, Gürcüstanda isə iki kompressor stansiyası), Türkiyə ərazisindən keçən Trans-Anadolu qaz boru kəmərinin (TANAP) və Yunanıstan, Albaniya ərazisindən keçərək İtaliyaya uzanan Trans-Adriatik boru kəmərinin (TAP) tikintisi ilə bağlı planların gerçəkləşməsinə imkan yaradıb.
“Şahdəniz-2” layihəsi çərçivəsində mövcud platformaya körpü ilə birləşdirilmiş iki yeni hasilat platforması inşa olunub, suyun 550 metrədək dərinliyi ilə 500 kilometr uzunluğunda sualtı boru kəmərləri çəkilib, Cənubi Qafqaz boru kəmərinin ixrac imkanlarının artırılması məqsədilə Azərbaycanda 48 düyməlik yeni boru kəməri, Gürcüstanda isə ildə daha16 milyard kubmetr qazın qəbulu üçün iki kompressor stansiyası tikilib, Səngəçal terminalında əlavə genişləndirmə işləri aparılıb.
“Şahdəniz” yatağının ikinci mərhələsi üzrə hasilata 2018-ci ildə başlanılıb. Bütövlükdə isə, hasilata başlanıldığı 2007-ci ilin əvvəlindən 2023-cü il iyulun 1-dək “Şahdəniz” yatağından təqribən 196 milyard kubmetr qaz çıxarılıb. Bunun da 58 milyard kubmetri Azərbaycanın daxili bazarında istifadə olunub. Energetikamızın incisi sayılan “Şahdəniz” yatağı indən belə daha 100 il Azərbaycan və tərəfdaş ölkələr üçün əsas tədarük bazası olacaq.
İlham ŞABAN,
Neft Araşdırmaları Mərkəzinin rəhbəri
“Şahdəniz” yatağının Azərbaycan üçün əhəmiyyətli olduqca böyükdür. Hər şeydən əvvəl qeyd edək ki, ötən əsrin 90-cı illərinin əvvəlində Azərbaycan müstəqilliyini əldə edən zaman, ölkədə il ərzində təqribən 7,5 milyard kubmetr qaz hasil olunurdu. Ancaq ondan 10 il öncə, yəni 80-ci illərin əvvəlində respublikamızda illik qaz hasilatı 15 milyard kubmetrdən çox idi. Göründüyü kimi, sonrakı 10 il ərzində qaz hasilatı təqribən iki dəfə azalmışdı. Bu səbəbdən də SSRİ dağılanda Azərbaycan qaz idxal edən ölkə olmuşdu.
2000-ci illin sonundan biz Rusiyadan qaz idxalına başladıq. Azərbaycan ilk əvvəllər ildə 2 milyard kubmetr qaz idxal edirdisə, sonrakı illərdə bu rəqəm 4,5 milyard kubmetrə çatdı. Yəni 2005-2006-cı illərdə biz 4,5 milyard kubmetr qaz idxal edirdik. Əgər “Şahdəniz” yatağı olmasaydı, biz bugünədək də qaz idxal edəcəkdik. Eyni zamanda, Dövlət Neft Şirkəti üzrə hasilatın aşağı düşdüyü indiki şəraitdə (illik hasilat 5 milyard kubmetr) 13 milyard kubmetrlik illik daxili tələbatımızın 8 milyard kubmetrini idxal qazı hesabına təmin etmək məcburiyyəti qarşısında qalacaqdıq. Həmin qazı isə ya Rusiya, ya da İrandan almalıydıq ki, bu variantların da hər ikisinin öz çətinlikləri var. Yaxud da Rusiyadan il ərzində idxal edəcəyimiz 8 milyard kubmetr qaza görə mövcud qiymətlərlə (təqribən min kubmetri üçün 160 dollar ) 1,2 milyard dollar xərcləyəcəkdik. Bu da olduqca böyük məbləğdir.
“Şahdəniz” yatağının istismara verilməsi ilə Azərbaycan dünyanın potensial qaz ixracatçısına çevrilməklə yanaşı, ölkə sənayesinin qazlaşdırılması üçün də imkan yarandı. Ötən müddətdə Azərbaycan metanol, karbomid, eləcə də bir sıra qaz-kimya zavodları kimi sənayedə əlavə dəyər yaradan sahə əldə etdi. Əgər həmin müəssisələr idxal qazı hesabına işləsəydi, istehsal olunan məhsullar baha başa gəldiyindən rəqabət qabiliyyətli olmayacaqdı. Yeri gəlmişkən, hazırda öz qazımız hesabına istixanalarda yetişdirdiyimiz tərəvəz məhsullarının xeyli hissəsini Rusiya bazarına ixrac etməkl ölkəmizə xeyli məbləğdə valyuta gətiririk.
Bu gün Azərbaycan “Şahdəniz” qazının ixracı üçün dünyanın ən uzun enerji dəhlizinə malikdir. Belə ki, hazırda 3500 kilometrlik Cənub Qaz Dəhlizi Bakıdan İtaliyaya qədər uzanmaqla Azərbaycanı birbaşa olaraq Avropa İttifaqı ilə bağlayır. Bu da ölkəmizin etibarlı enerji tərəfdaşı kimi mövqeyini xeyli gücləndirib. “Şahdəniz” layihəsi ölkəmizə xarici kapitalın axınını xeyli sürətləndirdi. Məlum olduğu kimi, sözügedən layihənin birinci mərhələsinə 5,5 milyard dollar vəsait qoyulmuşdursa, növbəti mərhələ çərçivəsində xərclənmiş kapitalın həcmi 24 milyard dollar təşkil edib. Bura kəmərlərin çəkilişinə sərf olunmuş vəsait daxil deyil. Sonda onu da qeyd etmək istəyirəm ki, “Şahdəniz” layihəsi XXI əsr ərzində faktiki olaraq Azərbaycanın qaz ixracının əsas resurs bazası kimi qalacaq. Çünki orada hələ 1 milyard kubmetr qaz var...
Mirbağır YAQUBZADƏ, “Xalq qəzeti”