Böyük əks-səda doğurmuş həmin yığıncaqdan bizi 49 illik bir məsafə ayırır. O zaman respublikaya rəhbərlik edən Heydər Əliyevin təşəbbüsü ilə keçirilmiş toplantı bütünlüklə bədən tərbiyəsi – idmanın problemlərinə həsr edilmişdi.
Bu gün geriyə boylanıb, o uzaq illəri xatırlayanda cəsarətlə deyə bilərik ki, Azərbaycanda bədən tərbiyəsi – idmanın sonrakı və indiki nailiyyətlərinin təməli 74-cü il iyun ayının 21-də qoyulmuşdur. O isti yay günü açıq və prinsipial söhbət nəticəsində qəbul edilmiş qərarlar, bütövlükdə, idmana daimi qayğı indi 100 illik yubileyini qeyd etdiyimiz Ulu öndərin yorulmaz və qətiyyətli fəaliyyətində xüsusi yer tutur.
Ümummilli lider fəallar yığıncağında idmanımızın bütün sahələrini əhatə edən nitqində respublikada bədən tərbiyəsi və idmanın inkişafı işində yaranmış vəziyyəti hərtərəfli təhlil etmiş, irəliləyişimizə mane olan nöqsan və çatışmazlıqları göstərmiş, sağlamlıq və gümrahlıq məşğələlərinin məişətimizə daha möhkəm daxil edilməsi, kutləviliyin artırılması, böyük idmanda isə yüksək nailiyyətlər qazanılması yolları üzərində ətraflı dayanmışdı.
Heydər Əliyev buna qədər görülmüş işlərin respublikanın imkanlarına heç də uyğun gəlmədiyini bildirərək qeyd etmişdi ki, məhz bu səbəbdən bədən tərbiyəsi və idmanı daha da inkişaf etdirmək tədbirləri məsələsini partiya fəalları yığıncağının müzakirəsinə çıxarmaq zərurəti yaranmışdır.
Hadisələrin sonrakı gedişi, yığıncağın qəbul etdiyi qərarların təxirəsalınmaz şəkildə həyata keçirilməsi göstərdi ki, vəziyyətin yaxşılaşdırılması işində ciddi dönüş yaranmağa başlayır. Bununla da idman ictimaiyyətimiz əmin oldu ki, həmin yüksək səviyyəli tədbir vaxtında atılmış addımdır. Bu isə belə bir qənaətə gəlməyə əsas verirdi ki, partiya fəalları yığıncağı tarixin səhifələrinə Azərbaycanda idmanın inkişafına çoxdan ehtiyac duyulan, bu mühüm işə güclü təkan verən toplantı kimi daxil olmuşdur.
Məhz həmin gündən sonra respublikamızın bütün bədən tərbiyəsi və idman təşkilatlarının öz işlərini yenidən, günün tələbləri səviyyəsində qurub, fəaliyyətlərini canlandırmaları, respublika rəhbərinin qeyd etdiyi bütün sahələrdə işin yüksək keyfiyyətlə yerinə yetirilməsi üçün qüvvə və bacarıqlarını səfərbərliyə almaları yığıncağın müəyyənləşdirdiyi istiqamətlərdə mühüm məqamlar idi.
Fiziki hazırlığı yüksəltməkdə, sağlamlığı möhkəmləndirməkdə, nəcib keyfiyyətlərə yiyələnməkdə gənclərin yaxın köməkçisi olan bədən tərbiyəsi və idmanın müstəsna əhəmiyyətini qeyd edən Heydər Əliyev məşğələlərin müntəzəmliyini və kütləvi hal almasının vacibliyini ön plana çəkib bildirirdi ki, ümumittifaq yarışlarında və beynəlxalq turnirlərdə yüksək nəticələr əldə etməyə qadir olan idman ustalarını yalnız bunun əsasında hazırlamaq mümkündür.
Azərbaycan rəhbəri fəallar yığıncağındakı nitqində təkcə Bakıya ümüd bəsləməyib, digər şəhər və rayonlarda da bədən tərbiyəsi və idman hərəkatının problemlərinə, bu hərəkatın inkişaf etdirilməsinə diqqəti artırmaq zərurətini xüsusi vurğulamış, bunsuz sabit uğurlar qazanmağın mümkün olmadığını nəzərə çatdırmışdı.
Heydər Əliyev nitqində məktəb idmanı, qadınların fəal bədən tərbiyəsi və idman məşğələlərinə cəlb edilməsi, məşğələlər üçün lazımi şərait yaradılması, bu məqsədlə sadə idman meydanları ilə yanaşı, iri bazalar inşa edilməsi vacibliyi üzərində dayanmış, beləliklə də, bədən tərbiyəsi və idmanın bütün sahələrini əhatə etmişdi.
Heydər Əliyevin respublikaya rəhbərliyinin beşinci ilində göstərdiyi təşəbbüs tezliklə müsbət dəyişikliklərə, yaxşı nəticələrə yol açan çox inamlı addım idi. Əgər statistikaya müraciət edib, fəallar yığıncağından sonra nə qədər idman meydançası, salonu yaradıldığını, yerlərdə neçə-neçə şahmat məktəbi və digər idman qurğuları açıldığını öyrənmək istəsək, kifayət qədər sanballı rəqəmlər görərik.
Hazırda Azərbaycanda sayı 50-yə çatan müasir Olimpiya İdman Kompleksinin, demək olar, bütün şəhər və rayonlarımızda şahmat məktəblərinin fəaliyyət göstərməsi, digər idman qurğularının inşası əhaliyə asudə vaxtını səmərəli keçirmək, yaranmış imkanlardan geniş istifadə etmək, bədən tərbiyəsi və idman məşğələlərini həyat tərzinə çevirmək, ən yaxşı idmançılara isə ustalıqlarını və nəticələrini getdikcə artırıb, beynəlxalq yarışlarda ölkəmizin şərəfini layiqincə qorumaq imkanı verir.
Qırx doqquz il əvvəl baş tutmuş tarixi yığıncaqdan cəmi iki il sonra, 1976-cı ildə Azərbaycan idmanının üç görkəmli yetirməsi, sonralar voleybol əfsanəsinə çevrilən İnna Rıskal, həndbol ustaları Rəfiqə Şabanova və Lyudmila Şubinanın SSRİ yığma komandaları heyətində Kanadanın Monreal şəhərində keçirilmiş XXl Yay Olimpiya Oyunlarından respublikamıza medallarla qayıtmaları xalqımıza böyük şöhrət gətirən nailiyyət idi. Olimpiada qəhrəmanlarımız Bakıya qayıtdıqdan sonra Heydər Əliyevin onları qəbul edib, Şabanova və Şubinanın olimpiya çempionluğunu, Rıskalın gümüş mükafatını yüksək qiymətləndirməsi bütün idman ictimaiyyətimizin ürəyincə oldu. Zarafat deyildi, dünyanın ən möhtəşəm idman bayramından respublikamıza birdən-birə 2 qızıl və 1 gümüş medal gətirilmişdi!
Rıskal, Şabanova və Şubinanın Monreal zəfərindən sonra respublikamızda qızların voleybol və həndbola, elə idmanın digər növlərinə də marağı daha da artdı, beynəlxalq yarışlarda yüksək nəticələrə nail ola biləcək yeni istedadlar meydana çıxdı, Avropa və dünya çempionatlarında, Olimpiya oyunlarında fəxri kürsüdə medal və təbrikləri qəbul edənlər sırasında qadın təmsilçilərimiz də alqışlandılar.
Ötən əsrin ikinci yarısında, xüsusən də əsrin son iyirmi beş ilində Azərbaycanda idmanın inkişafında və uğurlarında böyük xidmətləri ilə yadda qalmış qadınlar az olmamışdır: coşğun idman həyatı hələ 1930-cu illərdən başlamış və fəaliyyətini Azərbaycan Dövlət Bədən Tərbiyəsi İnstitutunda (indiki akademiyada) müəllim kimi başa vurmuş Zeynəb Rzayeva, yüngül atletikada dünya rekordçusu, 1964-cü il SSRİ çempionatının qızıl medalçısı Ziba Ələsgərova, sambo üzrə dəfələrlə dünya çempionu Zülfiyyə Hüseynova, voleybol ustaları İnna Rıskal, Vera Lantratova, Alla Həsənova, Azərbaycan şahmat məktəbinin məşhur yetirmələri Aynur Sofiyeva, Firuzə Vəlixanlı, İlahə Qədimova, xokkeyçi Zeynəb Nuriyeva, olimpiya çempionu, stend atıcısı Zenfira Meftahətdinova, olimpiya mükafatçısı, güllə atıcısı İradə Aşumova, respublikamızda ilk qadın idman jurnalisti, bir çox il ərzində "İdman" – "Sport" qəzetlərinin əməkdaşı olmuş, sonra da fəaliyyətini "Bakinski raboçi"də davam etdirmiş Xədicə Orduxanova və bir çox başqaları Azərbaycanın idman həyatında yüksək fəallıq göstərmişlər.
İyirminci əsrin səksəninci illərinin əvvəllərinə təsadüf etmiş Qazax–Bakı marşrutu üzrə atçılıq yürüşü də heyrətamiz hadisə idi. Onun şahidi kimi deyə bilərəm ki, qeyri-adi yürüş izlədik. Tədbirin təşkilatçısı, Əməkdar məşqçi, respublikada atçılıq idmanının, bəlkə də, ən fəal təbliğatçısı olmuş Fikrət Hüseynovun təşəbbüsü və yüksək təşkilatçılıq bacarığı yaxşı nəticə vermişdi. Marşrutun keçdiyi hər yerdə – Qazax, Ağstafa, Tovuz, Şəmkir, Gəncə, Qasım İsmayılov (indi Goranboy), İsmayıllı, Göyçay, Şamaxı və digər rayonlarda insanlar çaparları gül-çiçəklə, alqışlarla qarşılayır, qədim ənənələrimizi yaşatdıqlarına görə onlara minnətdarlıqlarını bildirirdilər. Respublikanın idman həyatında tarixi yürüş uğurla başa çatmışdı. Təşkilatçılardan böyük zəhmət, iştirakçılardan isə möhkəm iradə, dözümlülük, fədakarlıq tələb edən bu yürüşün keçirilib-keçirilməməsi üçün uzun müddət düşünmək, hər şeyi ciddi şəkildə götür-qoy etmək lazım gəlmişdi. Respublika partiya fəalları yığıncağının qarşıya qoyduğu vəzifələr idman təşkilatlarımızı böyük işlərə səfərbər etmişdi və həyata keçirilən tədbirlər öz bəhrəsini verirdi.
Heydər Əliyevin bədən tərbiyəsi və idmana daimi qayğısı Azərbaycanda sağlam gənc nəsil yetişməsi və mahir ustalar hazırlanması işinə güclü təkan verdi. Ümummilli liderin respublikamıza rəhbərliyinin ikinci dövründə, təxminən 1990-cı illərin ikinci yarısında söylədiyi bir fikir isə idman ictimaiyyətimizi daha da ruhlandırdı: " Azərbaycan Prezidenti kimi, şəxsən, mən söz vermişəm və indi də bunu təsdiq edirəm ki, idmana xüsusi qayğını öz üzərimə götürmüşəm və əmin ola bilərsiniz ki, bu qayğını daim hiss edəcəksiniz ".
Bu gün müstəqil dövlət olan Azərbaycanın dünya birliyinin bərabərhüquqlu üzvü kimi beynəlxalq miqyasda ölkəmizin imkanlarını və qüdrətini inamla nümayiş etdirməsi, ümumdünya idmançılar ailəsində layiqli yer tutması Heydər Əliyevin müdrik siyasəti və yorulmaz fəaliyyəti sayəsində mümkün olmuşdur. Dünya respublikamızı bədən tərbiyəsi və idmanın dövlətin daimi qayğısı ilə əhatə olunduğu, olimpiya idman kompleksləri tikintisinin geniş vüsət aldığı, idman və olimpiya hərəkatımızın başqalarına nümunə göstərildiyi bir ölkə kimi tanıyır. Bu, təsadüfi deyil. Respublika partiya fəalları yığıncağında bədən tərbiyəsi və idmanın daim diqqət mərkəzində saxlanılması zərurətini xüsusi vurğulayan ümummilli lider ömrünün sonunadək idmançılarımızın ən yaxın dostu oldu. Onun rəhbərliyi ilə yarım əsr əvvəl Azərbaycanda bədən tərbiyəsi və idmanın sürətli inkişafına dəqiq istiqamət verilməsi bu sahədə zəngin ənənələr yaranmasına geniş imkanlar açdı.
İndi ölkəmizin bütün guşələrində, o cümlədən, erməni işğalından azad edilmiş ərazilərimizdə yarışlar bir-birini əvəz edir. Bu yaxınlarda finişə çatmış Heydər Əliyevin 100 illik yubileyinə həsr edilən "Əziz Şuşa" beynəlxalq velosiped yürüşü də belə tədbirlərdən biri idi. Yarışın bütün iştirakçıları, o cümlədən, İtaliya, Belçika, Rumıniya, Niderland, Qazaxıstan təmsilçiləri öz ölkələrinə yüksək təşkilatçılıq səviyyəsində keçirilən yürüş və respublikamızda onlara göstərilən qonaqpərvərlik haqqında xoş xatirələrlə qayıtmışlar.
Yarım əsr əvvəl Azərbaycanın rəhbəri Heydər Əliyevin müdrik təşəbbüsü ilə keçirilmiş və respublikada idmanın sürətli inkişafına güclü təkan vermiş partiya fəalları yığıncağı idman tariximizdə unudulmaz hadisədir. Ulu öndərin 100 illik yubileyini geniş qeyd etdiyimiz 2023-cü ildə 1974-cü ildən başlayan uğurlarla zəngin yolu xatırlamağımız da görkəmli şəxsiyyətin Azərbaycan üçün gördüyü böyük işlərə hörmət və ehtiramımızın ifadəsidir.
Həmin sürətli inkişaf bu gün də inamla davam etdirilir. Estafet etibarlı əllərdədir. Dövlət başçımız, Milli Olimpiya Komitəsinin prezidenti İlham Əliyevin də bədən tərbiyəsi və idman məşğələlərinə böyük sevgisi hamıya, o cümlədən, beynəlxalq aləmə yaxşı məlumdur.
Oqtay BAYRAMOV,
Əməkdar jurnalist