Son on illikdə Kür çayında, eləcə də Xəzər dənizində su səviyyəsinin kəskin şəkildə aşağı düşməsi ilə 800 meqavatlıq “Şimal”, 780 meqavatlıq “Cənub” və 525 meqavatlıq “Sumqayıt” elektrik stansiyalarının (ES) fəa­liyyəti dayanmaq təhlükəsi ilə üzləşmişdi. Buna görə də Prezident İlham Əliyevin tapşırığına əsasən, 2019-cu ildə “AzərEnerji” genişmiqyaslı la­yihələrə start verdi. 

Soyutma suyunu daha dərin və soyuq hissədən götürmək üçün “Sumqayıt” ES-də 750 metr, Şüvəlan qəsəbəsində yerləşən “Şimal” ES-də isə 540 metr uzunluğun­da estakada və nasos stansiyaları tikildi. 2021-ci ildə “Sumqayıt”, 2023-cü ildə isə “Şimal” estakada və nasos stansiyaları is­tismara verildi. 2020-ci ildə estakadaların tikintisinə başlanılan vaxtdan indiyədək dənizdə su səviyyəsinin düşməsi daha da sürətlənib və 30–40 santimetr azalma qey­də alınıb. 

Xəzər dənizi ilə bərabər Kür çayında da su səviyyəsinin düşməsi nəticəsində ölkənin üçüncü böyük elektrk stansiyası olan “Cənub” Elektrik Stansiyasını soyut­ma suyu ilə təmin etmək üçün su aşıran qurğu tikilib və nəticədə bu stansiya da da­yanmaq təhlükəsindən xilas edilib. 

Hazırda “AzərEnerji” adları çəkilən “Şimal”, “Cənub” və “Sumqayıt” elektrik stansiyalarının işini “yaşıl” enerji kon­sepsiyasına uyğunlaşdırır. Belə ki, ölkədə yeni tikilən və tikiləcək bərpaolunan enerji mənbələrinin enerjisistemə inteqrasiyası və tezliyin tənzimlənməsini təşkil etməklə bu 3 elektrik stansiyasında yeni rəqəmsal tətbiqlərin icrasına başlanılıb.