Ermənistanın üzvü olduğu və Rusiyanın hakim rol oynadığı Kollektiv Təhlükəsizlik Müqaviləsi Təşkilatına (KTMT) qarşı demarşları Kremlin siyasi dairələri tərəfindən təmkinlə qarşılansa da, ara-sıra ümumi dözüm ab-havasına zidd sayıla biləcək təmayüllər nəzərə çarpır. Başqa cür mümkün deyil. Çünki İrəvan rəsmiləri əllərinə düşən hər fürsətdə KTMT-ni aşağılamaq yolu tuturlar. Özü də hərəkətlərini kifayət qədər geniş şəkildə ictimailəşdirirlər. Sanki, kimlərsə onlardan belə davranmağı gözləyir. Ermənistan hakimiyyəti isə bu gözləntinin qarşılığında özünün sərt fikirləri ilə, bir növ, hesabat verir. Təbii, rəsmi İrəvanın hesabat ünvanı Qərb, daha doğrusu, Qərbdəki təəssübkeşləridir. Nikol Paşinyan administrasiyası Rusiyaya münasibətdə əks mövqedə dayandığını nümayişə çıxarmaqla, Qərbə özünü qəhrəman kimi göstərməyə çalışır.
Nə isə, mətləbə keçək. Qeyd etdiyimiz kimi, Rusiyada da Ermənistanın anti-KTMT təmayülünə qarşı etirazlar eşidilməkdədir. Bu mənada ölkənin Xarici işlər nazirinin müavini Mixail Qaluzinin yerli telekanallardan birinə müsahibəsində səsləndirdiyi fikirlər maraq doğurmaqdadır. Qaluzinin sözlərinə görə, Moskva gözləyir ki, İrəvan KTMT-nin digər üzvləri ilə qarşılıqlı fəaliyyətin xarakteri ilə bağlı zərərli müzakirələri dayandıracaq və mövcud istiqamətdə yaranan məsələlər konstruktiv şəkildə həllini tapacaq: “Ümid edirik ki, “kim, haradan gəlir” mövzusunda zərərli müzakirələr dayandırılacaq və KTMT çərçivəsində İrəvanla qarşılıqlı fəaliyyətin bütün məsələləri, o cümlədən, təşkilatın Ermənistan ərazisində müşahidə missiyasının yerləşdirilməsi konstruktiv həll olunacaq”.
Bəli, məlumdur ki, Ermənistanın baş naziri N.Paşinyan, ölkə parlamentinin sədri Alen Simonyan, eləcə də digər dövlət rəsmiləri dəfələrlə KTMT-ni sərt tənqid ediblər. İrəvan qurumun baş katibinin müavini kvotasından imtina edib. Martın 14-də keçirdiyi mətbuat konfransında bu qərarı şərh edən N.Paşinyan “biz KTMT-dən çıxmırıq, KTMT Ermənistanı tərk edir” fikrini bir daha təkrarlayıb.
Qaluzinin haqqında söz açdığı KTMT-nin Azərbaycanla Ermənistanın sərhədindəki müşahidə missiyasına gəlincə, təşkilata üzv dövlətlər ötən ilin noyabrında İrəvan sammiti zamanı Ermənistanın, Bakının təcavüzü kimi qiymətləndirdiyi, sentyabr hərbi toqquşmasını pisləməkdən imtina etdilər. Bundan sonra Paşinyan administrasiyası Avropa İttifaqının monitorinq missiyasını Cənubi Qafqaza çağırmaq qərarına gəldi. Bu addımın Rusiya tərəfindən sərt qarşılandığı da məlumdur.
Amma diqqətçəkən məqam odur ki, Ermənistanın xarici işlər naziri Ararat Mirzoyan martın 20-də Moskvaya səfəri zamanı, Ermənistan hakimiyyətinin əvvəlki mövqeyinə zidd fikirlər səsləndirib. Məsələn, Mirzoyan Rusiyanın xarici işlər naziri Sergey Lavrovla birgə mətbuat konfransında Ermənistanın KTMT missiyasından imtina etmədiyini deyib: “...Yəqin, sualın ifadəsi düzgün deyil. Çünki Ermənistan heç vaxt belə bir missiyadan əlini üzməyib. Üstəlik, bu qərar layihəsi müzakirə olunur, onun üzərində iş gedir. Bizim üçün əsas o idi ki, təəssüratımıza görə, KTMT-nin məsuliyyət zonası aydın deyil. Fikrimizcə, bu, bir qədər problemlidir. Amma bir daha deyirəm, qərar layihəsi masa üzərindədir, iş davam edir”.
Lavrov həmin mətbuat konfransında Mirzoyanın boynuna nəyisə qoyurmuş kimi, onun fikirlərinə dəstək nümayiş etdirib: “Mən Mirzoyanın indicə dediklərindən, yəni, Ermənistanın KTMT missiyasının yerləşdirilməsi ilə bağlı qərarı imzalamaqdan imtina etməməsindən məmnun olduğumu bildirmək istərdim. Bu, 2022-ci il noyabrın 23-də Mirzoyanın sədrliyi ilə İrəvanda, KTMT-nin sammiti ərəfəsində, saatlarla aparılan danışıqların mövzusu olub. Məsələ bütün nazirlər tərəfindən razılaşdırılıb. İndi kiçik bir şey var: dövlət və hökumət başçıları da öz imzalarını atsınlar. Bu ehtimal qalır. KTMT buna hazırdır. Biz bu hazırlığı bilirik. Şadam ki, Ermənistan regionda təhlükəsizliyin təminatı maraqlarına cavab verən fürsətdən imtina etmədi”.
Ancaq görünən budur ki, Lavrov Mirzoyanın boynuna nə isə qoya bilmədi. Daha doğrusu, birinci vəziyyəti ölkəsinin xeyrinə dəyişməyi bacarmadı. Çünki Ermənistanda Rusiyaya inam yoxdur. İrəvanın hakim siyasi dairələri Lavrovun fikirlərinə nəzər salıb hesab etdilər ki, Moskvanın gətirdiyi arqumentlər qənaətbəxş sayıla bilməz. Onların söylədiklərinə görə, Rusiya XİN rəhbərinin Donbas və Kosovonı Qarabağ münaqişəsinin həllində presedent kimi götürməsi mənasızdır. Çünki həmin məsələlər beynəlxalq birlik tərəfindən dəstək qazanmayıb.
Əlbəttə, qeyd etdiklərimiz Ermənistanın KTMT müstəvisindəki anti-Rusiya ritorikasının davamlı olacağından xəbər verirdi və oldu da. Bu ritorikanın kifayət qədər güclü mahiyyət daşıdığını nəzərə alsaq, hazırda Qaluzinin bildirdikləri dərin quyuya daş atmaqdan başqa bir şey deyil.
Məsələn, Rusiya XİN başçısının müavini deyir ki, erməni tərəfinin bütün narahatlıqları KTMT-də mövcud olan qarşılıqlı fəaliyyət formatları çərçivəsində – Daimi Şuranın iclaslarından tutmuş, ən yüksək orqan olan Kollektiv Təhlükəsizlik Şurasına qədər müzakirə olunur.
Heç şübhəsiz, bunu dinləyən Paşinyan və ya Simonyan, ya da qeyrisi bircə kəlmə deyəcək: Hə, nə olsun? Paşinyanın istəyi budur ki, KTMT Azərbaycanla hərbi toqquşmaya getsin. İrəvan Bakını öz təhlükəsizliyinə təhdid qismində gördüyünü açıqlayır. Qaluzin isə bildirir: “Biz öz tərəfimizdən Ermənistanın təhlükəsizliyinin təmin edilməsi, onun maraqları naminə Ermənistan-Azərbaycan sərhədində KTMT missiyasının yerləşdirilməsi planlarını, habelə KTMT kollektivinin müvafiq qərar layihəsində nəzərdə tutulmuş digər yardım tədbirlərini həyata keçirməyə hazır olduğumuzu təsdiqləyirik”.
Əlbəttə, Paşinyanın KTMT-ni Azərbaycana qarşı qoymaq cəhdləri manipulyasiyadır. Məlumdur ki, birincisi, erməni baş nazir qurumda təmsil olunan dövlətlərin hər birininin Azərbaycanla kifayət qədər möhkəm əməkdaşılığının olduğunu gözəl anlayır. İkincisi isə hətta nəzəri baxımdan düşünsək ki, KTMT hərbi planda Azərbaycana qarşı çıxır, İrəvanın daha hansısa bəhanələr tapmayacağına təminat yoxdur. Həm də buna görə Rusiya rəsmiləri hazırda ehtiyatlıdırlar. Onlar yaxşı başa düşürlər ki, Paşinyan kimi avantüristə görə Azərbaycanla münasibətləri kəskinləşdirməyə dəyməz. Onsuz da hazırda Qarabağdakı Rusiya sülhməramlılarının erməni təəssübkeşliyi səbəbindən, Bakıdan Moskvaya qarşı xoş olmayan fikirlər eşidilməkdədir. Hazırkı məqamda prosesə KTMT-nin qoşulması isə erməni ambisiyalarına tam dəstəkdir ki, bunu Rusiya istəsə də, qurumdakı digər üzvlərin məsələyə qarşı çıxacaqları birmənalıdır. Belə olan halda Kreml nəyə görə KTMT daxilində ziddiyyətlərin yaranmasını istəsin ki? Onsuz da problemləri yetərincədir.
Qaluzin isə Ermənistanı anti-KTMT mövqeyindən daşındırmağa çalışmaqla, belə demək mümkünsə, İrəvanın başının altına yastıq qoymağı da unutmur. Məsələn, o deyir ki, KTMT quruma üzv ölkələrin liderlərinin ötənilki görüşləri zamanı qəbul olunmuş qərarların icrası üçün intensiv prosesə başlayıb. “Əsasən, Ermənistanın sədrliyi sayəsində KTMT-nin kollektiv təhlükəsizliyimizə qarşı çağırış və təhdidləri dəf etmək imkanlarının artırılması naminə çox işlər görülüb. Mən vurğulamaq istərdim ki, əldə olunan nəticələr koordinasiyalı, səmərəli və maraqlı iş aparılmadan mümkün olmazdı”, – deyən Rusiya XİN rəsmisi hansısa konkretləşdirmə aparmır. Ancaq, hətta, bunu etsə belə, hazırda məsələnin Ermənistan hakimiyyətini maraqlandırdığını söyləmək mümkünsüzdür. Çünki bu hakimiyyət, tamamilə, Qərbə yıxılıb və proses hər ötən gün bir qədər də dərinləşməkdədir.
Ə.RÜSTƏMOV, “Xalq qəzeti”