İl ərzində təşkil olunmuş 10 “KOB Fest” sərgi-satış yarmarkası çərçivəsində 440-a yaxın KOB subyektinin məhsullarının tanıdılmasına və satışına dəstək göstərilib.
Kiçik və Orta Biznesin İnkişafı Agentliyindən AZƏRTAC-a bildirilib ki, 2024-cü ilin sonuncu, sayca 10-cu “KOB Fest” sərgi-satış yarmarkası Zəngilan rayonunun Ağalı kəndində təşkil olunub. Yarmarkada Zəngilan, eləcə də ətraf şəhər və rayonlardan olan 60-a yaxın KOB subyektinin qida və qeyri-qida məhsulları, sənətkarların və yaradıcı şəxslərin əl işləri təqdim edilib və satışı həyata keçirilib.
Qeyd olunub ki, cari il ərzində “KOB Fest” sərgi-satış yarmarkaları Bakı, Göygöl, Şəki, Gəncə, Masallı, Naxçıvan, Zaqatala, Xaçmaz, Göyçay və Zəngilanda təşkil edilib. Bu yarmarkalarda, ümumilikdə, 440-a yaxın KOB subyekti və yaradıcı şəxslərin məhsul və xidmətləri təqdim olunub.
“KOB FEST” sərgi-satış yarmarkaları regionlarda fəaliyyət göstərən mikro və kiçik sahibkarların istehsal etdiyi məhsul və xidmətlərin tanıdılması, satışına dəstək olmaq məqsədilə təşkil edilib. Yarmarkalar KOB-ların satış imkanlarını genişləndirməklə yanaşı, satış bacarıqlarının inkişaf etdirilməsinə də öz töhfəsini verib.
