Külə döndüyü ocaqda yenidən dirilən şəhid Xocalı
Əfsanəvi Səməndər quşu barədə rəvayətlərin hamısında Xeyir qüvvələri təmsil edən bu möcüzəli qanadlını Şər qüvvələr oda atsa da o hər dəfə diriliərək, alovlaradan sıyrılıb yenidən öz yuvasına dönür. 32 il əvvəl soydaşlarımızın qanına susamış quduz erməni millətçilərinin gecənin qaranlığında nəhəng tonqala çevirərək, yer üzündən sildikləri, uşaqlı-qocalı, qadınlı-kişili oda atdıqları şəhid şəhərimiz Xocalı ötən dövrdə Səməndər quşu taleyi yaşayan, nəhayət, üzüntü və nisgillərimizi toy-bayrama çevirən bir müqəddəs ünvandır.
Bugünlədə bir neçə minillik mədəniyyətin varisi olan Xocalının bir qərinəlik külünün üstündə yenidən dirçəldilib kərpic-kərpic ucaldığını görəndə, istər-istəməz, xalqımızın Xeyirin məğlubedilməzliyinə mütləq inamını təcəssüm etdirən bu əfsanəvi süjet yada düşür. Son 36 il müddətində Qarabağı yerüstü cəhənnəmə çevirmiş Xankəndi xuntası 6 ay əvvəl birdəfəlik darmadağın edilib ölkəmizdən qovulandan sonra bu ərazidə ilk dirçəldilən məntəqələrdən olan Xocalıda indi qalib Azərbaycanın günü-gündən daha güclü vuran nəbzi təntənə ilə döyünür.
Yenidən “dirilən” Xocalıda aparılan müasir, sürətli və geniş tikinti-quruculuq işlərinin bir diqqətçəkən əlaməti burada çalışanların ölkəmizin bütün bölgələrinin dəmir biləkli oğlanlarından ibarət olmasıdır...
Birinci və İkinci Qarabağ müharibəsində savaşmış xeyli qazinin şəhid şəhərin “dirildilmə”sini düşmənlə döyüşün davamı adlandırması və burada xüsusi fədakarlıqla çalışması da qabarıq nəzərə çarpır...
Xocalını dirçəldənlər sırasında erməni vandallarının eyni tale yaşatdıqları, uşaq yaşlarında Meşəlidən, Kosalardan, Cəmillidən, Umudludan, Sırxavəndən... didərgin düşənləri görmək də son dərəcə qutsal bir yurdsevərlik timsalı kimi öyünc doğurur...
Xocalıda atasını da, anasını da itirmiş uşaqların böyüyüb öz doğma ocağının çırağını yandırmağa gəlməsi isə xalqımızın Vətən sevgisinin insana sonsuz sevinc yaşadan bir duyğu olaraq təzahür etməsi demək deyilmi?..
Bir vaxtlar yerli “hökumət”in – Xocalı sovetinin sədri olmuş Sovet Allahverdiyevin bir neçə aydır ki, kütləvi məzarlıqların aşkarlanmasına rəhbərlik etməsi, artıq 12 həmyerlisinin qalıqlarının tapılmasına nail olması və bu qeyrət işini inadla davam etdirməsi xalqımızın daha bir yüksək mənəvi keyfiyyətini nümayiş etdirir...
AMEA Arxeologiya və Antropologiya İnstitutunun əməkdaşları isə antik Xocalı mədəniyyətinin izlərini qoruyub saxlamış, düşmənin qarət edib dağıtdığı qəbiristanlıqda apardıqları indiki tədqiqatla bu yeraltı muzeyin qədim türklərə məxsus olduğunu bir daha sübuta yetirirlər...
Bütün bunlar barədə qəzetimizin Xocalıda ezamiyyətdə olan əməkdaşı Tahir Aydınoğlunun hazırladığı yazıda XQ-nin növbəti sayında daha geniş söhbət açılacaq.
XQ