Xalqımız 20 yanvarın növbəti ildönümünü qeyd etdiyi bu günlərdə mərhum aktyor Hamlet Xanızadə də yada düşür. Azərbaycanın unudulmaz Əməkdar artistini xatırlamağımız əbəs deyil. 1990-cı il yanvarın 20-də təkcə küçələrdə sovet güllələrinə tuş gələnlər şəhid olmadı, bu siyahı göründüyündən daha böyükdür. Hamlet Xanızadə də o haqsızlığın, o faciənin ağrılarını çox daşıya bilmədi...
Azərbaycanın teatr və kinosunun tarixinə adı qızıl hərflərlə yazılan bənzərsiz aktyorlardan biri də Hamlet Xanızadədir. İstedadı ilə Həsənəğa Turabov, Həsən Məmmədov, Şahmar Ələkbərzadə, Səməndər Rzayev, Fuad Poladov kimi sanballı aktyorların sırasında özünə yer alıb. Cəmi 49 il ömür sürüb. Amma bu 49 ildə elə uğurlara imza atıb ki, nailiyyətləri ona xalq məhəbbəti qazandırıb, ölməzlik gətirib. Adı daim ehtiramla yad olunur, ruhuna rəhmətlər oxunur. Onun yaratdığı obrazların heç biri tamaşaçı diqqətindən kənarda qalmayıb, yaddaşlarda iz buraxıb.
“Dəli yığıncağı”, “İblis”, “Ölülər” və s. tamaşalarda Hamletin bütün qəlbi və ruhu ilə oynadığı nə qədər qəhrəmanlar olub. Hər dəfə səhnəyə çıxanda tamaşaçı alqışlarının ardı-arası kəsilməzdi. “O qızı tapın”, “Yeddi oğul istərəm” “Axırıncı aşırım”, “Arxadan vurulan zərbə”, “Qətl günü”, “Yaramaz” filmlərindəki bənzərsiz rolları da onun yadigarlarıdır.
Hamlet Xanızadə Bakının Şağan kəndində dünyaya gəlmişdi. Təkcə istedadlı aktyor deyildi, həm də Azərbaycanın qeyrətli oğullarından biri idi. 1990-cı ilin 20 Yanvar hadisələri onu da dəhşətli dərəcədə sarsıtmışdı. Vətənin, xalqın namusunu çəkən, onun yolunda ölməyə hər an hazır olan aktyor, əslində, 20 Yanvar faciəsinin qurbanı oldu. Tez-tez “Şəhidlər xiyabanı”na gedir, şəhidlərin məzarlarını ziyarət edirdi. Növbəti dəfə fevralın 2-ndə, çəkilişdən sonra dostlarıyla birlikdə Şəhidlər xiyabanına yollanır. Orada güclü başağrıları tutduğu üçün dostları onu evinə gətirirlər. Özündə olmadığını görüb təcili xəstəxanaya çatdırırlar. Bir gün reanimasiyada qalandan sonra, səhərə yaxın keçinir. Doğma kəndlərinin qəbiristanlığında torpağa tapşırırlar...
Ruhun şad olsun, Hamlet Xanızadə!
Elman ELDAROĞLU,
şair-publisist