Bakıdan sonra M.Qorbaçovun cəlladları Lənkəran və Neftçalada da nahaq qan axıdıblar
Moskvadan göndərilən cəza dəstələrinin əli ilə paytaxt Bakıdan uzaq rayonlarda da haqsızlıqlara etirazını bildirən dinc əhali ilə amansız rəftar edilib. Neçə nəfərin həyatına son qoyulub, neçəsi yaralanıb, həbs olunub.
Yanvarın 25-də hərbi vertolyotlarla Lənkərana gəlib hegemonluq edən silahlılara diviziya komandiri, polkovnik Totski rəhbərlik edirdi. Onlar öz zabitləri – kapitan Kanapilovu arxadan vuraraq, bunun günahını Lənkərandakı milli müdafiə batalyonunun üzvlərinin üstünə yıxıb və xəbərdarlıq etmədən atəş açıblar. Gözlənilən təhlükəni şəhərdən uzaqlaşdırmaq məqsədilə Haftoni meşələrinə çəkilən 350 nəfərlik özünümüdafiə dəstəsinin aqibəti daha faciəli olub.
Hadisələr zamanı Lənkəran rayonunun 6 sakini – Tariyel Abdullayev, Vaqif Məmmədov, Salman Baxşıyev, Şahin Məmmədov, Rahim Məmmədov və Rövşən Bədəlov amansızlıqla qətlə yetirilib. Silahlılar 16 nəfər lənkəranlı gənci həbs edərək, Rusiyanın Ulyanovsk şəhərinə, 30 nəfəri isə Şüvəlan qəsəbəsinə apararaq 30 gün dustaq saxlayıblar. Bakı hadisələri zamanı isə 5 nəfər lənkəranlı şəhadətə qovuşub. Şəhidlərdən biri – Tariyel Abdullayev Ulyanovska aparılarkən vertolyotda boynuna telefon məftili dolayaraq, boğub öldürüblər. Onun meyiti Bakıda “Salyan kazarmaları”nın qabağındakı küçəyə atılmışdı...
Hadisələr zamanı Haftoni meşəsində olan, təsadüf nəticəsində sağ qalan Lənkəran sakini Hicran Əsədov baş verənləri belə xatırlayır:
– Yanvarın 19-dan 20-nə keçən gecə işdən çıxıb evə getdik. Televiziyalar işləmirdi deyə, Lənkəran radiosunu açdım. Xəbər verildi ki, Bakıda qırğın olub, “xilaskar” sovet hərbçiləri camaatı qırıblar. Mitinqə toplaşdıq. Kimsə dedi ki, Bakıya köməyə getməliyik, kimin evində nə var – ov tüfəngi və s. götürüb, yola çıxaq (Qəribə görünsə də, adam belə məqamda hətta bıçaqla da köməyə getmək istəyir). Sonra xəbər gəldi ki, daha Bakıya getməyə ehtiyac yoxdur. Biz də gözdə-qulaqda olduq ki, birdən vəhşi hərbçilər Lənkərana gələrlər. Bir neçə gün sonra, həqiqətən də, ordu Lənkəranda peyda oldu. Şəhərdə qarşıdurma olmasın deyə, saat 2–3 radələrində Haftoni kəndi yaxınlığındakı meşəyə getdik. Ruslar snayperlə öz adamlarından birini vurub bizi günahlandırdılar. Halbuki, bizdə avtomat yox idi. Beləcə, şəhidlər verəsi olduq.
Dayım yaralanmışdı, can verirdi deyə, onun yanına gəldim. Bir də gördüm ki, başımızın üstünü rus hərbçiləri alıb. Bizim əl-qolumuzu bağladılar, dayımın meyiti qaldı maşında.
Axşam bizi döyə-döyə vertolyotlara mindirdilər. 30 gündən çox Ulyanovskda həbsxanada qaldıq. Hər gün bizi yoxlayır, əziyyət verir, iynə vururdular… Mən o zaman bel ağrısı, kəllə-beyin travması almışdım. Uzun illərdir ki, müalicə olunuram.
Həmin vaxt məktəbli olan Hüseyn Cəbrayıloğlunun isə yaddaşında Lənkəran olayları belə qalıb:
– Mənim 15 yaşım vardı. Bakı hadisələrindən sonra artıq Lənkəranda hərəkat fəalları Moskvanın cinayətkar əməllərinə cavab olaraq, yerli hakimiyyət orqanlarını ələ keçirmişdilər. Az qala, bütün ölkə Lənkərandan danışırdı. Məktəbdə müəllimlərin Bakıda qaniçən ordunun günahsız əhalini gülləbaran etməsi barədə söhbətləri hər birimizi qəzəbləndirirdi.
Bakı qırğınından 2 gün sonra Lənkəranda “Şüşəli univermaq” deyilən mağazanın pəncərələrinə “Səhər” qəzetinin xüsusi buraxılışını vurmuşdular. Qəzet bütünlüklə faciəni əks etdirən şəkillərdən ibarət idi. Daha sonra gündəlik mitinqlər başlandı və növbəti faciə Lənkəranda baş verdi. Həmin gündən başlayaraq, səmada dövrə vuran vertolyotlar, Lənkəran şəhidlərinin dəfni və vertolyotlardan səpilən hədələyici vərəqələr indi insana ağrılı bir film kimi gəlir...
Qanla yazılmış tarix bu gün hünər səlnaməsi kimi xatırlanır. 20 Yanvar şəhidləri ilə bərabər, 26 yanvar hadisələri zamanı həlak olmuş 6 nəfərin də adı Lənkəran şəhərindəki Şəhidlər xiyabanında əbədiləşdirilib. 34 ildir ki, yerli sakinlər bu müqəddəs məkanı ehtiramla ziyarət edir, şəhidlərin ruhu qarşısında baş əyirlər...
Etiraz dalğaları Neftçalanı da bürümüşdü. Yanvarın 25-də buraya gələn ordu hissələri günortadan sonra rayonun mərkəzinə yetişiblər. Sovet tankları, BTR-ləri küçə və meydanlarda o baş-bu başa şütüyür, əsgərlər heç nəyə baxmadan, Bakıdakı qətliama etirazını bildirən əliyalın insanlara atəş açır, gülləbaran edirdilər. Yoldan ötənlər belə döyülür, vurulub əzilirdilər...
“Qanlı yanvar” qurbanlarından biri Nurəddin Ağahüseynov oldu. O, axşamüstü öz minik maşınında Neftçalanın mərkəzində ikən tanklarla üz-üzə gəldi. Anındaca atəşə tutuldu və neçə güllə yarası aldı. Camaat harayına yetib Nurəddini xəstəxanaya aparsa da, zavallının həyatını xilas etmək mümkün olmadı...
Amansız sovet əsgərlərinin hegemonluğuna etiraz edənlərdən biri də Əbülfəz Cəfərov idi. Cəsarəti, canıyananlığı ilə tanınan Əbülfəz öz həyatını təhlükəyə ataraq, yaralıları əsgərlərin pəncəsindən alıb uzaqlaşdırırdı. O özü də qəfil gülləyə tuş gələrək yerə sərildi və şəhid oldu. Vəhşilər Əbülfəzin barmağını kəsib nişan üzüyünü də götürmüşdülər.
Qanlı yanvar hadisələri zamanı bir çoxları kimi, neftçalalı Şəmsəddin Orucov da həyatını itirdi. O, hərbiçilər tərəfindən evinin pəncərəsindən baxarkən atılan güllə nəticəsində şəhid oldu...
Nefçala faciəsinin şahidləri bildiriblər ki, təcavüzkarlar bununla kifayətlənməyiblər. Hər cür qəddarlığa əl atan sovet əsgərləri hətta şəhərdə 20 Yanvar şəhidlərinin yas mərasimini də atəşə tuturdular. Xıllı qəsəbəsində tank və PDM-ləri şübhələndikləri adamların qapısına sürüb, həyətlərindəki ot tayalarını yandırırdılar. Onlar 50-yə yaxın insanı həbs edərək, Bankə qəsəbəsindəki hərbi hissənin hamamına apardılar və orada günahsızlara xüsusi qəddarlıqla işgəncələr verdilər.
Publisist İbrahim Nurlu “Neftçalada yanvar qırğını” adlı kitabında yazır: “Tutulanları döyə-döyə maşınlardan yerə tökürdülər. Rusca kobud ana söyüşləri, yaralananların iniltisi döyülənlərin qışqırığına qarışmışdı. Yerə axan al qan soyuq, çirkli beton döşəməni qızartmağa başladı. Hamamın tünd qoxusuna qan iyi də qarışdı...”
Sonra qəddar əməllərinə haqq qazandırmaq istəyən Neftçala rayonunun hərbi komendantı O.Şeluxinin imzası ilə yayılan riyakar məlumatda göstərilirdi ki, xüsusi qoşun hissələri Neftçalaya daxil olan zaman guya rayon müdafiə şurasının üzvləri silah işlətmiş və buna cavab olaraq onlara atəş açılmışdır. Hadisələr zamanı leytenant Aksyonov adlı qondarma bir zabit ölmüş, bir əsgər isə yaralanmışdır. Guya əhalidə pulemyot, avtomat, tapança və qumbara varmış...
Deyildiyinə görə, SSRİ Dövlət Təhlükəsizliyi Komitəsinin “Alfa” Qrupunun üzvləri də Neftçalaya gəlib kəşfiyyat aparıblar. Rayon hərtərəfli blokadaya alınıb. Tutulanları üst-üstə vertolyota yığaraq Bakıya aparan zaman dənizə atmaq istəyiblər, amma nədənsə çəkiniblər.
Sonda qeyd edək ki, işgəncələrdən və aldıqları yaralardan ölənlərlə bərabər, Ramiz Hüseynov, Novruz Dadaşov, Ələkbər Talıbov, Bəxtiyar Ağayev, Məhəmməd Fərziyev, Fərman Hüseynov, Oqtay Orucov, Əliheydər Məmmədov, Abdulla Ağayev və İmamverdi Zeynalov Azərbaycan Respublikasının “Azadlıq uğrunda mübariz” fəxri adına layiq görülüblər.
Əlbəttə, şəhid olanların qanı hədər getmədi. Onsuz da bünövrəsi laxlayan SSRİ dağıldı, zorla müttəfiq elan edilmiş respublikalar müstəqillik qazandılar. Azərbaycan isə ermənilərin işğal etdiyi Qarabağı və Şərqi Zəngəzuru da azad etdi.
P.S: Yanvar hadisələrindən 5 il sonra, 1995-ci aprelin 27-də Mixail Qorbaçov İstanbul şəhərində həmin vəhşi təcavüzlə bağlı deyib: “Bakıda fövqəladə vəziyyət elan etmək və oraya qoşun göndərmək mənim siyasi həyatımın ən böyük səhvi idi”. Amma bu, artıq daldan atılan daş idi...
Əli NƏCƏFXANLI
XQ