DOST İnklüziv İnkişaf və Yara­dıcılıq Mərkəzinin benefisiarlarının rəsm əsərləri ilk dəfə Cənubi Ko­reyada keçirilən beynəlxalq sərgi­də nümayiş etdirilir. Əlil gənclərin əl işlərindən ibarət sərginin açılışı Yeniyetmələrin 4-cü Qış Olimpiya Oyunları çərçivəsində Cənubi Ko­reyanın Qanqvon əyalətində keçi­rilib.

Mərkəzdən XQ-yə bildiriblər ki, “Bir­likdə böyü, əbədi parla!” devizi ilə ke­çirilən sərgidə mərkəzin benefisiarları Şamxal Xələfli, Şəbnəm Əhmədova və Qumru Əliyevanın müxtəlif mövzularda çəkdikləri tablolar, o cümlədən “Şuşa”, “Neft buruqları”, “Qış mənzərəsi” əsərləri qonaqların və media nümayəndələrinin marağına səbəb olub.

Mərasimdə iştirak edən Cənubi Kore­yanın hökumət nümayəndələri, diploma­tik korpus üzvləri və sənət xadimləri Azər­baycan rəssamlarının əsərlərindən ibarət ekspozisiyaya baxıblar. Sərgidə əsərləri yer alan müəlliflərin emosional və rəs­samlıq baxımından yüksək səviyyədə iş nümayiş etdirdikləri diqqətə çatdırılıb. Bu cür əsərlərlə rəssamların dünyaya ümid və gözəllik bəxş etdiyi vurğulanıb. 

Mərkəzin nümayəndəsi tədbir iştirak­çılarına qurumun fəaliyyəti və xidmət is­tiqamətləri ilə bağlı məlumat verib. Sosial cəhətdən həssas əhali qruplarına aid, o cümlədən əlilliyi olan şəxslərin yaradı­cılıq potensialının inkişaf etdirilməsi və cəmiyyətə adaptasiyası istiqamətində aparılan işlərdən danışıb.

Ekspozisiyada Asiya, Amerika, Afrika, Avropa və Okeaniya ölkələrindən 53 rəs­samın 274 əsəri sərgilənir. Sərgi fevralın 1-dək Yeniyetmələrin 4-cü Qış Olimpiya Oyunları müddətində Qanqneunq İn­cəsənət Mərkəzində sənətsevərlərin ixti­yarında olacaq.